Gelhtu: LB Muan
01/04/16
“Pathian lau a, Bible deihdan a hing ing a, khovel nopsaknate a kibuallou ing a, ka lawmte bang a hinkhua zanglou ing a, ka hihtheih bangbang a Pathian adia kizang ing a…bangziak a ka hinkhua hichitel a haksa a genthei kahi hiam?” chi a lungsim sa vungvung a om nahihleh thilkhat suutkhawm zual ni…
Abraham hunlai ding vel in ‘Uz’ gam kichi ah mi khat ana om a, amin Job ahi. Mi hoihkim leh tang ahi a, Pathian lau mahmah leh hoihlou mudah mi ahi. Mihausa mahmah ahi a, a kigen dan in suahlam mi tengteng lak ah thupipen hi. Tapa sagih leh tanu thum nei hi.
Vaan ah nikhat setan vahoh a, huchi in Pathian toh kihoukha uhi. Pathian in setan kiang ah, “Ka sikha Job na ngaihtuah ngei hia? Amah banga hoihkim leh mi tang, Pathian kihta a hoihlou mudah lei ah kuamah aom kei” ana chi hi. Huai in Setan in hichi in Pathian dawng kik hi, “Bangmahlou dia Job in Pathian kihta ahi maw? Amah kiimvel in leh, a inn kiimvel in leh, aneih tengteng kiimvel in, ning chiteng ah uum-na na bawl kei maw? A khut nasep na vualzawl a, gamsung ah aneih leh lam apung voi. Himahleh tu in na khut suahkhia inla, aneih tengteng khoih in, huchi in na maitang ah nang a hon gense ding.”
Pathian in Job muang mahmah hi, setan in bang chiteng in soisa lehle Job in amah taisanlou ding ahi chih muang ngam a, huaiziak in Pathian in setan kiang ah hichi in gen hi, “Ngai in, aneih tengteng nang thu ahi; amah mah tung ah kia na khut kha ken” chi hi. Huchi in setan thu-mu kisa in midiktat, Pathian lau, midangte bang a hinkhua zanglou ‘Job’ soisa ding in Pathian’ ma apan kuankheta hi.
Setan in Job neih leh lam leh a innkuante hon soisa panta hi…Nikhat Job lungmuangtak a aom lai in a kiang ah a nasem (sikha) ten thilmulkim-huai leh mangbat-huai thutampi hontun guihta uhi.
Job nasemte khat a hong tailut a, Seba kichi miten ganching tute namsau a athahdan thu uleh ganhingte a lakmangdan thu uh hong hilh hi…huchih laitak in adang khat leng a hong tailut nawn a, vaan a kipan a Pathian’ mei hong kia in belamte leh ganching tute a kaatmang vek dan thu uh hongtun nawn hi…Job in hiaite ziak a lungsim sa vungvung a aom lai in a nasemtu khat hong tailut nawn a, ganchingtute namsau a Kaldai kichi miten a thahdan uleh ganhingte a lakmangdan thu uh hongtun nawn hi…
Hiai teng Job a ding in thuak haksa mahmah ding hi. Job in hihkhelh neikei mah leh nikhat thu in aneih leh lam teng hong mang vekta mai a…kum tampi a sepgimna thakhat thu a leivui hong suakvek maizaw Job adin na mahmah ding in gintak-huai hi.
Job in aneih leh lamte leh a nasemtute manthatdan a ngaihkhiaklai in a nasemtu dangkhat hongtai nawn a, Job adin bel manglam bang ding in a gintak-huai…a tawpna pen pa’n chu Job kiang ah hichi in hon genta hi, “Na tapate leh na tanute’n a unaupa upapen uh inn a an anekkhawm lai un gamdai a kipan in huih thupitak a hong nung a, huai in inn ahihchim a, na tate a si vek uh.”
Job adin khovel ah hin-man omnawnlou a, sih-ut huaizaw ding hi. Job inle thuak haksa salua zaw ahi ding, athou a, a puanaktual a botkek a, alu a metsiang a, lei aki deenna mai hi…ahihziak in Pathian tung ah avui kei, kam khat inle Pathian tung ah a khasiatna a genkei lai, huai naksang in Pathian a bezaw a hichi in achi hi, “Ka nu suul a kipan vuaktang in ka hong a, huailam ah vuaktang in ka kik ding: TOUPAN hon pia a, huan TOUPAN ala mangta hi; TOUPA min phat in om hen” achi lai.
Setan in hiai teng a Job mawhna neilou agawt nung inle Job in Pathian gense tuanlou ahihman in setan in Job gawtbeh utlai a Pathian kiang ah hichi in gen hi, “Tu in Job tung ah na khut kha in la, aguh leh asa khoih lechin, huan na maitang ah nang hon gense ding,” chi hi. Pathian in Job muang mahmah ahihman in setan khut ah Job pekhe nawn a, Job hinna leltak hoi a ataksa ut dandan a soisak ding in phal hi.
Setan chu thu-mu kisa in Toupa mai apan pawtkhia in Job kiang zuan vengveng ngal a, gawtna haksa petmah in Job gawtta hi. Job khepek nuai akipan a luzaang tanin meimatum dim a, huchi in Job in aki khuatna dingin belpei ala a, meivu lak ah a tusuk mai hi. Job genthei law mahmah lehle Pathian adin ding kip thouthou hi. A ji in a thuakna en-ngam nawn mahmahlou zaw ahi dinga, a pasal Job kiang ah, “Na gin omna len chinten lailai na hi hia? Pathian gensia in la, si in,” chihkhumsuk ek mai hi…ahihziak in Job in, “Numei haite thugente lak a khat bang in thu nagen. Bang ahia? Pathian khut ah hoih i mu dia, hoihlou leng i mu kei dia hia?” chi in dawng a, Pathian tung ah vui na leh lungkim louhna kampau zangkha nailoulai hi.
Job thuakna zaw haksalaw mahmah ahi ding, a lawmten le gen didan theilou in kahpihtop mai uhi…
Job in Pathian alauh ziak leh haksa tawpkhawk a le Pathian genselou leh vuii hetlou a Pathian a letkip tinten ziak in Pathian in aleh tampi in vualzawl nawn hi…(Job 42).
Unau, Pathian in nang leh kei le Job bang a hon muang mahmah hikha di ahi…Pathian in setan kiang ah, “Ka tapa/tanu bangchituk in sawi in hih genthei le chin le kei hon taisanlou ding ahi” chi ahi kha maithei. Pathian in hon muan natan ah ding i hi na diam…ahihkeileh setan vualzousak khasek i hi hia?
Hiai khovel ah mi khenkhatten a tuhgah uh aat in genthei uh a, khenkhatte bel mihoih mahmah leh Pathian lau mahmah hizenpi in leng gentheihna simsenglouh tuak om hi. Unau, nang leh kei koi pen i hi a…i khelh ziak a i tuhgah aat i hihleh kuamah i mawhsa theikei ding, ahihziakin Pathian lau a genthei i hihleh bel nikhat ni chiang in Pathian in ahoihna lamdang hon musak ngeingei ding…tua ni ngak in pang hamham ni!
PATHIAN IN JOB AMUAN BANG IN NANG LEH KEI LENG HON MUANG A HUAIZIAK A GENTHEIHNA TUAK HIKHA DING I HI…PATHIAN IN MUANTAK HON SAK ZIAK IN KIPAK ZAW NI!
_______________________________________
# Na phattuampih leh midangte khualna in ana SHARE sawn inla,
# Article ki post chiang a nana muhzel na ding in hiai atung a taklampang a "Follow" kichi pen CLICK in.
No comments:
Post a Comment