TUUNNU ITNA LIANZAW TAKTAK HIAM?

Gelhtu: LB Muan

10/10/13

Mi tampite'n ‘Nu’ itna tawh ‘Pa’ itna tehkak in ‘Nu’ itna lianzaw chisek uhi. I pian apat nute kepna i et vengveng chiang in nute itna lianzaw ding in ki gingta sek hi. Tuunnu itna lianzaw mah hiam chih suutkhawm ni.

 

(1) Tuunnu in kha 9/10 sung vel agil sung a honpaai ziak leh a nawitui ahon vak ziak in maw tuunnu itna lianzaw ichih?

 

*Tua tuunnu gilsung a i omlai a tuunnu sepgim ding phallou a, nagimhuai leh haksa teng ana sem i zuapa itna neuzaw ahi tuan diam?

 

(2) Tuunnu in i neulai in i zun-le-ek siak a hon keptouh ziak in maw tuunnu itna lianzaw ichih?

 

*I tawndan ah naungek kep leh innsungna pen numeite sepding in kikoih tangpi hi, pasal in nagum leh pawlamna sem tangpi hi...tuunnu in hun tamzaw a hon kep ziak in zuapa itna neuzaw ahi tuan diam?

 

(3) Damlouh hun a tuunnu in “bawi bangchi e, damdawi ne in aw” hon chihpah tiau-tiau ziak in maw tuunnu itna lianzaw ichih?

 

*Tuahun a damdawi zong dia munteng vatung a, mi kiang a sum valei-tawi a, damdawi lei khit a innlam kintak a hon delh lop-lop i zuapa itna neuzaw ahi tuan diam?

 

(4) Zan chiang in tuunnu in lai hon simpih a, hon awi ihmu a, hon sial khit chiang in nadang sem panzel hi. Tua ziak in maw tuunnu itna lianzaw ichih?

 

*Zuapa sun nitum a nasepna tawl leh gim kisa a, nitak chia ei hon buaipih zawh nawnlouh ziak in zuapa itna neuzaw ahi tuan diam?

 

(5) Meh duhlou chi a iphun ding leh ann tampi i neklouh khak ding alauh ziak a i duhduh hon huan sak ziak in maw tuunnu itna lianzaw ichih?

*Tua buh-le-meh nekding ngaihtuah i zuapa itna neuzaw ahi tuan diam?

 

(6) Banghiam ihih khelh hun a tuunnu’n “bawi hichi ding hilou ahi, tuban hichi nawn ken aw” hon chi a, nemtak ahon thuhilh tiau-tiau ziak in maw tuunnu itna lianzaw ichih?

 

*Zuapa'n i hoih ding a deih ziak in honsat in honsawi a...kam nemlua in tuunnu bang in honhilh thei khollou hi. Zuapa’n hon thuhilh tiau-tiau theihlouh man a zuapa itna neuzaw ahi tuan diam?

 

(7) School i kai ding chiang in tuunnu’n hon kha a, i tawp ma in gate a nisa nuai ah kho-ul kai niu-niau in honna ngak a, ahon muh in hon kawi in “bawi tuni na school ah thu nava mang na maw?” honchi in inn hon zawtpih a, inn i tun chiang in nekding leh dawn ding limtak hon bawlsak ziak in maw tuunnu itna lianzaw ichih?

 

*Suun nitum a nisa leh vuah thuak a, kagim leng chilou a, damlouh hun ale tawldam ngamlou a ei hon khualna ziak a semgim i zuapa itna neuzaw ahi tuan diam?

 

(8) Lai i hon sim a, i hong piching a, maban zil di in mundang a paikhe din i hong kisa a, tua hun a hon itluat man a tuunnu’n mittui anul ziak in maw tuunnu itna lianzaw ichih?

 

*Lai i siamna ding leh mihing khat i suahtheihna dia gim-le-tawl khawksalou a guhtui kangzen a ana pang i zuapa’n, mittui nul pasal huai kei chi a nui siau-siau ahon khakkhiak ziak in i zuapa itna neuzaw ahi tuan diam?

 

(9) Mundang ah i om a, damlouh hi-taan i tuah hun in tuunnu om theilou in kapkawm a hon houpih ziak in maw tuunnu itna lianzaw ichih?

 

*Tua hun a “kata bang achi de aw” chi a lungkhamtak aom a, i ki-etkol nadi sum honkhak di zong a mite nuai a vakuun i zuapa itna neuzaw ahi tuan diam?

 

(10) Banghiam lawhchin hun a “bawi nahih hoihlua” chi a honphat a, innkiim-innkiangte samkhawm a “Toupa kiang ah kipahthu genni” chi a tuunnu kipahdan asiam ziak in maw tuunnu itna lianzaw ichih?

 

*I lohchin hun a “kasep gimgah ka muta” chi a lungsim a kipahna mittui ana nul i zuapa itna neuzaw ahi tuan diam?

 

THUKHITNA

Mi tampite'n tuunnu itna gen thupilua in zuapa’n itna neilou mah bangsak uhi. Hoihtak in suut vengveng le TUUNNU ITNA LIANZAW KICHI NGAM KHOLLOU DING AHI.

 

# Pasalte banglam peuh (taksa-le-lungsim ngaihtuahna) ah khauhdeuh ding a siam ahi. Numeite ahihleh Pasal apan lakkhiak ahihban uah panpihtu ding a siam ahihman un banglam peuh (taksa-le-lungsim ngaihtuahna) ah pasal sang in neem zawdeuh uh a, khase baih in a mittui uh leng daideuh hi. Pasalte'n bel haksa leng thuak zouzaw in lungkhamna tawpkhawk ah leng mittui mawk-nuul lou uhi. Hiai khong i etkhawm chiang in numeite'n itna lianzaw nei chih pen dikdia gintak haksa hi.

 

# Numeite ahihleh tate hanthawn (comfort/encourage) ding lampang deuh a siam hi uh a, pasalte bel tate tai-hilh (discipline) ding lampang deuh a siam ahi uhi. Tua nu-le-pa in amohpuakna uh ahon sepsuah chiang un tate ading in pate sawina theihsiam hak in na deuh hi. Tuaziak in mi tamtakte'n “Tuunnu itna lianzaw” chimawk uhi. Hiai bangtan in adik dia? Ngaihdan diklou ahi chileng genkhial kei ni.

 

# Bible tangkhat chouh la-lou in apumpi i hon etchiang in Nute itna leh Pate itna kigelh tuaktuak hi. Nute itna a kigelhdan pen tate khotuah, kem leh hanthawn lampang deuh in kigelh a, Pate itna pen tate taihilh, sawi leh gawt lampang in kigelh hi. Pate pen tate taihilh ding a thupiak ahi uhi. Pa in ta a it leh sawi mah hi. Bible in chiangtak in “Nute itna lianzaw” achih lam kimulou hi.

 

# Naukep leh innsung nasep pen koimun peuh ah numeite hih ding in kikoih tangpi a, huaiziak in i neu apat i nu tetawh hun tamzaw kizang kha hi. I nute kiang a i om mun zawk ziak in nute itna lianzaw dan in kithei a “Tuunnu itna lianzaw” kichi mawk hi. Hiai pen ei lungsim apan a pawt ahi lel hi. Ngaihtuah hoih a i suut detdet nung in “Tuunnu itna lianzaw” kichi ngam nonlou ding hi.  

“TUUNNU  ITNA  LIANZAW ahihkeh ZUAPA  ITNA  LIANZAW ahihkeileh TUUN LEH ZUA IN HON ITDAN UH KIBANG” chih midangte gente mawk gintak mailou in, suut detdet ni...!

Kuapen itna lianzaw hiam chih lam ngaihtuah sang in hon it petmah Tuun-le-Zuate kipahna leh lungsim nopna ding ngaihtuah a khamuangtak a omsak pen pil huai zaw khading hi!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.