NOA LEH A INNKUANTE THUMAN DAN

Gelhtu: LB Muan

07/02/14

Bible ah Noa leh a innkuante bang a thumang om ding in gintak huailou hi. Pathian in Noa kiang a agen peuhmah nial hetlou in a innkuan un hihpahzel uhi. Bible ah Pathian in Long bawl ding in Noa sawl hi. Noah in a ji-le-tate tawh bawl hi ngei ding in i gingta a, huaiziak in a innkuan ua thumangvek uh chihna suak hi. Noa leh a innkuante thuman dan i en ding…

 

[1] PATHIAN’ THUPIAK BANG IN LONG BAWLPAH UHI

Pathian in Long bawl dia Noa a sawl in a ji-le-taten anial lam uh Bible ah ki mulou hi. Tua hunlai in tuichiim gentaklouh vuah leng zu ngeilou hiding in Bible siamte’n gingta uhi. Huchibang dinmun ah Long vabawl ding chihmawk pen mihing ngaihdan in hai-huai mah abang sim hi. Mi tampite nuihsan leh engbawlna khawng ana tuak law ding un i gingta hi. Himahleh a innkuan un atheih ngeilouh uh ‘tuichiim’ hongtung ngei dia gingta in Pathian’ thu ana mang ua, Long ana bawl uhi.

Innkuan mi 10 le phalou in Long huchituk a lian bawl ding chihpen mangbat-huai mahmah ding hi. Nek-le-tak suktuah ding tawh, Long bawl ding tawh…a innkuan un hun tamtak ah chu gim kisathou ding un a gintak-huai. A Long bawl hunsung uh Bible ah chiangtak in kigelh kei mahleh kum 100 bek bawl ding un gintak-huai hi. Tua hun sung a kuamah phun leh lungkia chih om hetlou a Long bawl chih bel thillamdang mahmah ahi.

 

[2] PATHIAN’ GENDANCHET IN BAWL UHI

Mipil misiamte’ gendan in Long design tuamtuam om mahleh Noa Long aki design dan pen Long design tuamtuamte lak ah muanhuaipen leh detdoupen ahi chi uhi. Tuipi ki-hawttuah lak ah hichibang design kaan a muanhuai ding design dang omlou chi uhi. Noa kiang ah Pathian in Long design, adung-le-avai, letdan, saandan, kongkhak leh tohlet om nadi munte, asawng om didan bangkim hilh a, Noa leh a innkuanten bangmah khek lamdang hetlou in Pathian’ chihdan chetchet in bawl uhi. Pathian chihlouh dan a ana bawlkha bang hita le-uh tuipi ki-hawttuah lak ah Noa Long bang dinmun in aom dia chih theih butlouh ahi. Pathian in bawl didan achihdan chet a aki bawl ziak in Long pen tuipi tung ah ganhing tampi a puakte tawh buai hetlou in kha tampi kilaam thei hi.

  

[3] PATHIAN’ THUPIAK BANGBANG IN KALSUAN UHI

Pathian in Noa leh a innkuante kiang ah “Long ah luut-ta un” achih in aluut ua, “Pawt kheta un” achih in pawt nawnpan uhi. Pathian in Long a luut dia asawl in, “vuah le zuloupi a, vuah hong zukpat chiang in awl in luut ni” leng chilou in ginna tawh Pathian’ thugen a innkuan un mangpah siausiau uhi. Long sung a khatampi khawsak ding chihchu ninhuai hun tam ding in gintak-huai hi. Himahleh thumangtak in a innkuan un phun-hetlou in khatampi om uhi. Leitung ah tui hong kiamta chih atheih nung unle Pathian in pawt dia thu apiak ma pawtkhe mawklou uhi. Tuabang in Pathian’ thupiak ngaklou in ana pawt mawk le uh bang suak di uhiam chih gen haksa mahmah hi. Toupa’n pawt dia thu apiak in ganhing tengtawh Long apat hong pawtkhe pan uhi.

 

THUKHITNA

Noa leh a innkuanten Toupa’ thu aman bang ua thumang tulai khovel ah aki mu mah dia aw…? A ginna uh lah maimailou, a kipiak zawhna ulah thupi, a thumandan ulah lamdang. Noa te innkuan bel ettontak petmah uhi. Pathian’ vualzawlna dongtak mah ahi uhi.

Nang-le-kei innsung tawh Noa innsung ateh theih din agintak-huai kei. Ahihziakin tuni apan innsung a Pate’n Noa enton a, Nute’n Noa ji enton a, tate’n Noa tate enton le Pathian in hon vualzawl ngei ding hi.

Khros pua a Jesu khekhap i zuihna leh Pathian’ gam adia kal i suanna ah Noa te innkuan bang a mite nuihsan leh simmohna tuak leng i hikha maithei, ahia Pathian’ hon lamkaih bangbang in en leng i Long bawl ding bawltouzel le nikhat tei i bawlzou ding a, huaichiang in hiai khovel in hon sawk batlouh in tuipi tung ah Pathian in hon kilaamsak ding hi.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.