PREACHER’S AWARD

Agelhtu: LB Muan

20/03/16

29th Feb. 2008 ziltawpni ahi a, Professor te’n Certificate leh thilpiak tuamtuamte piakkhiakna hon neihzawh un Award-te pekhe di’n hong kisata uhi. Kou a graduate ten leng bilpalh zen in zakkhak louh di lau in kilawptak in stage tung apat min hong kisamte kana ngaikhia uhi. Award-te aban-ban in hon pekhezel ua, huchi’n Award teng lak a kigen minthang pen leh student teng in a etlah pen uh puang ding in hong kisata uhi. Award dangte banglou in hiai Award pen bel sum in leng zui hi. College Award teng lak a minthupi neipen leh a sangpen a kikoih chileng kigenkhial khollou ding hi, huaiziak in hiai Award tangkha-tu hih ding a utlou omlou hi. Hiai Award ahihleh “Preacher’s Award” ahi.

Ka ngaklah pen uh “Preacher’s Award” hon puangkhe petmahta ua, Award la ding in stage ah ka min hon sam uhi. Ka diip bang kisai zawt hial a, mipi’n khut beng zuau-zuau mai ua, kei leng kilawptak in stage kazuan toupah a, mipi mai ah Award kava la hi. Kong kum suklam in zaw ka manglam mah abang a, amhai a puk theihna hial ahi. Ka tutna mun ka zawt kiklai in lawmten honna chibai souhsouh mahle uh kei khasiatna in kaki dim a, pautheilou hial in ka om hi.

Ka kipatna ka etchiang in tuabang Award kei ding in manglam a mat khak leng ana hi ngeikei himhim hi. Pathian’ nasem dia sapna kazak ziak in Bible zilding in 2003 kum in kana kuan khia a, Haryana ah B.Th ka zil hi. B.Th ka zillai in thugenna di hun piak a ka omchiang in miteng ana awngzak sek uhi. Thugen siam honsak ziak ua ana phur uh hilou in, thugen thei mahmahlou khat ama ua minute bangzah hiam ka din ding pen amau nuamsa uh ana hilel uh ahi. 

Ka din pat tawh kiton in khutbeng tawh, hon nuihsan pawl toh…hu-lum deuh in hon welcome maimahsek uhi. Ka din touh tawh kiton in nui kawm in “kei bel maban ah worship leader ding kahi, thugen di kahi kei, thugen siamkei leng le poilou” ka chi masapen sek hi. Gen thei mahmahlou ka hihman in sawtlou sung in ka hun ka zousek hi. Tomchik kagen sung inle a tamzaw in siamlou honsak ziak un ana nuinui mai uhi.

Kei leng thugen siamloulua ka hihman in thugen lam a pailou a worship ministry lam a pai ding chouh kana ngaihtuahden mai hi. Ka College huang uh lian petmah a, nitaklam chiang in a daihna mun deuhte ah student-te thugen kizil zel uhi. Kei leh ka lawmpa khat leng a chang in ka kizil ua, ka lawmpa’n kei hon gensak in aman paudang in letzel hi. Huchi’n thugen leh paudang a leh ka kizilsek uhi.

College student 700 val khawng kahi ua, fellowship group tamtak in kaki khen uhi. Ka lawmpa’n a fellowship group ua thugenna hun atang chiang in ka kizil lai ua kei gente ana genzel ahihdan hon hilh sek hi. Huchi’n thugenna di hun atan nawn ma in thugen kizil din hon zawnsek a, ken genzel in aman letzel a, tua kagente aman ana chiamteh in a fellowship uah vagen sawnzel hi. Kei bel milak ah gen di thei hetlou in ka omzel hi.

Huchi’n kei leng Jammu & Kashmir leh Himachal Pradesh khawng a ministry ka paina khawng uah awl-awl in kong kizil a, ka thugen miten hon ngai ut panpan ta uhi. Pathian in hon zang in kisa khol hetlou a kagen hun in leng miten ngai ut thei mahmah uhi.

B.Th ka zawh in M.Div zildin Kerala ah ka kuansuk hi. Ka zilna College in Topical leh Textual Sermon-te sang in Expository Sermon mah pi bawl ua, kouleng hih theihtawp suah in ka kisin uhi. Graduate dek chiang in a graduate di teng thugenna hon kidemsak ua, Bachelor leh Master lak ah khat tuak Preacher’s Award sang ding in teel khezel uhi.

Ken le Bible kazil tuung a gentheilou pipi a mipi mai a maisanzen a kava gen sekte lak a khat “Jesun 5000 a vakna” kagen sam hi. Heututen sermon-te hoihtak in ana ngai ua, huai apan in Preacher’s Award sang ding teel khia uhi. Ka zilpih ka lawmte le siamthei mahmah uh a, kei pentak in hiai Award ka saan pen thillamdang ahi…

Graduate khit a ka lawmte tawh kaki khen nung un ka lawm khenkhatte Pastor bang in pang uh a, kaki hou khak chiang un “na thugen khatvei bek ngai utlai kahi, ka gam uah hong hoh in” chi in hon chialsek uhi. Ahihziak in sum-le-pai leh hun ka neihlouh ziak in utlaw mahleng hoh theihna ka nei vakkei hi.

Award theih gige nadi chi in sum hon zui pen behlapzek in thugenna adia phatuam di chi in kapa a di HMT sana leh kei adi Titan sana ka lei hi.

Kumkhat innlam a ka tawldam nung in ka zilna maban ka sunzom hi. M.Th ka zilna mun ah leng graduate di te lak ah thugensiam mi nga teelkhe nawn ua, tua lak ah numei thum leh pasal nih teel uhi. Kei leng tua lak ah ka tel kha nawn a, pasal nihte lah ah khat ka hi. Kou teng lawm man hon pia uhi.

Thugen thei mahmahlou a kipan Award hon sangsak Toupa thilhih lamdang petmah katuah kei a ding in iim-theih-vual in kakoih kei. Toupa’n leivui apan mihing a ut leh domsangthei mah ahi chih kei ah muhtheih hi. Kei hahpanna leh kuhkalna ziak hiam a hiai bang pahtawina sang le kahi kei. Amah ziak mahmah hi lel hi.

Toupa kiang ah ka thum chiang in “Great Preacher” hilou in “Effective Preacher” hon hisak in kana chizel hi. Kei thugen theilou, mite nuihsan leh chiamnuihna lel himahleng Toupa’n hon tawisangdan ka muhchiang in “Toupa kakipak” chihlouh gen di kathei kei.

Kei Toupa’n hon tawisang leh nang leng hon tawisangthei lawtel ahi. Toupa’n ahih theihlouh a om a hia…? Amah khut a iki piak leh Aman poimoh a sakdan a hon sek maizaw ana hi ahi.

(Pathian nasem di’n ka chin kei, bangmah ka hih theikei chi te adia phattuamna aom khak leh chi a hong kigelh ahi)

____________________________________________________

#  Na phattuampih leh midangte khualna in ana SHARE sawn in. 

# Article ki post chiang a nana muhzel na ding in hiai atung a taklampang a "Follow" kichi pen CLICK in.