LOT INNKUANTE THUPI DAN

Gelhtu: LB Muan

25/02/14

        Abraham tawh Lot hong kikhendek uhi. Huchi in Lot in Jordan phaizang teel hi. Lot in Jordan phaijang a teel ziak leh Sodom-le-Gomora khua lam ma-noh a kal asuan khelh ziak in Lot leh a innkuante a hoihlou pumlum dan ngen in kikoih a, a hoih nalam uh muhkhiak ana kisawm khalousek hi…Lot leh a innkuante hoihna leh thupidan i suut ding…

SODOM LEH GOMORA KHAWPITE

        Sodom leh Gomora khua ichih bel khawpi nih (Sodom+Gomora) ahi a, tu hun a Tuipi Si (Chi Tuipi/Dead Sea) ichih na mun ah hiai khuate ana om-ngei hidan in Bible siamten suikhia uhi. Hiai khuate a teng mite’ siatna bel nasa mahmah a, numei-le-pasal kal a thangtatnate kia hilou in pasal-le-pasal/numei-le-numei kipolhna leng uang mahmah in Pathian kihta mi 10 leng om zouloutel uhi. Hiai khawpite ah mihing tampitak teng mahle uh Pathian’ mitmuh a diktat leh hoih Lot te innkuan chihlouh adang muhzawh ding ana omloutel a, tuaiziak in Pathian in vaan apat mei-le-kat zusak in hiai khua leh asung a omte haltum dimdem hi.

LOT LEH AZI THUPIDAN

        Sodom khua a ava teen ziak ua kuamah pahtak loh kha ngei hetlou Lot te nupa bel nupa lohching ahi uh chidaih leng genkhial kei ni. A khawsakna uh Sodom khua huchitel a sia a, Pathian phawk amau innkuan chihlouh adang a om mahmah louh lai un, Pathian taisan hetlou in khalam-le-salam siangthouna ah ana kikembit zoulai uhi. Etsakna hoih mahmah bel Lot inn a Angelte a vatun lai un Sodom miten kipolhpih din va ngen uhi. Huaitak in Lot in “Pasal tawh kithuah ngeilou tanu nih kanei a, amau na ut dandan un na kithuahpih ding un kon pezaw ding” ana chi hi. A teenna khawpi a mite huchitel a sia ua, numei tawh pasal kideihkhop nawnlou a, pasal inle pasal mah kipolhpih dia lunggulh thei hial dia sualte lak ah Lot te nupa in a tanute ana keem siangthou zoulai uh chih bel thillamdang ahi.

        Lot in hangsantak in “Pasal tawh kithuah ngeilou tanu nih ka nei…” chi-ngam mawk hi…thupi lawtel ahi. A tanute siangthou ahi uh chih Lot in theichiang mahmah keileh Pathian’ Angelte mai ah athil gen pen genkhe-ngam mawklou ding hi. Huchibang khua a atate siangthoutak a kemzou Lot te nupa bel pahtawitak ahi uhi.

        Bible ah Lot leh a innkuante tawh kisai i simkhak chiang a ahoih nalam uh mulou a, a hoihlouh nalam ngen uh mu a i simmoh mahmahlai in ei tawh Lot te innkuan kiteh kaak zual le..Tulai khovel ah i tate numei tawh pasal kal ah siangthoulai uh ahi chi a hangsantak a gen ngam ding mi bangzah i om dia? I taten bangzah vei aang ana kawm ua, nau bangzah vei ana sukia ta ahi ua chih thei hetlou a lungmuangtak aom i hizaw maimah diam…I tate kumching nailou ichi a, bangmah phawk nailou dia i gintak lai in numei leh pasal kal a thangtatna, khamtheih leh siatna chiteng a kibual khin ana hi maimah di uam maw…Bangmah a i simlouh Lot leh a innkuante ei sang a hoihzaw a nahi maimah kha ding uh…kiveel thak ni…

 

LOT’ TA NUMEITE THUPIDAN

        Bible a khua kigen khate lak a siatna lam ah Sodom-le-Gomora kaan a sia omdin gintak-huai hetlou hi. Huchituk a mihoihloute omna mun ah Lot’ ta numeite ana kikem siangzou uh chih thillamdang petmah ahi. A nu leh pa un bang chiteng in thuhilh in, omdan, kizepdan, Pathian lauh didante zilsak in suun-le-zaan in enkai hile uhle hiai numei nihte asual ut ua lehzaw aguk in ana sualthei tham ding un gintak-huai hi. Thilhoih hih dia i kisak leh bel hun sawt lut petmah a, himahleh thilsia hih nadin bel hun sawt ngai hetlou in tomchik sung inle thilsia tampi hih theih mai hi. Lot’ tate’n thilsia ana hih utle uh hihthei lawtel ding uhi.

        Numei-le-pasal kal a thangtatna huchitel a ana nasat lai in hiai unau nihte’n Pathian lau in ana kikem siangthou uhi. Lot’ ta numeite tawh ei kiteh ta le, kua i hoihzaw diam? I nu-le-paten “ka tanu/tapa numei-le-pasal kal a siangthou lai ahi” achi-ngam di uam? Chi-ngam bang hita zenzen le uhle adik na diam?

        I nu-le-pate leh miten kha-mi mahmah a hon koih a, Biakinn leh khawtaang ale suanhuai leh mihoih mahmah dan a hon thei ua, Pathian lau mahmah dan a hon muhte uh ihi maithei…mite hon muhdan utawh ei hinkhua taktak kigamla lua anahi maimah hia leh? Tuailai lak a nasatak a kizang a, ahihkeileh Pathian laa sa a alanglang a diang a miten angel bang a hon muhlai ua ei aguk a thil kihhuai teng hih zelte i hizaw maimah hia leh…Jesu kichei nadia zangte i hizaw maimah hia leh? Mite mai en a, Pathian mai en khalou ihih khak ding lauh huai mahmah hi.

I OMNA MUN BANGCHIZONG TENG A SIA AHIH LEH LENG, LOT TE NUPA BANG A PATHIAN LAU A TATE ENKOL DING LEH, LOT TATE BANG A KIKEM SIANGTHOU DING IN PATHIAN IN SIMTUTE HON VUALZAWL CHIAT HEN!

 

_______________________________________

# Na phattuampih leh midangte khualna in ana SHARE sawn inla, 

# Article ki post chiang a nana muhzel na ding in hiai atung a taklampang a "Follow" kichi pen CLICK in.