NANG LEH KEI MOHPUAKNA AHI

Gelhtu: LB Muan

31/03/16

Mi tampite’n “Missionary, Evangelist, Pastor ahihkeileh Pathian nasem kichite ka hikei, huaiziak in Pathianthu kei tangkoupih ding ahi kei. Tangthupha tangkoupih zaw khaloh piak a Pathian’ nasem kichite hih ding ahi” chi in Pathianthu midang piaksawn sawm hetlou uhi…hiai bel ngaihdan diklou setan in i lungsim a hon koih ahi.

 

1. I MOHPUAKNA KITHEIHMAWH BAWL KEI NI

Jesu Khris gingta a piangthak kichi peuhmahte mohpuakna ahi. Pastor, Missionary, Evangelist leh adangdangte’ khut chouh a i koih leh bel i mohpuakna sempeihlou ihi chihna ahi. Tangthupha genzakna kuamah mohpuak hituanlou in nang-le-kei mohpuakna ahi.

Sadrak, Mesak leh Abednego-te le huai hunlai a Siampu leh Jawlnei kichite hilou uhi. Pathian adin hinna taan leng poisalou in mei a paihlut hial inle ana om uhi. Thukhunthak hun a te enle, Jesu Khris gingta peuhmah in a paina leh omna munpeuh uah tangthupha genzak uhi.

Toupa’ mangtutphah mai a idin ni chiang in Jesun, “Nang ding in Ka hinna konpia a, nang kei din bang non puak?” hon chileh bangchi in i dawng dia…?

 

2. SUM TAMLOU I THOH SUANG KEI NI

Mi khenkhatten Sawm-a-khat pia a sum tamlou a Missionary a chawm uleh bangdang sepkhiat sawm nawnlou mawk uhi. Neih-le-lam, sum-le-pai, i neihteng i piakkhiak nung ale asam khat omlai hi…tuabel ei mahmah inle i omna mun peuh, i sepna mun peuh a tangthupha i genzak ding ahi.

Sum tamlou i thoh suang a Pathian naa semlua dan a i ki ngaih leh setan khemzawhsa hi ding ihi. Pathian in ei apan sum chouh hon ngiat kei a, ei mahmah leng i omna, sepna, zilna peuh a tangthupha phuangzak dia hon phut ahi.

 

3. I DAMNA TANGTHUPHA ZUMPIH KEI NI

Khristian khenkhatten mi lak ah “Khristian ka hi” chih leng gen ngamlou mawk uhi. Tangthupha gen ding zumhuai sa bang le ki om hi. Tangthupha i damna hilou hiam? Bangziak a zumpih mawk di i hia? Khristiante chihlouh kuamah a sahkhua uh zumpih aom kei. Hindu te’n adawi biakna buk (temple) kong uh atot khak chiang unle zahna pezel uhi. Muslim te’n thumna a neih hun uh hongtun chiang in a omna munmun uah zum hetlou in thumsuk maisek uhi. Nang leh ken zum hetlou in mite mai ah Pathian i tawisang ngam hia?

Hindu, Muslim, Buddhist, Sikh, Jain leh adangdangte a sahkhua utoh kisai i genpih leh zum hetlou in kilawptak in gen ziahziah mai uhi. Ei Khristian kichiten bangziak a thudik leh tangthupha mihingte hinna ding genkhiak zum ihi mawk ua? Thupha mite damna di gen ding  kizum mawk lah zuau leh thusia kigen theizel…ki ngaihtuah kuul mahmah bang hi. Tangthupha i zumpihlai leh bel Khris a i dinna mun velthak tuak hi. Hotdam taten bangziak a i thilhoih muh midangte hilh ngamlou ding i hi a?

 

4. A GENDAN KA SIAMKEI CHIKEI NI

“A gendan ka siamkei” chi in suanlam bawl kei ni. Thildang i ut teng i genkhe thei. Zuau, thusia, chiamnuih thanghuai leh thuhoihlou teng i genthei, bangziak a tangthupha gentheilou kichi se-se di i hia? Setan in hon khemna ahi…Ei-le-ei le kikhem suak ihi. Huaiziak in i damna tangthupha genzak ni.

A gendan siamlou lua i kisak aleh leng a lampi khat bek ngaihtuah ni. Direct a tangthupha i gen ngamkei leh dotna haksa pipi a ginna uh toh kisai dong ni. A ginna uh diklou ahihdan amau-le-amau hong chianna ding un a ginna uh subuai thei ding dotna dong ni…a sahkhua ua aginna uh hongbuai chiang in Tangthupha abil uah baihsamtak in genlut theih ding hi. Tangthupha direct tak agen a haksatna mun ah hichibang in dotna pil-huai taktakte zang a nasep theihluat ahi. Mission Field ah leng hichi khawng mah a Tangthupha kigen ahi…

 

5. NEUCHIK I HIH PEN THILTHUPITAK SUAKTHEI AHI CHIH PHAWK NI

Sadrak, Mesak leh Abed-nego, Rahab kizuaknu, Naaman salmatnu leh adangdang tampite’n ahih uh thil thupilua ana hi khollou hi, houchik khawng ahih pen uh Pathian in thupitak in zang a huchi in mi tampiten Pathian hing muhlohzel uhi…huaiziakin aneu, houlua chimailou in i hih theihtheih hih ni.

 

THUKHITNA

I omna mun chiat a i hih ding Toupan honpia ahi. A thupi leh haksa le hikha maithei, ahihkeileh houchik leng hikha ding...huai hihle Pathian nasem leh theihpihtu muanhuai kihi chetmai ahi…

Na lawmte, seppihte, heutute, innkiangte, zilpihte leh adangdangte kiang ah Jesu khovel hondampa ahi chih nagen khata hia Unau? Vangam ah khamangthang khatbek pilut samlou ding ihi hia?

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.