NACHINLAI HIA?

(Moupuansilh di leh moupuansilh koppih dia nei ding in nachin lai hia?)

Gelhtu: LB Muan

04/10/13

Tulai khovel a nungak-le-tangvalte lak ah “Na siangthou (virgin) lai hia?” chih dotna kidong di hile kuateng in hangsantak in dawnna i pe ngam di ua? Khenkhatten “Hiai khawng kidot zaw cheet-theih huailou law-ngal, thring lua” i chi maimah diam? 100 lak ah bangzah siangthou i om lai dia? Kumching nailou i chihte tanpha nupakal hinkhua ana chiam lawkkhin tamtak omta hi. Numei moupuansilh di leh Pasal moupuansilh koppih dia nei ding in i chinlai hia chih kivel zual ni.

 

MOUPUANSILH DING IN NACHINLAI HIA?

Moupuan i chih numei tampitak ten asilh kal uh ngaklah mahmah uhi. Pasal neih chiang a moupuansilh di pen numeite lunggulh penpente lak a khat ahi. Numeite ading a kizepna etlawmpen ahi chileng genkhial kei ni. Numei in moupuan ahon silh chiang in miteng in etlawm kisa chiat hi.

Ahi a, hiai a itheih di khat chu, moupuan in bang ensak hiam chih ahi. Moupuan a tangpi in ngou siksek hi. Hiai pen in numeite hoihna tuamtuamte ensak mahleh a etsak pipen bel numeite siangthouna (virginity) ahi. Numei tamtak moupuan in a etsak theilou a moupuansilh tampi om hi. Adik agen in, numei virginity mansuahte bel hiai puan siangthou silh dia ching/tak nawnlou ahi uhi. Siangthouna mansuah nung a moupuansilh bel kikhemna khat suak hi.

Numei in a koppih adia thilmanpha apiak theihte lak a manphapen chu a siangthouna (virginity) ahi. Mouvan tampipi ken sawm sang in siangthouna kembit in, kiteenni chiang in a pasal pethei leh huai pen manpha in Pathian deihdan leng ahi. Numei hoih bangzah i omlai a...(Paunakte 18:22) Ahihkeileh nau su-kia a tualthat kha bangzah i om a?

Numei siangthouna (virginity) mansuahte bel moupuan siangthou silh ding in ching nawnlou uhi!

 

MOUPUANSILH ZI DIA NEI DING IN NACHIN LAI HIA?

Pasal in leng a koppih adia thilmanpha apiak theihte lak a manphapen chu a siangthouna (virginity) ahi. A siangthouna tawh tehpih theih ding thildang manphalua omlou hi. Pasal tamtak ten a siangthouna uh bangmah a ngailou in kepbit ana sawm khollou uhi. Kepbit naksang a numeite’ siangthouna nasan lakmangsak ut a phaphetlou pasal tamtak om hi. Numei siangthoute ta-ta bang enlah uh a, a siangthouna uh laksak in kimawlpih uhi.

Pasal tamtakten numei teng thangtatpih di ngen in en uh a, achang in numeite naupai sakkha uhi. Huchibang a numei in nau a paai khak chiang inle hehpihna bei in taisan lai uhi. Utdan teng a numei tamtak a tatkhelhpih nungchiang un ji nei ding in hong kisa uh a, numei siangthoute (virgin) chouh hon zong lai uhi. Mahni siangthou louhdan kitheilou in numei kuahiam tawh ta khial khate bang deihlou lai uhi. Ahihziakin hichibanga thangtat miten amau bangbang tuakkha veve uhi.

Hichibang pasalte bel numei moupuansilh koppih dia nei ding in ching nawnlou uhi!

 

JOSHEP LEH MARY A KITEN NUNG NASAN UN SIANGTHOU LAI UHI.

Pathian thupiak bang in Joshep leh Mary in Jesu Khris apian ma in asiangthouna uh ana kembit uhi. Joshep leh Mary nupa hita ua, miteng in nupa in pomta uh a, inn khat a omkhawm in sun-le-zan in na semkhawm uh a, huchi a kidek di chihpen bel thil-haksa mahmah hiding in i gingta hi. Joshep leh Mary inle hun tamtak ah chu haksa sa mahmah ding un gintak-huai hi. Tulai khovel a ki-ngai maimai le kidek haksa sak a samai, hun rem teng a utteng hihsawm tetawh bel kikhe mahmah uhi. Inn khat a khawsa khawm Joshep leh Mary kha tampi kidek chu baih liai-lou ding hi...amau taksa utna neilou hituanlou uh hi.

Joshep leh Mary bel Pathian alauh ziak ua kidekzou ahi uhi. Amau taksa utna sang a Pathian thupiak zuih pen ahoih zawkdan thei uh a, Pathian in amau adia hun a bawlsak pen haksa lehle ngak hamham uhi. Tulai khovel ah bel atam zawte kidekzou mahmahlou leh kidek le sawm mawng-mawnglou in khawsa uhi.

Nungak leh tangval lai a ana thangtatte ji-le-pasal aneih ni un amau ading in bangmah athak chih ding om nawnlou ahihman in kipahna taktak neilou uhi. Bangkim ana chiamlawkta ahihman un lungsim leh taksa ah lunggulh ding neilou uh a, amau ading in ji-le-pasal neih ni pen bangmahlou suak hi. Koppih a neihnung un leng a koppih ua lungkim haksa sa uh a, ji-le-pasal neihnung inle thangtatna tawpsan thei nawnlou uhi. Kisik a bawldik theih di hi-nawnlou ahihman in damsung a nopsakna leh kipahna taktak tellou a nupa hinkhua zang maimahte suak uhi.

 

THUKHITNA

Pathian in angkawmna zadah petmah in Thukhunlui hunlai in tualthahna tawh kikim a pom hi a, tuaziak in angkawmte bel suang a denlup dia thutan khum ana hi uhi. Thukhunlui hunlai a Tualthatte leh Angkawmte bel capital punishment piak ahi uhi. Angkawmna i chih huchitel a Pathian in a zakdah ahi...Kumpi David leng Pathian lau leh Pathian lungsimbang pu kichi hial mahleh ang-a-kawm khak ziak in Pathian in nasatak in gawt hi.

Tu in nang-le-kei bang dinmun ah i ding a? Pathian gawtna hongtung ding ngakte lak ah telkha ihi hia? Minute tamlou sung lel nopsakna i zon ziak in maw Pathian zakdah pen i na hihsek maimah uh...!

I siangthouna ana mansuahta ihi hia? I hihtak leh leng tu in Pathian lam zuan in amah kiang ah kik nawn ni. Aman a sisan in hon silsiang ding ahi. Moupuansilh dia chin leh moupuansilh numei ji dia neitak a hon bawl nawnthei Toupa mah ahi.

Siangthouna tunitan ana kembit lai nahih leh nang ziak in Toupa min phat in om hen! Amah muang kawm in kikem siangthou touzel in, huchi in koppih tung ah kipahna tak nanei ding a, na suante leng nang bang in honghoih ding uhi. Nupa kituak leh innsung nuamsa chihte kua dang a hilou in nang a ahong hiding...Toupa khut lenlai hamham in.

Simtute Toupan hon vualzawl chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.