KHRISTIAN leh HOMOSEXUALITY

Gelhtu: LB Muan M.Th in Counselling.

Tumlam gamte hu in honzaap phei in India inle hiai “Homosexuality” hon legalize-ta maimah hi. Hiai Homosexuality i chih setan vanzatte lak a thupi mahmah khat ahihman in ei gingtute adin patauhna ding tamtak om hi…

Mundang, zatdang leh sahkhaw dangte lak kia a thiltung hinawn talou a eilak mahmah a le hichibang om lawthamta ahihman in lungziin huai petmah khat suakta hi. Ei innsung mahmah ah leng hongluut khinta hikhathei ahihman in pan i lak didan i theihna din hiai Homosexuality toh kisai tamlou suutkhawm zual ni.

1. MI HOMOSEXUAL  HONGSUAH DAN

Mi Homosexual hong suahna ziak uh kibang vek kei mahleh ataangpite I suut ding.

a)      NU-LE-PATE ZIAK

(Nute hihkhelh ziak)

Nu khenkhat pasal bang in khauh mahmah uhi. Hichibang ‘Nu’ thutheilua ten ata pasalte uh pasal ahihna bang ua ahong om di uleh thupukna a kilak di uh leng phallou uhi. Hichibang ‘Nu’ in atapa pen tanu (numei) bang in enkol a, a tapa hih peuhmah soisel in “Pasal le na hi kei, na thilhihdan mawngmawng le numei na ka” chihdan kampau khawng zatkhum sek hi. Hichibang ‘Nu’ thuneihna nuai a khangkhia pasal khenkhat ngaihtuahna hongbuai in numei hin bang in honghing khong ua, numei ngaihtuahna bang ngaihtuahna hon neikhong uhi.

(Pate hihkhelh ziak)

Pa khenkhat tapa deih mahmah in tanu hon neih khak chiang in a tanu pen aneu apat tapa etkol in enkol khaden hi. Huchi in atanu pen pasal bang a zangtou in a numei hihna pen ngaihdausak kha hi. Huchibang dinmun a ana omkha numei khenkhatte Lesbian hongsuak uhi.

(Nu/pa hihkhelh ziak)

Ta khenkhat in aneih uh kibatpih a nu/pa (same-sex parent) pen in aneu apat ana ngaihsak louhziak in pampaih kisakna leh ki-ngaihsiatna in kidim hi. Aneih kibatpih a nu/pa pen kepna leh iitna ngahloulua kisak ziak in alungsim na mahmah hi. Aneih kibatpih a nu/pa iitna leh kepna pen alunggulhna lian mahleh alunggulh mulou ahihman in aneih kibatpih lawm-le-vualte lak ah tuabang iitna leh kepna hon zong maimah hi. Huchia aneih kibatpih kuahiam in a nu/pa mun aluah zawh zenzen leh alunggulhna pen taksa utna lam ah lehpai khathei in huchi’n Homosexual hongsuak thei hi.

 

b)     LAWM THUAHTE ZIAK

(Neulai a lawm polhte ziak)

Mi khenkhatte aneulai un aneih uh kibatpihlouh ngen lawm thuah uhi (numei in pasal ngen thuah, ahihkeileh pasal in numei ngen thuah). Huchibang lak a kuahiam ahong omtouh det chiang in alungsim ah ahihna tak pen hong kithei buaigawp in atawp chiang in Homosexual hongsuak maimah hi.

(Khangdawng hun a lawmte pampaih ziak)

Neih kibatpih nu/pa (same-sex parent) ngaihsaklouh kuahiam in a khangdawnglai hun in a nu/pa apat a muhlouh iitna leh kepna pen alawm thuahte lak ah honzongta hi. Aneih kibatpih kuahiam apat alunggulh amuh leh Homosexual hongsuak thei mawk hi (atung a ‘NU/PA HIHKHELH ZIAK’ I gen pen ahi). Alehlam ah aneih kibatpih lawmthuah ten le aneih kibatpih a nu/pa hiam ngaihsaklouh dan leh iitlouh dan a ana ngaihsaklouh ua ana nawlkhin chiang un ki-ngaisia in ‘kei ah asam khat om hiding ahi, ka neih kibatpih ka nu/pa leh ka neih kibatpih lawm ten hon nawlkhin na ziak uh om hiding ahi’ chi in alungsim hongbuai thei a, huchin atawp in ahihna tanpha hon nawlkhin in Homosexual mah hongsuak hi.

(Khangdawng lai a thilthak theih ut ziak)

Khangdawng hun bel thilthak peuhmah theih ut hun leh chep ut hunlaitak ahi. Hiaibang hun in mi khenkhat aneih kibatpih lawmte tawh thil theih ut ziak in kitawpkha hiam ahihkeileh hihlouhdi pi vahih kha in hong zongsang uhi, huchi in Homosexual hongsuak maimah uhi.

 

c)      BAWLSIAT A OM KHAK ZIAK

(naupanlai a bawlsiatna tuah ziak)

Naupanlai a sang a upa zaw neih kibatpihten thagum a ana kipolhpih khakte uh leng Homosexual hongsuak thei uhi. Huchibang a sang a upa zawte bawlsiatna tuak naupangten alungsim uah ‘kei ah tuamna aom ziak a hon hichih uh ahi di, kei Homosexual kahi a hinteh' chi in alungsim uh hong buaigawp thei hi. Hichibang tuak naupangte Homosexual hongsuak thei uhi.

Huai ban ah neih kibatpihten thagum a aki polhpihlai ua neuchik nop asak/atheih khak pen uh ziak in hong zongsang theimawk ua, huchi in Homosexual hongsuak thei uhi.

(Tuailai hun a bawlsiatna tuah ziak)

Nungak dek kuan a thagum a pawngsual tuakkha numei khenkhatten pasalte muangzou nawnlou in leh pasal himhim huat-a-huat thohgawp in aneih uh kibatpih numei ah alungsim uh piak sawm daih uhi. Huchi in numei ah ataksa utna uh hihpichin sawm in Homosexual hongsuak uhi. Nungak a tangval iit mahmah toh kikhenkha khenkhat leng lungsim natluat ziak in pasal a lunggulhna pen numei ah heikhiak sawm in atawp in homosexual hongsuak maisek uhi.

 

2. HOMOSEXUAL-TE BUAINA

Homosexualten banglampeuh ah buaina leh haksatna tuak uhi. Innkuan mite leh khotaang apan tuam koihna atuah ban uah Christian leh gingloute apan leng muhdahna leh nelhsiahna tampitak tuak uhi. Huaite kia hilou in mimal tak in leng haksatna tamkhop tuak uh a, tuate tamlou hiai ah I suut ding.

a)      TAKSA LAM AH

Homosexual khat in hichi in gen hi, “Khamtheih ka hih…khamtheih hih keileng bangchi in ka thilhih ka hihthei mahmah dia?” Homosexual-te khamtheih ah kibual nasa petmah uhi. Ahindan uh dik leh nuam ahi chi a amau leh amau a kikhem theihna ding un khamtheih hih uhi. A thawmhauna uh beisaktu ding leh athilhih uh hoihdan a aki muhtheihna ding un khamtheih ah kibual uhi.

Homosexual-te khamtheih kia a kibuallou in sex leng hih nasa mahmah uhi. Mikhat chouh toh kipawllou in mi tampitak toh kipawl ahih ban uah kipolhdan chituamtuamte a kipawl ahih man un natna chituamtuam Hepatitis B, anal warts, herpes, gonorrhea, syphilis, shigellosis, AIDS leh adangdang kilawh sawn uh a, natna lauhhuai taktakte vei uhi.

b)     LUNGSIM LAM AH

Homosexual-te lak ah ki-ngaihsiatna, khial kisakna, kithikna (Lesbiante lak ah uang mahmah), thawmhauna I chihte nasa mahmah hi. Homosexuality in kipahna sang in lunggimna tunzaw a, hun tampi ah thawmhau in ki-ngaisia sek uhi. Ahinkhua uh ninhuai leh thawmhau huai asak ziak un Homosexual tampitak ten sih lunggulh in ahinna uh ana la sek uhi.

c)      KHALAM AH

Homosexual-te bel Pathian apat gamla mahmah uh chihna himai hi. Pathianhing gingta tatak mi in bel Homosexuality mawhpaih ding hi. Pathian deihlouh dan hih a Jesu lam zuan loute ading in hotdamna leh lungnopna omlou ahihman in Homosexual ten kipahna leh lungnopna chiamkha ngeilou uhi. Salam kia a gentheilou in khalam ahle dangtaak mahmah uhi. Ahihziak in Pathian beel ut tuanlou ahih man un khovel hinkhua ah genthei mahmah uh a, sih ma a meidil chiamlawk suak uhi.

 

3. HOMOSEXUALITY TOH KISAI A GINDANTE

Mi tamtakten Homosexuality tawh kisai a gindan diklou hunkhop nei ahihman un tuate tamlou I genchiang ding.

a)      HOMOSEXUAL  HIMHIM A PIANG

Pathian in Adam abawl in numei (Eve) lunggulh ding in bawl a, Eve abawl in pasal (Adam) lunggulhthei ding in bawl hi. Pathian in numei abawl na ziaktak bel ‘pasal’ amah kia a bukimlou ahihziak ahi, huchi in numei leng amah kia in bukimlou a, numei leh pasal hong kigawm chiang un bukim hong hithei pan uhi. Pathian in Adam adin pasal mah ana bawllou ahihman in pasal leh pasal hiam ahihkeileh numei leh numei kigawm mawk pen mibatlouhna khat ahi.

Pathian in Adam leh Eve kiang a athupiak bel tate suang a khovel luahdim ding chih ahi. Numei leh pasal kigawm a ta neih pen Pathian deihdan leh thupiak ahi. Pasal leh pasal, numei leh numei kigawm in omzia omlou a, Pathian in tate suang a khovel luahdim dia hon thupiak pen chikmah a su-tangtung theilou ding chihna suak hi. Huaiziak in Pathian in hichibang Lesbian/Gay dia honsiam kihi zenzen lou ahi. Mi khenkhat pianken a Lesbian/Gay dan a I koih pen gindan diklou ahi a, I ngaihtuahna hon subuaitu dia setan in hiai gindan hon neihsak ahi. Mi apian nung a ahihna a kitheihkhelh ziak a lesbian/gay hipan lel uh ahi.

b)     HOMOSEXUAL-TE KIKHENG THEILOU

Mi tamtakten Homosexual-te kikheng theilou ua adamsung ua homosexual hiden ding uh ahi chih gindan nei uhi. Hiai pen gindan diklou ahi. Homosexual-te Heterosexual hong hithei nawn lawtham uh ahi, ahihziak in baihsamtak a khektheih bel ahi kei uh. Homosexual-te Heterosexual ahong suahkik nading un Counselling hoihtak leh Therapy apply ngai a, tua pen Counsellor hiai lam tawh kisai biik a siamna neite chouh hihtheih ahi. Huaiziak in Homosexual-te hong kikhek theihna ding un Counsellor panpihna poimoh uhi.

Hichibangte kikhekna dia therapy poimoh ahihman in Counsellor-te panpihna lak ding ahi. Counsellor in salam kia a kikhekna hilou in khalam leng hon buaipih ding a, kha leh sa a kikhekna hong om theihna ding in Jesu khebul leng hon tunpih ding uh a, mithak kisuak ding hi.

Homosexual tamtakten kikhek sawm vetlou in azahmoh uh khek zawdaih uhi. Doctor siamte panpihna la in pasal in azahmoh pen numeite abang in bawlsak a, numei in azahmoh pen pasal adan in Doctor-te bawlsak hi.

c)      HOMOSEXUAL-TE LE VANGAM KAI DING

Sawltak Paul in Bible ah chiangtak in genkhinta hi. Vangam ah Homosexual-te ading in mun omlou hi. Mi kuahiam in ‘Piangthak kahi a, Homosexual leng kahi’ achih leh bel zuaugen chihna ahi. Christian diktak Homosexual omthei mawklou ding hi. Mahni hihna leh dinmun kithei chiangten Jesu kiang zuanthei uh a, huchi in hotdam in om uhi. Piangthak I chihte mahni hihna kitheite ahi. Homosexual I chihte bel mahni hihna kitheiloute ahi uhi. Mahni hihna kitheiloute bangchi in hotdam ahi thei mahmah di ua? Homosexuality I chih khelhna thupi mahmah ahi. Hiaibang khelhna thupi a saltang laite bangchi in hotdam I chithei mahmah dia?

d)     HOMOSEXUAL-TE LE EI BANGBANG AHI UH

Homosexual tele ei bangbang ahi uh chih pen zuau ahi. Lesbian/Gay I chihte mibanglou ahi uh. Mi bang hile uh amau zahmoh neih kibatpih tawh kipolh lunggulhlou himhim ding uh ahi. Pathian in pasal adin numei siam a, numei leh pasal kilunggulh tuahna honpiak lai in pasal in pasal mah lunggulh a, numei in numei mah va lunggulh teitei chihpen bel mibatlouhna hi taktak mah hi. Huaiziak in Homosexual-te pen ei bangbang dan a I koih a, I ngaihzam mawk aleh Pathian mai a khial kihi mai ahi.

 

THUKHITNA

‘Kuapeuh numei khelhpih utna tawh en tuh, alungsim in ang-a-kawm khinta’ chih Jesun ana gen hi. Pathian in numei leh pasalkal a thangtatna ana ngaikhawk mahmah hi. Taksa a kipolh ma a ngaihtuahna maimai ale khialkhin in honkoih hial hi. Numei leh Pasal kal le Pathian in hichitel a ngaikhawk ahihleh pasal-toh-pasal (gay) kal leh numei-toh-numei (lesbian) kal anak ngaihkhawk mah di chih theihtheih hi.

            Angkawmna tawh kisai a Israel tate kiang a thupiak bel denlup ding chih hitop mai hi. Pathian in numei leh pasal kal a thangtatna sang in Pasal leh pasal, numei leh numei kal a thangtatna ana ngaikhawk zawlai hi. Etsakna hoih mahmah khat bel Sodom leh Gomora ahi. Sodom leh Gomora ah hichibang taw-kaw-huuk (homosexual) te teeng uhi, huaiziak a Pathian in Sodom leh Gomora ahihsiat ahi. Tulai saptuam dan a angkawmte daanpua a koih ahih uleh Lesbian leh Gay daansung ah bang chidan in I koih thei mahmah dia…Pathian in lah a ngaikhawk petmah ngal a…

SIMTUTE…Homosexual I hih khak zenzen leh hun I neih lai in Pathian kiang zuanpah ni…Homosexual lawm neaten le, I lawmte Pathian kiang zotpih sawm chiat ni!

Pathiantate I hihman in salam leh khalam ah siangthou sawm ni. Mite gen leh TV khong a I muh hinawnlou in eite lak mahmah ale hichibang khelhna omta ahi. Homosexual bangzah eite lak ah omta hiam chih I theikei, ngaihtuah inle I nei ngeikei…Pathian in ngaikhawk petmah ahihman in enle ngaikhawk in Pathian’ sianthou bang in sianthou sawm ni.

Pathian in pasal a honsiam leh pasal I himai a, numei a honsiam leh numei himai ihi. Pathian in honsiam nung a en I hihna di vateel theih himawklou ahi.

 

Leviticus 18:22; Leviticus 20:13; Romans 1:18-32; 1 Corinthians 6:9-10; 1 Timothy. 1:9-10

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.