- Dr.LB Muan
28/03/2024
Pathian in i dinmun hon theihpih louh hun om hetlou ahi. Haksatna tawpkhawk i tuah hun inle i dinmun hon mu gige a, i zahlak di leh i buaisiat di hon phallou in ahunhun in i poimohte hon pezel hi.
2004 kum, March kha ahi. Pastor khat a inn uh gutaten ana luhsak ua, a sum koih teng uh ana lak mangsak uhi. Hiai thu kazaktak un ka lungsim uh nuamlou in vaveh ding ka sawm uhi. Kou le sum lam a ka buai petmah laitak uh ahi a, bat dit di tampitak ka neih laitak uh ahi. Meh man di natawm suktuah haksa kasak mahmah lai uh ahi. Khut vuak a vahoh ding lah nuam kasa kei ua, sum tamlou bek azat tawm di uh vahop ka ut mahmah uhi. Ka sum neihteng uh 1300 lak khawng ahi ding a, huai teng tawh azing in innkuan in ka vahoh ua, sum 1000 mehman din ka vapia ua, thumna neihsak in kong kik uhi.
Mi hausate adia zaw tam ahi hetkei ding a, hilehle neihteng va pekhia chu ka himai uhi. Kou le mehman di natawm neilou chu kahi peuhmah ua, khatnawn chiang a ka tapa lianpen school admission fee leh laibu man di khawng bangchi suktuah di chia a lungkham mahmah a ka om laitak uh ahi. Alehlam ah hun paisa ale Pathian ompihna tamtak ka muh ziak un tutung inle Pathian in a lampi di hon bawlsak zel na di chi in lungmuan na khat chu ka nei veve hi.
Azing in office a ka tutlai in message khat honglut a, ka account ah sum 2200 val ki deposit ahihdan hong kigelh hi. Pathian in zaw ka dinmun nak theih hoihlua ahihdan ka muchian semsem hi. Pathian kiang ah kipahthu ka gen a, bat ditna di leh kha beitan mehman di a buailou chu ka hita uhi.
Pathian a muanna i koih a, adeihlam ihih nakleh aman zaw hon nak vualzawl utlua ahihdan a kilang mahmah mai hi. Agam leh adiktatna zong masa un achih tekhawng, adeihlam hih masa dia hon ngiat tinten tekhawng hih masa peuh le i lampi a hon taisan ngeilou ding ahihdan chu chiang mahmah hi.
Hiai asimkha tampi omdin le ka
gingta khol kei a, asim kha sunsun ten hiai tungtawn a Pathian in hon itdan leh
ei adia agin omdan nana muh semsem uh kon deihsak hi.
No comments:
Post a Comment