KIPAH DI AHI ZAW!

Gelhtu: LB Muan

24/10/13

Khovel ah lungzuanna, gentheihna, damlouhna, khawsakna a gim-le-tawl nate i hon tuahchiang in ki-ngaisia in Pathian’ tung nasan ah leng ki-khase deksek hi. Ahihziak in hiaite tuak theilai a om ihih bang leng kipahna di ana hizaw maimah hidan ahi.

 

LUNGZUANG THEILAI IHIH LEH KIPAHNA DI AHI ZAW.

Hun mualliamsa a sungkuante tawh kimlai nite, zawlluite leh lawmgualte tawh hunnuam zatkhawm lai nite, school kailai nite ngai a achang a lungzuangtak a omtheilai ihih leh a hoihlou hilou in a hoihlam hizaw ahi, mibatna (normal) khat ahi.

Khapi-vak in i lungsim nousak theilai a, mittui-nul theilai ihih leh kipahna ding ana hizaw ahi…mi khenkhatten mibatlouhna sa in ki-ngaihsiatna ding in la mahle uh hiai pen mibatna leh normal lai ihi chih chetna khat ahi a, kipah nadi ana hizaw ahi.

Lunglengthei nawnlou, khapi-vak inle lungsim agen nei nawnlou, hunlui ngai a lungzuang vungvung chih le om nawnlou, nu leh pa le ngai vungvung nawn khollou, lawm luite le phawkkha nawnlou, neulai a school kailaite leng ngaithei nawnlou a om ihih leh normal life a hing kihi nawnlou in ei ah adiklou khat omta chihna ahi. Hinkhua a haksa tamtak i na palkhak ziak a i lungsim khauh/taak gawp a lungzuangthei nawnlou ihi khading…tuaziak in lungsim nousak a hihhalhthak hun leng aom ngai ahi. A huchih kei leh lungsim veng chiahlou a damsung zat mawktheih hi ahi.

Hichibang a lungzuang thei nawnlou, ahih keileh lungsim su-khauh a lungzuang dia le kiphal nawnlou ten mi itna leng neitawm mahmah uh a, pil mahmah napi a mibat (normal) louhna khat neita uh chihna ahi. Tuaziak in lungzuangtak a om gige pen hoihkei mahleh achang a lungzuantheih pen a hoihlam ana hizaw ahi.

 

I GENTHEIHNA/HAKSATNA GENKHE THEILAI IHIH LEH KIPAHNA DI AHI ZAW.

Haksatna leh gentheihna tuah bel thilnuam hi hetlou hi. Haksatna tuak hetlou a hinkhua zattheih ding ana hileh kuamah haksatna tawh hinkhua zang ut ki om ding in agintak-huai kei. Mihing haksatna neilou ki omlou a, nuamsa mahmah dia i gintakte bang in ei sang a haksatna ana hauzawsek uhi.

Haksatna leh gentheihna i tuah hun a, kam a genkhe theilai ihih leh kipahna ding hizaw ahi. Kam a igen theihlai sungteng bel haksatna/gentheihna taktak ana hi nailou lai ahi. Haksatna/gentheihna tawpkhawk i tuah chiang in bel kam in genkhethei nawmlou hi. Huaiziak in i kam in gentheihna, haksatna, lunggimna, mangbatnate agen theihlai sungteng haksatna taktak/tawpkhawk hi-nailou ahi chih phawk in kipak zaw ni…kipahna ding ana hizaw ahi.

 

DAMLOU A, ‘A-NA’ PHAWKLAI IHIH LEH KIPAHNA DI AHI ZAW.

Damlouhna anuam aom kei. Hi-tang, lu-na i chihte maimai leng athuak nuam hetlou hi. Damlouhna aneu/alian athuak-nop omlou a, ahihziak in athuak-hak diak chih bel ana om mah hi. Damlouh hun a ‘a-na’ chitheilai a, gim kisa theilai a om ihih leh ahoihlai hizaw ahi chi in kipak zaw ni…mi tamtak ‘a-na’ ‘a gimhuai’ chih leng phawk nawnlou a lupna tung a singbul bangmai a lum leng tamtak om ahi.

‘Ana’ thuak chih kitheilai a, genkhethei a, dam khiak nadi lam-etna neitheilai ihih leh kipahna ding ana hizaw ahi.

 

GIM-LE-TAWL THEILAI IHIH LEH KIPAHNA DI AHI ZAW.

Laizilna, nekzonna, innsung khawsakna, khovel na leh Pathian nasepna adia gim-le-tawl theilai ihih leh kipahna ding ana hizaw ahi. Zil zoulai, sem theilai, khawsa theilai, ngaihtuah theilai, hatlai ihi chihna ahi a, kipahna ding hizaw ahi. Lupna tung ngak a mite’ sepsa, kepsa, khawtuahsa a damsung zattheih ahihlai a, semgim leh tawlthei a om  ihih lai leh kipak a Pathian min pahtawi zawk ding ahi.

Pathian in khovel ahamsiatsa ah kho-ul kai niu-niau a semgim ding mah ihi chih phawk in i laizilna, innsung khawsakna, nekzonna leh Pathian gam nasepna ah nasatak in pang zaw ni!

 

THUKHITNA

Toupa ah kipak gige un, ka chi nawn ding hi, kipak un (Phil. 4:4)

Bangkim ah kipahthu gen gige un; huai tuh noumau lam thu ah Khris Jesu ah Pathian deihlam ahi ngal a (Thess. 5:18)

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.