KIZUAKNU GOMER HOIHNA THUGUK

Gelhtu: LB Muan 

17/11/18

Jawlnei Hosia i genchiang in a ji Gomer pen “kizuaknu” chi in a hoihlouhna chouh kigen sek hi. Hosia pen i pahtak mahmah lai in Gomer pen ki-musia mahmah mai a, a hoihna gen ding kitheilou sek hi.

Mihing a bukim kuamah omlou a, hoih nalam chiat ki-nei in hoihlouh nalam leng ki-neivek hi. Kizuaknu Gomer hoihlou i sak mahmah lai in i phaklouhna tampi tak ana om maimah hi.  Hoihtak a Hosia Laibu i suut leh Gomer hoihna tamtak muhtheih hi. Hiai ah “Kizuaknu” chi a ahoihna gen ding i theih hetlouh uh Gomer hoihna bangzah hiam i enkhawm ding.

 

1. PASAL DIA JAWLNEI NEI NGAM

Gomer in a pasal ding in Pathian’ Jawlnei khat kitenpih ngam maimah hi. Hosia in a ji dia a vagen in Gomer in ana nial chih Bible ah kigelhlou hi. Hosia in kizuaknu Gomer a utna tellou in thagum in a ji ding in pi a kitenpih chihdan in leng kigelhlou hi. Huaiziak in Hosia in Gomer a kitenpih dek in Gomer in leng lemsa ahi chih chiang mai hi.

Kizuak khat in Pathian thugen a ki-koukou khat va kitenpih ding chih thil ut-huai hihetlou ding di. Amah ah kisitna lianpi a om ding ban ah kizuak thei i chih Pathian tawh leng kigamla mahmah chihna himai a, kizuakna mun pawtsan a mun siangthou a thugentu khat ji dia om ding chih a zumhuai na leng tampi om ding hi.

A kiten chiang ua miten banggen ding ua…? Mou en dia hong hoh khempeuh in “kizuaknu” chia a muhsit didan khawng uh Gomer in a lungsim ah ngaihtuah thousam ding in gintak-huai hi. Gomer lungsim leng paisau mahmah thou ding in gintak-huai a, Pathian nasem khat in hon kitenpih ut a akipah huailua chihlam sang in a ut-huai loulam tamzaw kha ding hi. Ahia Pathian in Hosia tungtawn a anasep ut theisiam a, Pathian’ deihdan ahihleh chi a ana ut hi ding in gintak-huai hi. Hichibang thupukna goltak la ngam Gomer bel pahtak-huai petmah hi.

2. KHOVEL NOPSAKNA PAWTSAN NGAM

Gomer bel kizuak a pasal tuamtuam tawh thangtat a, khovel nawpsaknate a kibual ahihman in tua dinmun apat pawtkhia a Pathian nasem khat kitenpih ding chih thil baihsam hilou hial ding hi. Aduh-duh ne-a, dawn-a, hoih asak dandan a kichei a, a utdandan a khawsalai thakhatthu a ahinkhua kikhek a, Jawlnei khat tawh Pathian’ chih bangbang a khawsa dia kisak ding chih numei kizuak khat adin thil ut-huai hihetlou ding hi.

Kizuak khat in thangtatna tawpsan a Pathianthu chouh buaipih Jawlnei innsung alut ding chih ut-huai hetlou ding hi. A pasal ding Pathian nasem hilou a, sepna dang deuh nei khawng hileh bel ut-huai kha ding a, ut-le-dah a taal lai thakhat a siangthouna hinkhua zang ding chih kizuak khat adin ngap huai hetlou ding hi.

Kizuak te’n sum-le-pai ngaina mahmah ding un gintak-huai hi. Huaiziak in pasal hausa deuh khat khawng ji ding in bel phur huai kha ding a, himahleh sum-le-pai le nei khollou Pathianthu gen a diangdiang khat pasal a neih ding chih pen phur huai ding in gintak huailou hi. Ki-it, ki-ngaih ziak a kiteng ding le hilou lai, Pathian sawl ziak a akitenpih sawm khat pasal a neih ding chih mawk pen ngap huai hetlou hi. Hosia leng mel-le-puam a etlah huai mahmah le hi khollou zawmah maithei hi.

Gomer ngaihtuahna leng paisau mahmah ding in gintak-huai a, himahleh amah leng a omdan kikhek a khovel nawptaalna apan pawtkhia a Pathian adia hing a, Pathian deihdan a khawsa dia thupukna la a Hosia kitenpih hi ding in gintak-huai hi.

 

3. THUMANG PETMAH

Pathianthu bel Hosia kiang ah tung zel mahleh Gomer kiang ah tung ngeilou hi. Ta aneih chiang un min hoihlou pipi phuak ding in Pathian in Hosia sawlsek hi. Huchih hun in Gomer in atate minte hoihlou theilua, ka deih kei…adang phuakni chi inle a pasal kun ngeilou hi. Pathian in a pasal kiang a agente thil kipahhuai hikei lehle phun hetlou in zuizel mai hi.

Khatvei bel a hinkhua lui ah kiknawn kha hi. Himahleh a pasal in ava lakkik dek in nial hetlou in ana zui nawn mai hi. A pasal’ thu aman pen Pathianthu mang ahi chih kithei hoih mahmah hi ding in gintak-huai hi.

 

THUKHITNA

Eite Gomer dinmun ah ding hile Jawlnei khat i koppih din kinei ut khollou ding a, khovel noptaalna a kibual mah kiteelzaw kha ding hi. Tulai khovel ah Pathian nasemte tawh kiteng utlou a, ki-it ki-ngaih nung ale taisan tamtak om hi. Makpa dia Pathian nasem deihlou bangleng om lawtel hi. Pathian nasemte sang a sepna neilou natawm adeih tamzaw hi.

Gomer in a hinkhawlui a paisan kia hilou a, Pathian nasem khat tawh kiteng a, Pathian thuthu a kalsuan dia thupukna alak pen ettontak petmah hi…

Gomer bang a hinkhua a taisan dite taisan a, thupukna khauhtak lak di a omleh la a, Pathian leh agam adia kipekhe ngam ding in simtute Pathian in hon vualzawl hen!

____________________________________________________

# Na phattuampih leh midangte khualna in ana SHARE sawn inla, 

# Article ki post chiang a nana muhzel na ding in hiai atung a taklampang a "Follow" kichi pen CLICK in.