NANG BANGBANG TA NA DEIH HIA…?

Gelhtu: LB Muan

Nang bangbang ‘TA’ na deih hia chih ki dong le 100 lak ah mi bangzah in dawnna i pethei di ua…? Dawnna pia bang hile bangchi in i dawng dia…? “Hi ka deih” ichi diam ahihkeileh “E ka deih kei” ichi maimah diam...?

“Kei bangbang ‘TA’ ka deih” chi te’n ngaihtuah saudeuh ding om ding a, “Kei bangbang ‘TA’ ka deih kei” chi te’n leng amah bangbang ‘TA’ a deihlouh naziak suut detdet ding om ding hi.

 

[1] KEI BANGBANG TA KA DEIH

“Kei bangbang TA ka deih” ichih theih leh thil-nih suut ding om hi.

Khatna ah,

Hoih bukim kisak ziak hi khollou ding a, himahleh bangtan hiam ah hoih kisa chihna bel hi ahi. Khamtheih leh thilchin hoihloute a kibuallou, mi adia thilsia hihlou, lungsimlian nei, mi panpih siam, mi-itna hau, tupguh nei, hai gamtatlou, innsung limsak, kho-tang adia thilhoih semkhia, khovel nopsaknate a kibuallou, nungak/tangval kal a siangthou, koppihte itdan siam, midangte awlmoh, thudik gum a ding, nekgukna leh sum deihtakna a lungsim pelou, mi zaidam, laisim ngai poimoh, Pathian phawk leh adang hoihna tampitakte neih ziak a “KEI BANGBANG TA KA DEIH” chi ngam mi om ding hi.

Nihna ah,

I hoihlouh nate i kimuhlouh ziak a ei bangbang ‘TA’ deih leng hihkhak mawk theihdan ahi. Mahni hoih hetlou lah hoih kisak ziak a ei bangbang ‘TA’ deih i hih khak aleh bel ki ngaihtuah thak poimoh petmah ding hi. Hiai bang a mahni hihna tak kitheilouten ‘TA’ ahon neih chiang un akep didan theilou ua, tate tawh akal uh leng buai ut mahmah hi. Huai kia hilou in hichibang miten atate uh hoihlou asak chiang un a koppihte uh ngoh ut mahmah ua, a nupakal uh leng chidamlou hi. Mahni hoih kisakna leh tate hoihlou saknate ziak in innsung ah kituahna omtheilou hi.

 

[2] KEI BANGBANG TA KA DEIH KEI

“Kei bangbang TA ka deih kei” ichih leh leng thil-nih suut ding om hi.

Khatna ah,

Mahni hoih zen napi a hoih kisak zohlouh ziak a mahni bangbang ‘TA’ deihlou a mahni sang a hoihzaw ‘TA’ deih ziak a “kei bangbang TA ka deih kei” chihdaih bang leng mi om khathei hi. Khamtheih leh khovel nopsaknate a kibuallou, midangte leh Pathian adia hing himahleh Pathian mai a puansia niin bang lel ahihdan amuh chiang luatziak a mahni bangbang ‘TA’ deihlou a, mahni sang a Pathian phawkzaw leh hoihzaw ding ‘TA’ deih a “kei bangbang TA ka deih kei” chi bang leng mi omtham ding hi.

Nihna ah,

Sum-le-pai, nungak-le-tangval thangtatna, khamtheih-le-khovel nopsaknate a kibual a, Pathian deihdan thei nazenpi a zuilou a, mahni ading chouh ngaihtuah a, midangte adia poi tampi hih a, itna bei a khawsa mi ahi chih a ki-phawk ziak a amah bangbang ta deihlou a “kei bangbang TA ka deih kei” chi bang leng mi tamkhop omkha ding hi.

 

THUKHITNA

Bangteng hileh, khovel ah ‘TA’ hoih deihlou kuamah omlou ding hi. Nu-le-pa hoihte hi in hoihloute’n le ‘TA’ hoih deihvek ding uhi. ‘TA’ hoihlou deih bel om ding in agintak-huai kei. Ahihziak in ‘TA’ hoih neihna ding in mahni hoih masak ngai hi.

Taten i hoihnate sang in i hoihlouhnate hon suun utzaw uhi. Huaiziak in ei bangbang ahihkeileh ei sang a hoihlou zawthei ‘TA’ nei ding i hihman in ‘TA’ hoih neih nading in bel nasatak a panlak kuul ding hi.

Ta thumang, pil, nu-le-pa zahtakdan siam, nun nem, laisim kuhkal, khamtheih a kibuallou, Pathian lau, khovel nopsaknate sang a vangou delh a kalsuan…hoihna tampitak nei ‘TA’ i deih aleh bel ei mahmah i kibawlhoih masak ding ahi. A ziak bel ei bangbang chet ta nei ding lah ihi ngal a…taten nu-le-pa asut kei uleh kua a suun ding ua? Vak taten vak ngaina uh a, mial taten mial ngaina uh chih ahih maimah ziak in bangchi bang ‘TA’ nei ding ihi hiam chih bel gense ngailou in ei ki enle theihtheih mai ding hi.

‘TA’ hoih deih ihih leh apiang nailou ‘TA’ pen tuni apan ahoih ding in kikem thei hi, tua bel EI HOIH SAWM LE…hiai a kalbi masa ahi.

Simtute Pathian in hon vualzawl chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.