“KEI LOU-NGAL PATHIAN DANG NANEIH DING AHI KEI”

(Exudus:20:3; Deuteronomy 5:7)

Gelhtu: LB Muan

02/04/16

Pathian dang neih chihpen tulai khovel ah bang hi ding hiam chih suutkhawm zual ni.

Pathian in Mosi tungtawn a Israel-te api khiak in Sinai tang ah thupiak 10-te ana pia hi. Thupiak 10-te lak ah a masapen chu “KEI LOU-NGAL PATHIAN DANG NANEIH DING AHI KEI” chih ahi.

Kanaan miten ‘Baal’ bia ua; Philistia ten ‘Dagon’ bia ua; Moab ten ‘Chemosh’ bia ua;  Greek-te, Rome-te leh Egypt mite’n bel pathian khat chouh belou in pathian tampi nei uhi. Israel-te’ kiim-le-kiang a khawsa miten Pathian-hing belou a pathian dang abiak ziak un Israel taten le Pathian-hing taisan a namdangte’ pathian abiak mai ding uh Pathian in ana ngai-ngamlou hi.

Pathian’ thiltup bel Israel-te’n Pathian abiak ua, a kiim-le-kiang ua om namdangte’n le Israel-te tungtawn a Pathian-hing hon muhkhiak ding uh chih ahi. Achang in Israel tate’n tua mang-ngilh in bawltawm pathiante khawng ana be maimahsek uhi. Tuaziak in Pathian’ thangpaihna atung uah hongtung in Pathian in namdangte’ khut ah pekhe sek hi.

Achih leh tulai khovel ah Pathian dang nei ichih chiang in bang hiding ahia le? Hindu-te temple a valut a Krishna, Ram, Durga, Lakshmi, Ganesh-te mai a vakuun ahi diam? Buddhist-te temple a Buddha mai a va khukdin ahi diam? Muslim-te Mosque a vapai a “LA-ILAHA-ILLA-ALLAH-MUHAMMAD-UR-RASUL-ALLAH” vachih ahi diam…ahihkeileh Sikh-te, Jain-te gindan va pompih pen Pathian dang neihna ahi diam? “Hiai tengteng pathian dang neihna hi-tham mahkeh” i chihchiat uh a gintak-huai. Ahi, Pathian dang neihna ahi, ahihziakin hiaite chouh pen Pathian dang neihna ana hilou ahi. Pathian dang nei ichih chiang in Pathian-hing beloute gindan vaki koppih a, amau pathiante vabiak pen chouh hilou ahi.

I khovel khawsakna, i nekzonna, i siamsinna leh adangdang hunte ah i lungsim leh ngaihtuahna honluahthei ding tampitak om hi. Achang in i nekzonna haksatluat ziak in sum-le-pai in i lungsimte honluah a, achang in lungkham luatziak in khamtheih khong in i lungsim honluah a, achang in nungak/tangval i it-luatten i lungsim teng luahgai a, achang in Computer/Mobile leh internet ten i ngaihtuahna leh hun teng la-gai hi. Hiaite Pathian dang neihna ahi. I hinkhua ah Pathian hilou adang bang hiamkhat a masapen, a poimoh pen, a lunggulhhuaipen, a thupipen honghih chiang in pathian dang nei kisuak hi.

Tuni in nang-le-kei hinkhua ah pathian dang i neihte bangbang ahi ua?

Khamtheih, sum-le-pai, nekgukna, zu-le-sa, internet, mahni mimal lunglutna, silh-le-teen, kimawlna, sepna, ngaihzawngte, nungak-le-tangval kal a thangtatna, tv, films, gari, khovel thilte…

“TOUPA na Pathian uh na lungtang tengteng un, na lungsim tengteng un, na hatna tengteng un na iit ding uh ahi” (Deuteronomy 6:5; 11:1,13,22; 33:3; 19:9; 30:6,16; Joshua 22:5 ; 23:11; Matthew 22:37; Mark 12:30; Luke 10:27)

“A gam leh a diktatna tuh zong masazaw un, huchi in huai tengtuh a hon piak behlap ding hi.” (Matthai 6:33)

I HINKHUA AH PATHIAN HILOU A THILDANG AMASA ZAW A I KOIH CHIANG IN PATHIAN DANG NEI KISUAK MAIMAH AHI!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.