KHRISTIAN leh COSMETICS, KHAMTHEIH, TATTOO, TAKSA SIANGTHOUNA

Gelhtu: LB Muan

26/09/13

Eden huan ah pan le, Adam leh Evi-te atatkhelh ma un a taksa uleh a chii/vun uh hoih mahmah ding in gintak-huai hi. Tuahun in natna sunglam-le-pawlam apat piang nailou a, nek-le-taak hoih in kholum-le-khovot ki balance tak nuai a khawsa ahihman un a complexion uh hoih ding a, a taksa uh leng hat in amel uhle etlawm mahmah ding in gintak-huai hi.

Amau’ khovel tawh ei khovel ki-danglam lawta ahihman in mihing in siatlam ki-manawh hiaihiai hi. I nek-le-dawnte le lim nawnlou leh hoih nawnlou, kholum-le-khovot leng ki balance nawnlou, natna lah ki-behlap deuhdeuh...hichi lak a khawsa i hihtak man un i damtheihnate dengdel gawp a, i mel-le-puamte leng hoih nawnlou in vulpahta mai hi. Tua kia hilou in i taksa leng ahat di bangtak in hatzou nawnlou in ki-bahse pahpah a, kumtam le kidam nawnlou hi. I hoihna ding leh damna ding in bang chi a panlak ding ahi ta dia le...?

 

KHRISTIAN leh COSMETICS

Khovot leh sat dante adikzou nawnlouh ban ah i damtheihnate ahoih nawnlouh man in i taksa te ahat di bangtak in hat nawnlou a, i chii/vunte leng hul, khi, dup, mual in vuai baih hi. Huaiziak in mi tamtakten Cosmetic tuamtuamte zang in chii (vun) te bawlhoih kisawm a, sum tampitak khawng kisengsek hi. Numei hi in Pasal hitaleh cosmetic ki poimoh chiat hi. A khenten taksa bawlhoih sawm khollou in a om dandan leh siat dandan in koih mawk uh a, huai ding ana hiloudan ahi. Kikepdi mah ahi. Pathian Temple i hihman in Pathian inle i kikep hoih deih hi ahi. I taksa pum (sunglam-le-pawlam) a siangthou a, i hoihsem nadia zattheihtheih zat a kikep bel Pathian deihdan ahi. Ahihziak in aleklua (i taksa/chii adia poimohlou tan) bel diklouzel hi.

Mi khenkhatten complexion hoihna di chi in Doctor-te gen leng hilou in neklouh di leh hihlouh di tan hih leng omzel hi. Huaite bel khelhna thupitak ahi. A khenten ki-sukkhak ziak le hilou a hoihsem utna ziak in plastic surgery khawng bawl ua, khenkhatten lah vuai baihlouh nadi chi in vun a kikap (botox injection) leh thil dangdang hih uhi...tuate bel Pathian deihdan ahi kei hi. Pathian deihdantan phawk a, mite mitmuh a kilawmtan leh mahni adia ahoihtan a kikep ding ahi. Tuaban ah, Cosmetic leh taksa kikepna ah sum-le-pai zatdan huntawk leng theih ding ahi.

 

KHRISTIAN leh KHAMTHEIH

Mi tamtakten a taksa un siatlam ma-nawh ahi chih theizen napi inle khamtheih hih tawp tuanlou uhi. Ahihlouten le khamtheih hoihlouhdan theizen napi in hihsawm in a kizil bang om zawmahlai hi. Khenkhat lah bangmah hihlou chi a siangthou kisalua in banghiam bek hih cheuh sawm teitei chih bang om thepthup zel hi. Veng-hai achihte uh zaw kihikha maithei! Mi khenkhatten kam a guantheih cheuhcheuhte asia leh khelhna a simlou, a cover-te ah bang kigelh hiam chih simle chiang mahmah ding hi! Pathian in khamtheih a itaksa suksiat di phallou ahi chih hiai 1 Cor.3:16-17 ah chiangtak in muhtheih hi.

Khovel ahoih nawnlouh man in khamtheih hihlou a siangthoutak a i-om leh leng i taksa damtheihna dengdel petmah a, mel-le-puam hoihna le kiam deuhdeuh hi. Hilehle eiten siatna hontun hiaite ana ki ngaikhawk khollou hi.  

Khamtheih leh thil hoihlou hih apan tawp nadin bel mahni in thupukna kilak a, Toupa hatna muang a “sih-le-sih” chi a pan louh alampi dang omlou hi, mi panpihna ziaka khamtheih hih apan tawp ding chih zaw thil baih hi khollou hi.

 

KHRISTIAN leh TATTOO

“Taksa tung a TATTOO neih ei Khristiante adin adik diam?” chih tamtakte buaina ahi. Khristian numei-le-pasal tamtakten TATTOO kicheina, ki-hoihsakna leh ki-paa sakna in kizang mawk hi. Akhen in “hiai TATTOO in bangmah sia hontun kei” chi in i kisiamtan maimahlai uhi. Akhen in lah “hiai kei taksa tung a om ahi, ka taksa tung ka thuthu” chi leng ki om hi...Bangteng hileh ei ngaihdan a nungta theite i hi nawn kei, Jesu Khris sisan a leisa-te i hi. Nang ngaihdan, kei ngaihdan hilou in Pathian gen pen zuih ding ahi!

TATTOO Khristiante adi hi mawngmawnglou hi. TATTOO tawh kisai a thupiak khauh takmai Pathian apan i mu (Lev.19:28). TATTOO a sekei chilailai di i hi diam? Pathian Temple i hi, ahih leh Pathian Temple ah mi-lem, ganhing-lem, dawi-lem, lu-guh-lem, gul-lem, sikha-lem kigelh belbual di mah ahi diam? I taksa tung ah huchibang kigelh belbual ahihleh Setan Temple houh hikha i hizaw maimah diam? Ngaihtuah tham ching hi. Pathian Temple i hihleh i sunglam-le-pawlam a siangthou ding ahi!

 

KHRISTIAN leh TAKSA SIANGTHOUNA

Setan in mihingte hon pumluah ut in khalam hi in salam hileh a niin theitawp a i om deih hi. Etsakna hoih pen bel Vaite Sadute (siampute) ahi. Vaite siampute khalam thutuam in koih phot le, a salam uhle a ngaihna omlou uhi. A sam khawng uh niin petmah in khu phurphur a, a khenten kisil ding phawk vetlou uhi. Khenkhatte lah vuaktang a (Jain-te siampute) khawsa uh. Setan in akha uh a pumvalh nung in a salam natawm uh siangthoutak a a-om di uh phalloulai hi.

Huchi in setan kol a taanglai tampite mihing hin didantak a hing nailou simsenglouh omlai hi. Ganhing tawh zanchiang a giakkhawm, inn hoih-le-siangthou lah ngaipoimawhlou, taksa leh silh-le-tente siangthou dia kep sawmlou, munkhat peuh khong a dailengsuk mai...

Ei bel Pathian in i sunglam-le-pawlam siangthou din hon sinsak hi. Pathian in siangthoutak a khawsa dia hon deih ahi chih i theihna chu i dailen chiang a ek-vuk didan tanpha hon sinsakna ah chiang mahmah hi (Deut.23:13). Huaiziaktak leng ahi ding a, ei Khristiante midangte sang in kisiangthouzaw taktak hi. Ahi a, nek-le-dawn, silh-le-ten, innsung khosaknate kia a siangthou hunlou a, lungsim ngaihtuahna ahle siangthou poimawhlua hi.

Simtute, Pathian Temple i hi chih kiphawk in Sunglam-le-Pawlam ah siangthou sawm ni. Amah adia kikemhoih leh siangthouzou din Toupan hon panpih chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.