SING A AMIT

Gelhtu: LB Muan

08/11/17

            Vaite’n lupna/tutna chih khawng a bawlte uh singtak leh singhoih zang khollou in rong in zutmam mai ua, i etleh bel hoih taktak mahbang hi. A leina di sum neihlouh thutuam hileh agik tawh mahni inn neiloute adin inn kituan hun a adop di ka ngaihtuah chiang in ka peih mahmah kei a, huaiziak in kana deih thei hetkei hi.

            Huchi’n singhoih mah lei in kei-le-kei ka kibawl sukmai hi. Lupna assemble theih a i bawl leh zangkhai mahmah a, phelvek a lomhen a puak theih mai hi.

            Innlam khawng a hichibang khut nasep hih ngei mahmahlou khat kahih chiang in theihlouh ka hau mahmah mai a, sing "AMIT" omte bang kana deih hetkei a, "AMIT" omna muntak atan ut chi in "AMIT" omlou khawng kana pakta zaw hi.

            Innsung van ding bangzah hiam kon bawltak in sing "AMIT" om hoihna thuguk ka hon mukhe ta hi. Sing "AMIT" aom keileh a design omlou ahi mai a, "AMIT" aom leh a design nalh mahmah mai hi. "AMIT" pen a design bawltu ana hihdan ka musuah a, huaitak in chu "AMIT" omna te a kilat nadi leh adawk hoih nadi munte ah kakoih zelta hi.

            Hiai a zildia hoih ka muhsuah chu hiai ahi. Mihingte’n i hoihlouhna leh i hatlouhnate mu in i ki-ngaise sek ua, “kei zaw a zatna di ka om kei, mi ka phazou kei” i chisek uhi. Ahia i hoihlouhna tak pen leh mi i batlouhna tak pen Pathian khut ah pe le Aman azat didan theilaw mahmah ding ana hi ahi. I hatlouhna leh i hoihlouhna tak pen Pathian in design hoihtak asuahsak nadi mun ana hidan ahi. Pathian’ khut ah kilan khe le tua i hoihlouhna leh i mibatlouhna tak pen Pathian’ thupina a kilatna muntak suakthei ahi.

            Sawltak Paul in “ka taksa a ling” ana chih pen Pathian’ thupina a kilatna tak hi ahi. Pathian ei hon bawltupa i chih kha tehpihdi omlou Designer thupitak ahi a, honbawltu Aman zaw tua i hoihlouhna, hatlouhna, i mibatlouhnate pen thilmanpha a suahsak didan theilaw mahmah ding hi.

            Huaiziakin, midangte sang a hoihlouzaw, hatlouzaw, thulimlouzaw a i ki-theihnate etlawmtak hong suah nadi leh Toupa mel-latna ahihtheih nadin Pathian khut ah tuate laankhe ni.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.