CORONAVIRUS (COVID-19) leh BIAKINN KHAK

Gelhtu: LB Muan

Director, Rebuild And Restore

19^th March 2020

China gam a Wuhan kichihna mun a natna hong kipan CORONAVIRUS (COVID-19) in China gam a sukbuai ek nung in tu in khovel pumpi subuai ding dinmun ah omta hi. Khovel a ki-kawm tuahna leh sum kidawn tuahna a sukbuai ban ah mi tamtakte hinkhua su-nawngkai mahmah hi.

Hiai natna in malam a nawtzel ziak in India Solkar in mipi kipunkhawm nate sailou phot ding a ngetna abawl ban ah School khawng le kikhak phot hi. Huchi in mun khenkhat ah Biakinn khak phot hoihsa in Biakinn kikhak na leng om panpanta hi. Hiai bang dinmun ah ei gingtute adia theihtuak khenkhat i suutkhawm ding.

 

BIAKINN KHAK HIAL DING IHI HIAM?

Biakinn khak chih hial pen theihsiam huailou bang mahleh gingloute lak a omte ading in Biakinn khak pen pilvanna hoihtak hikha ding hi. Khristiante hihkhelh chang a, hon soiselna ding uleh hon soisakna ding uh zong den hindu kulmut om ahihman un Biakinn khak pen ahoih zawkna omkha ding hi. Biakinn a kikhawmte lak ah khat khawng in hiai natna veikha in kiloh sawn bang hita zenzen le...tuapen hon theikhe khale uh i omna gam pumpi a i Biakinn teng uh hon suksiatsak ut hial ding uh ahihdan haihvual hilou hi.

Khristian soisa ut te adin hiai pen suanlam hoihtak hongsuak ding a...“Khristiante ziak a hiai natna kithehdalh ahi” chi in leh i hihlouhna tantan ua hon ngoh in hon soisa ek kha ding uh chih lauhhuai lahlou ahi. Pathian min a thuakna zaw tuah ding mah ahi, i hinna le taan ngam ding mah ahi...huchi kawmkal ah ei pilvan louh ziak leh hai ziak a thuak khak theih ahi a, hai ziak a thuakpen Pathian kipahna hi khollou ding hi. Ei pilvan louh ziak a i gingtupih koi hiam a pilvangtak a om khinkhian te’n thuakloh thei ahihdan leng mangngilhlouh hoih ding hi.

Biakinn khak pen Pathian muanlouhna, ngaihlouhna, khamiit louhna leng hipahlou a hiai natna paisawn ding dalna ahihban ah Solkar in pan hichituk a alaklai a, eipen a thumanglou a i napan ding uh hilou hi.

Ginna i chih a zatna di mun a i zat chiang in Pathian vualzawlna thupitak donna hi a, himahleh a zatlouhna di mun a i zatchiang in zatkhelh theih hi. Ginna zatkhelh pen Pathian chou na suakthei hi. “Hiai natna apan Pathian in hon kembit thei ahi, lauh ding omlou, ei Pathian hing neite ihi, thum peuh leng” chi mawk a pilvanna ding kigente ah pilvanglou in omle hiai natna in hon paikan tuan hetlou ding hi. I mangngilh hetlou ding chu hiai ahi...en i hihtheih tan ihih nung a Pathian isap leh huai chiang a Pathian in athil hihtheihna hon sulang pan ahi. En ihih di hihlou a Pathian i ngak leh chikmah chiang a Pathian in hon panpih tuanlou ding ahi.

 

PATHIAN TEMPLE KOITAK A OM HIAM?

Ginglou te’n lampi kiang a abiakbuk khawng uh a totkhak chiang unle zahna pezel uhi. Gingloute hi in gingtute hitaleh i biakbuk ki ngaina chiat hi.

David in “Na biakin huang sung intual a ni-khat om tuh mundang a ni-sangkhat om sang in a hoihzaw ngala. Gitlouhna puan innte aom sang in Pathian inn a kongkhak ngak hih leng ka utzaw ahi” ana chi hi (Sam:84:10). David ngaihnat bang a Biakinn ngaina ihi mah di ua aw ahihkeileh kimuhkhawm, kipolhkhawm, lasakkhawm, kithuahkhawm chihte ngaina ihi zaw di ua aw...? Hiai leng suuttham ching hi.

Biakinn zaw ngaihnat luat ding mah ahi, Biakinn ngaina theiloute zaw a buaihuai lam hi ut mahmah uhi...ahia i theih ding chu David (Thukhunlui) hunlai leh Tuhun a Pathian Temple pen itheih kokalh khak ding lauhhuai hi.

Pathian Temple zaw nang leh kei ihi (1 Korinte 3:16-17). Jesu a hinna i neih ni apat Khasiangthou a namkip ihi a, Khasiangthou ei ah tengta hi (2 Korinte 1:21-22; Ephesate 1:13-14; 4:30). Ei a Pathian omlou a, Biakinn a Pathian om didan chouh a i ngaihtuah leh i Laisiangthou theihna dau lawlai chihna ahi.

 

BIAKNA DIKTAK BANG HI HIAM?

Biakna diktak zaw lungtang piakna ahi. Pathian in ei apan adeih pen i lungtang ahi. Sum-le-pai tampi thoh in, chiltui kaizen in Pathian phatna la sa in, aw heu zen a thugen in kikou mahle i lungtang Pathian i piak keileh zaw Pathian in “Kithoihna sang in thumanna a poimoh zaw” hon chihkhum maimah kha ding hi (1 Samuel 15:22). Toupa’n “Ka tapa, na lungtang hon pia in” achi hi (Paunakte 23:26).

Pathian pen biakinn chouh a biak didan a koihkha ihih leh khanglou nailou hikha ding ihi. Ei a Khasiangthou ompen hunteng, niteng, sun-le-zaan a lungkimsak pen biakna diktak hi ahi. I omna munmun ah, i tutna mun ah, i nasepna ah, i lupna ah...munteng ah Pathian tawh kithuah le tuapen Pathian deihdan hi ahi. I hih di khempeuh Pathian dong in Amah tawh hih khawmzel le tuapen Pathian kipahna ahi. Pathian in adeih i “Lungtang” ahi chih mangngilh kei ni. “Pathian zaw KHA ahi; a bemite’n KHA leh THUTAK a abiak ngeingei ding uh ahi...” (Johan 4:24).

I omna mun peuh a Pathian tawh kipawl a, Pathian biak det ding ahihdan phawklou a, Pathianni chiang chouh a Pathian i biaksawm ziak ua hichitel ihi di ua aw chihkhawng ngaihtuahna ah lian mahmah mai hi.

 

GINGTU DIKTAK leh GINGTU LEM HINKHUA

Gingtu diktak in niteng/hunteng in Pathian tawh hun zangkhawm den hi. Pathian tawh kipawl in kithuah den uhi. Pulpit/Biakinn leh gingtute kipolh khawmna munte kia ah khalam ann zonglou a, aom na mun ah Khalam ann nekdi tasamlou hi. Bible sim in Pathian aw ngaikhia a, a hinkhua Pathian ki makaihsak in Pathian chih dandan in kalsuan hi. A hinkhua ah Pathian a masapen leh a poimoh pen in koih a, a omna mun ah Khalam ann gilvahtak a nekding tamsam ngeilou hi.

Gingtu kibawltawm in bel mitamna, kithuah khawm, kipolh khawm, a huau-huau, ahi zua-zua chihte ngai na in nuamsa hi. Tuabang munte a mipi hu in azaap pen Khasiangthou polhna sasek hi. Huchi in amah chouh aom chiang in nguisuk pahzel a, Pathian tawh hun zatkhawm leh Pathian tawh kipolh nachang theilou hi. Pulpit leh gingtute kipolh khawmna munte chouh ah Khalam ann zong a, ama’ omna mun ah azon didan theilou hi. Gingtute kipolh khawmna ah a Khami pen bang in omsek mahleh a innsung, a sepna mun leh a khovel zatna ah Jesu mel kilanglou hi.

 

THUKHITNA

Hiai bang hun ah Solkar leh Doctor ten pilvan didan leh kikep didan agente uh lungsim ah koih in pilvan theihtawp ana suah in mimal a Pathian buanna hun in ana zang le hoih mahmah ding hi.

Hiai bang hun in i khalam dinmun etkikna hun leh Pathian naihsem nahun in zangle manpha kha mahmah ding hi. Hotdamna nei nailou ten Pathian zon hun a zang in, Piangthaksa ten khalam a bangtan a pichingta ihi a chih kiveel chetna hun in zang le chih deih huai mahmah mai hi.

Hun nanung a thiltung ding Bible a kigen kholte hong tangtung zel ahi a, Jesu mel i muhna ding sawt nawn hetlou ding ahihdan chiang petmahta hi. Eite hong la dia i Toupa zaw hong paidek petmah ahi ta, ki gingsa in om ni unau.

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.