JAKOB HOIHNA THUGUK

Gelhtu: LB Muan

10/04/14

Mi tamtakten Bible a Jakob leh Esau tanchin asim chiang un Jakob pen siamlouhtan pahsek uh a, Jakob diklouhna chouh musek uhi. Hiai ah Jakob hoihna thuguk bangzah hiam i suutkhawm ding.

 

1) PATHIAN’ VUALZAWLNA NGAI THUPI

Jakob leh Esau a hong piankhiak un Jakob in Esau’ khetuul len mawk hi, hiai in gen nei mahmah abang hi. Jakob in anu’ gilsung a aom lai apan U-zaw hihna ana tuh panta ana hi didan ahi. Huchi in piching ahih nung unle Jakob U-zaw hih-ut in lam tuamtuam ah panla naak mahmah hi. A be-meh huan in a U Esau apan U-zaw hihna ana leithei mawk a…Huchi in atawp in apa apan U-zaw vualzawlna leng gukhe khong hi.

Esau in a U-zaw hihna bangmahlou a ana simlai a bangziaktak a Jakob in U-zaw hihna hichitel a ana ngaithupi ahi di chih suuttham ching hi. Ahitak in bel Jakob in Pathian vualzawlna ana delh hizawdan ahi. U-zaw pen adia Pathian apan vualzawlna hongpai pen ana ngaihthupi luatziak a apian apat U-zaw hihna tan teitei sawm a, atawp in zuaugen zen in apa ‘Isak’ apan U-zaw vualzawlna ana gukhia khong hidan ahi.

Bangchituk in U-zaw adia vualzawlna hongpai pen a natan sawm mahleh agukthoh hial pen Jakob in diksalou hi, himahleh anu’ lemsakzawk naziak toh alampi dang aom tuanlouhziak a ana gukkhak ahi. Jakob in U-zaw hihna aguk ziak in mawhtansek mahle aguk naziak i vasuut chiang in Pathian’ vualzawlna ana deih a, tua vualzawlna atan ut tinten ziak ahi chih chiangtak in muhtheih hi. Pathian’ vualzawlna ngaithupi a, tua vualzawlna tansawm a nasatak a panla Jakob bel ngaihsanghuai lehlam hi. Vualzawlna ngaisang mahmah Jakob in vualzawlna amuh nadin mihing kia hilou in Pathian nasan zankhovak in ana buanpeih hi.

 

2) A NU LEH PA THU MANG

Esau bangloutak in Jakob bel anu leh pa thumang mahmah khat ahi. Esau in bel anu leh pa thu ana la khollou hi ding in gintak-huai a, aji tenle anu leh pa su-khase mahmah uh hi ding hi. Huai ziak in Rebek in Jakob ji zong ding leh a U khut apan a suahtak nadin apu Laban-te khua Paddan-aram gamlam ah sawlmang sawm hi.

Jakob in anu leh pa lemgeel pen nial hetlou in a nu leh pa iit-tak nusia in atheih ngeilouh gam zuan in kal honsuan kheta mai hi. Jakob in a U Esau a lauhziak kia a inn nusia hizawlou in anu leh pa deih bang a ji jong dia kuan leng ahi hi. Pathian in ompihden a, huchi in anu leh pa deih bang in ami-le-sate mah, apu Laban tanute ji in nei hi.

 

3) PATHIAN AH GINNA NEI

Bethel a Jokob agiah nitak in Pathian akiang ah hong kilak a, hiai hong gen hi, “Kei Toupa, na pu Abraham Pathian leh Isaak Pathian kahi, nalup nagam na kiangah leh nasuante kiangah konpe ding, nasuante lei-a-leivuizah in aom ding ua, tumlam khawng ah, suahlam khawng ah, mallam khawng ah, simlam khawng ah nadalhzak dinga, nang ah leh nasuan ah khovel a namchih a navak ding uh…”

Hiai thuchiam pen Jakob ading in thilthak ahi kei. Pathian in Abraham leh Isak kiang a achiamsa ahi. Khangnih zen paita a, himah leh Abraham suante atam naituankei uh. Abraham in suan ahau hetkei. Isak in lah a thuum ek nung a tapa nih chouh neilai. Jakob adin bel hiai thuchiam gintak haksa leh kilom hi. Huchi dinmun ah Jakob in Pathian ah ginlahna neuchik le neilou in Pathian gen teng gingta vekmai hi.

 

4) KUHKAL LEH THANUAM

Jakob bel mi kuhkal mahmah ahi. Apu Laban tanu Rakil adeih ziak in kum 7 kiloh peih hi. Tua kum 7 nung in khem in om a, kum 7 dang kiloh peih nawnlai hi. “Ka pu tanu ahi, kiloh sese ngai kei” chi in kiteenpih ana sawm mawkkei. “Kum 7 tamlua” chi inle Apu ana deek tuankei. Kuhkaltak in asa leh avot nuai ah kum 14 sung vingveng apu nasem in a ji ding loh peih maimah hi.

 

5) ZAI DAM

Aji di aloh khit inle kum tamtak apu kiang ah kilohlai a, a kigawm in kum 20 sungvel apu Laban nasem in kiloh den hi. Huai hun in Laban in Jakob khemden a, a ut dandan in pei-am-hai hi. Laban in Jakob’ loh ding sawmveitak hihlamdang saktel mahleh Jakob in bangmah gen ngeilou hi.

 

6) PATHIAN BUAN NGAM

Jakob bel mi hangsan leh lungtang pha mahmah ahi. Pathian natawm zankhovak in buanpeih a, vualzawl a aom ma khahsawm mawngmawnglou hi. A pheiguh a kilawitak in naasa mahmah ding in gintak-huai hi, huchipi inle panglai tenten a, atawp in vualzawl in om khong hi.

 

7) KI-NGAINIAM

Jacob ki-ngaihniamdan ettontham ching hi. A U Esau tawh a kituah un “Ka Toupa” chi hi. A U pen “Toupa” chi in sam hi. Pathian apan vualzawlna amuh leh atan nung a mithupi asuah nung inle ki-ngaithupi tuanlou a, a U adia “sikha” danlel in kisim in ki-ngainiam hi.

 

8) ZITE IITDAN SIAM

Jakob in adeih pen bel Rakil ahi, Lea pen ahihleh apu Laban in utle-utlou a aneihsak ahi. Jakob in Lea deihlou pipi a aneih himah leh bawlgenthei tuanlou a, maak leng ana sawm tuanlou hi. A pu Laban apan paikhia a apian nagam hong zottak inle Lea pen nutsiat sawm tuanlou in a iitpen Rakil tawh dinmun kikim in kemden hi.

 

9) PATHIAN TOH OMKHAWM

Jakob a damsung teng Pathian tawh omkhawmden hi. Pathian tawh a kipolh gige ziak in Pathian’ deih leh Pathian lunggel thei-hoih mahmah a, Joseph’ tate Ephraim leh Manassi a vualzawl in leng a maban ding uh mu-khol in akhut taklampen a neuzaw Ephraim tung ah nga a, a veilam khutpen a U-zaw Manassi tung ah nga hi.

 

10) LEMNA DEIH

Jakob in lemna deih petmah hi. Apu Laban tung ah a lungkimlouh nadi tamkhop mu mahleh kilung kimsak teitei in lemna zong hamhamsek hi. Thuak zoutak in kum tampi Laban thunuai ah sem hi. Laban apat a paikhiak nung in a U Esau tawh lemna aneih theihna ding in lampi tuamtuam bawl in atheih tawp in ana pang hi.

 

THUKHITNA

Jakob hinkhua hoihtak a i-suut chiang in i phak hetlouh mithupi mahmah khat ahihdan muhsuah in om hi.

Jakob bang a Pathian a ginna nei a, thumang a, Pathian vualzawlna ngainep hetlou a tua vualzawlna tan ngeingei nadia Pathian buan ngam hiding in Pathian in simtute hon vualzawl chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.