DAMNA BUKIM

Gelhtu: LB Muan M.Th in Counselling

23/01/19

        Mihingte i kimuh chiang in “Na damzel hia?” i kichisek uhi. “Damzel” chih khawng i kidawnna tangpi uh ahi. Taksa damlouhna banghiam i neih chiang in “damlou” i kichi a, huchilou a taksa a noplouhna leh hatlouhna bangmah a omlouh chiang in “dam” i kichi uhi.

       Mihing poimoh bel damna bukim ahi a, taksa damna pen damna bukim ana hizenzenlou hi. Huaiziak in damna bukim i chih bang hi a…bangchituk a poimoh hiam chih suut ni.

 

1. TAKSA DAMNA

           Khovel a khawsalai i hihman in taksa damna poimoh petmah a, taksa damna hoihtak neite bel mi-enghuaite hi uhi. Damna i deihziak un taksa ah damlouhna neuchik i neih chiang inle Doctorte kiang zuanpah in i dampah nadin damdawi nek ding i ngaihtuah pahsek uhi.

          Khenkhatte’n taksa damna deih in mun tuamtuam leh gam tuamtuam tanpha ah sum tampipi seng a ki-enkol in damna i zong uhi. Taksa adam theihlouh chiang in i hih-ut kihih theilou a, hoh-utna munte hohzoulou in leh sep-utte kisem theilou hi…huaiziak in taksa damna poimoh petmah hi.

 

2. LUNGSIM DAMNA

         Mi tamtakten taksa damna i ngaih poimoh petmah lai un lungsim damna a poimohdan ana kiphawk khakhollou maimah hi. Taksa damlouhna sang a lungsim damlouhna a lauhhuai zawkdan leh lungsim damlouhna in taksa damna leng susevekthei ahihlam kithei khollou hi.

            Lungsim damna a poimohdan theilou chu i hi kholkei ding ua, himahleh i ngaihsaklouh luatziak un eite lak ah taksa damlouhna a damlou sang in lungsim damlouhna nei kitamzaw ding in gintak-huai hi. Stress, Depression, Anxiety Disorder, PTSD, ADHD leh adangdang lungsim damlouhna tuamtuamte ziak a taksa dam zenpi lungsim sidedu a hinkhua zang tampitak ki-om ding hi. 

        Taksa damlouh hun in Doctor-te i ki-ensak pahsek a, himahleh lungsim a damlouh chiang in Counsellor/Psychologist leh Psychiatrist-te kiang kihoh sawm hetlou hi. Taksa a damlouh chiang in dampah ut in damdawi kinepah a, himahleh lungsim a damlouh chiang in a damna ding lampi ki-ngaihtuahsawm khollou hi. Damdawi inn hoh i poimoh-ngaih mahmah lai un Counselling Centre hoh utna lungsim kinei khollou mawk hi.

        Gam changkangte’n bel lungsim chidamna poimoh petmah ahihdan thei in Counselling Fee tampipi seng in lungsim damna din Counsellor/Psychologist leh Psychiatrist-te kiang zuan uhi.

             I taksa bangchituk a damthei in hat mahleh i lungsim adam keileh a kimkhat si tawh kibang hilel ding i hi. Huaiziak in lungsim chidamna bel taksa chidamna sang ale poimohzaw chihtheih mai ding hi.

 

3. KHALAM DAMNA

            Ei mihingte bel Pathian in “Kha” nei a honsiam kihi a, hiai i-kha bel i taksa sihnung a gawtmun leh vangam khat zawzaw a paiding ahi. Huaiziak in i taksa adamlai a i-kha tangtawn a aom na ding mun i ngaihtuah felsak poimoh petmah hi.

          I taksa leh i lungsim chidam mahmah ahi khamaithei, ahihziak in i-kha in Kalvary Khros a damna ngah nailou ahihleh patauhhuai petmah chihna hi ahi. Taksa leh lungsim damna ding a sum tamtak seng ngam lah kha damna ding athawn a Kalvary Khros a ngahtheih mai pen ngaihsak a nei hetlou tamtak ki om hi. 

          Taksa chidamna sang in lungsim damna poimohzaw a, lungsim damna sang in kha damna poimoh zawlai hi.

 

THUKHITNA

          Mihingte lauhuaipi leh lamdangtak a Pathian honsiam i hihman in damna bukim nei a i om chiang in hihtheih le kihau a, khuak le kizangthei petmah in hinkhua leng nuam mahmah hi, himahleh damna bukim neilou a kha hiam, taksa hiam ahihkeileh lungsim hiam a damlouh chiang in adang tegel le subuai khazel hi.

        Bangchituk in taksa damthei mahleh lungsim leh kha adam keileh taksa hong buai thouthou a, lungsim chidam mahmah lehleng taksa leh kha adam keileh lungsim tawldamtak hinkhua zattheih hituanlou hi. Kha chidam mahmah in taksa leh lungsim a chidam tuan keileh mihing kipahdi bang inle kipahtheih tuanlouh a, anung chiang in khalam inle bahlohzel hi.

        Khalam damna zaw poimohpen mah ahi, ahihziak in khovel a hinglai i hihman in i taksa leh lungsim damna leng poimoh lawtel hi. Kha, taksa leh lungsim a chidam chiang in damna bukim nei kihipan hi ahi.

• Taksa damna na poimoh leh Doctor zuan in.
• Lungsim damna na poimoh leh Counsellor/Psychologist ahihkeileh Psychiatrist zuan in.
• Kha damna na poimoh leh Counsellor/Pastor/Evangelist ahihkeileh tangtak in Jesu kiang zuan in. 

         I Toupa’n zaw i taksa, lungsim leh kha a hihdam vekthei, ahihziak in khovel vanzat, pilna-le-siamna leh a nasemtute khawng mah zang a nasem ahi chihle i theih poimoh mahmah ding ahi.

____________________________________________________

# Na phattuampih leh midangte khualna in ana SHARE sawn inla, 

# Article ki post chiang a nana muhzel na ding in hiai atung a taklampang a "Follow" kichi pen CLICK in.