Gelhtu: LB Muan
15/08/15
Nidanglai tawh teh in tulai khovel ah ei Pathian nasemte dinmun hoihzaw in khovel khawsakna ah leng nidanglai a Pathian nasemte sang in nuam kisa zaw hi. Khenkhatte bang private/government nasem tamtakte sang in khawvel khawsakna ah nuamsa zaw chihbang leng omthamta hi. Hichibang a Pathian in hon vualzawl a, hon dopsang lai in ei Pathian nasem kichiten Pathian hon deihdan leh lam-et natan ah i sem na hiam…i nasep ah Pathian a lungtung na hiam…Pathian in sem in hon chihna ah i sem hiam…sem in hon chihpentak semkha ihi na hiam chihte kivelthak tuak hi.
Ei-le-ei i kitheihna sang in Pathian in hon thei chiangzaw a, huchi in ei tawh kituak ding, i siam nalam leh siamlouh nalam, ihih theihte leh hih theihlouhte, i hoihna leh hoihlouhnate, nuam i sak leh haksa i sakte leng Pathian in thei hoih law mahmah hi. Huaiziakin Pathian in Amah nasem dia honsap in i sepna ding mun leh sepdi ageel kholhsa om hi. Pathian in ei sepdia ana geelkholh pen bel ei tawh kituak in hoihpen ding hi.
Pathian nasem dia kipia tamtakte’n Pathian in sem dia hon deih pen zong khelou in mission nasepna khatpouh ahihnakleh Pathian nasem a ki hikha vekmai chi-mawk uhi. Dikbel adik, Pathian nasem a ki hikha vekmai. Ahihziak in Ephesate 4:11 ah hichi in kigelh hi, “Huan, khenkhatte sawltak hi ding in, khenkhatte zawlnei hi ding in, khenkhatte Tanchinhoih gen ding in, khenkhatte Pastor hi dingin, khenkhat te thuhilh ding in apia hi.”
Pathian in sem dia hon deihpen semlou a, ei lunglutna leh nuam i saklam ana semsem ki hikha thei mawk hi. Pathian in honna geelsak louhpen sepkhak theihluat ana hi ahi. Gammial a Missionary thupitak dia Pathian in hon deihlai a gammial a haksa phutpeihlouh ziak a koi mun hiam a Pastor nasem aom leng tamkhop ki omkha maithei hi. Ahihkeileh Pathian in Pastor dia hon deihlai a Bible College asep nuam salua a Bible College a semsem leng ki omkha lawtel maithei hi.
Khenkhat lah heutu hih di chouh mitsuan a, office a tu kawm a sepchouh ut leng tamkhop ki omkha maithei hi. Pathian in koi hiam a honzat ut mahmahlai a ei heutu dinmun chouh delh a coat-le-necktie ok kawm a sepnate kia sem-ut a, phe-tettet leng ki hikha maimah thei hi. Pathian in bang pentak sem dia hondeih ahi hiam chih phawk khalou, ahihkeileh Pathian in sem dia hon deih pen thei nazenpi a ki-theih mawhbawl a politician-te mah banggawp leng Pathian nasemte lak ah hunkhop ki omkha maithei hi.
Khenkhat lah Organization kha-lawh tamna, facilities hoihna, security omna chihte chouh mitsuan leng ki om lawtel ding hi. Khalawh tawmna asem utlou tamkhop ki om ding hi. Khaloh bei a semdi bang tulai khovel ah omnawn vaklou hi. Nidanglai in mahni ki-chawm a Pathian nasem tampitak om ua, tulai khovel ah bel mahni ki-chawm naksang in khalawh tamna leh hamphatna di tamna mun kia en ngen kihi simta maimah hi.
Pathian in sem dia hon deih pentak leh sem in hon chihna mun mah asep kan ahoih omlou hi. Sawltak Paul in Gentelte lak asem dia sawl ahihdan kithei a, haksa mahleh Gentelte lak luh in zin kualkual mai hi. Tuamah bang in, Sawltak Peter in leng Judate lak asem dia Pathian in deih ahi chih thei in asih tanpha gin-omtak in sem hi.
Tulai khovel ah Pathian nasemte, i sepna di muntak ua sem khalou bangzah i om di ua…Degree neihsang mawk ziak a Pathian in hon chihlouhna mun a tukha leng kitam kha-maithei hi. Alehlam ah, Pathian in dinmun hoihzaw leh mitampite tung asem dia hon deihlai a chin zoulou kisa a, mahni chitlouhna chouh mu a, Pathian thilhihtheihna muang zoulou a, koi kawm hiam a kibu den leng ki om thepthup khading hi.
Khenkhat lah ji-le-ta, nu-le-pa leh innsung khawsaknate ngaihtuah ziak a Pathian deihna mun a kuanlou a, Jona bang a alehlam atai doidoi leng hunkhop ki om maithei hi. Tulai khovel ah Abraham bang a thumangtak a ginna tawh malam nawt a kalsuan Pathian nasemte lak ah kitam lawtel ding in gintak huailou hi.
Amun nuam-le-hoih, ahihkeileh gingtu tamna leh saptuam memberte a nopna mun, khawpi, deih-le-poimoh teng kimna mun, ahihkeileh sungkuante tawh kigam lalou a septheihna mun chihte kia a sem ut leng hun khop ki omkha ding hi. Akhen lah pilna-le-siamna neitawm lua kisa in khawpi leh mipil-misiam tamna huphulh a mawl chikchikte lak kia asem ut bang leng ki om lawtel ding hi.
Pathian in ma-phu ding in hon deih hia, ahihkeileh alai lak a malamte-le-nunglamte zawmtu ding in hon deih hia, ahihkeileh anung pen aom a, malamphute adia khuam khauh mahmah hi ding in hon deih hia…office a tu ding in hon deih hia, ahihkeileh gammial a kuamah kuan peihlouhna mun a vakuan ding in hon deih hia? Seplouh di pi semkha nilouh houh i hi hia…ngaihsut tuak ahi. Pathian mai ah sepna aneu-le-lian aom kei a, a hon muhdan kibang vek hi.
Pathian nasemte ki ngaihsun thak ni. Pathian in sem in hon chih pentak sem ihi hia? Om in hon chihna mun aom ihi hia? kuan in hon chihna mun mah a kuan ihi hia? Ahihkeileh, mahni utna mun asem a, mahni lunglutna lamlam leh nuam i sak peuh sem mawk ihi hia?
Pathian in sem dia hon deih pen semlou a, sem in hon chihna mun a i omlouh chiang in kipahna sang in dahna-le-buaina ding om utzaw hi. Jona bang a alehlam a kalsuan pen vangphat huailou ding hi.
Tomchik damsung a Pathian nasem dia kipekhe lawlaw i hihleh “om in” hon chihna ah om in, “sem in” hon chih pen mah sem ni…a huchih keileh a minpu lel a Pathian nasem hihkhak theih ahihban ah, Pathian mai a i din ni chiang in i gen ding omlou ding a, Pathian kipahna hih khalou kisuak ding hi!
Haksa
leh leng Toupa hon sawlna mah ah kalsuanzel in, mittui tawh pangtouzel ni. Sawt
nawnlou hial ding hi. Khatvei tei i sep gimgah i mu sam ding a, tua ni chiang
in kipahna mittui luangzawta ding hi.
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi pen CLICK in.
No comments:
Post a Comment