Gelhtu: LB Muan
Director, RnR.
04th Oct.2019.
REBUILD AND RESTORE a sponsortute, tha-le-zung a pang khate leh thumna a ana pangte tung a ka kipahna hun sawtpek apat kagen khiak ut gige lah kagen khiak siamlouh tuni in ka hon gelhkhe khong hi, ka kipahna zahzah gelh khezou ding hikei mahleng neuchik bek genkhiak himhim ka ut hi.
1. SPONSORTUTE
PAHTAK-HUAI DAN
a)
Sponsortute
a tamzaw ngetlouh a hong pangte ahi uh.
Sponsortute thupi kasakna mahmah ahihleh a tamzaw nget hetlouh a Pathian’ gam adia kiphaltak a hongpang ahi uhi...“Keile ka hong pang sam ding” chi in khateng in Bank Account ah sponsor na sum hon thun gige uhi. Khenkhat lah hongpan ding uhle gen tuanlou in dai dide in Bank Account ah khateng in sum hon transfer zel uhi.
Ministry a kipat tuung apat sponsortu ding kizongtou ngit-nget hi. Mitamtak chial a kichial thoh, nget a ki-nget thoh ale kiloh chinglou, khenkhat a inn uah ngetna va kibawl hial lehle kilohching tuanlou.
Mi khenkhatte’n lah “Sum kaki daih deuh chiang in kongpang di” chi uhi...khenkhat in lah “Hon thumpih in, sepna ka neihchiang in kongpang ding” chi bang om. Khenkhat lah “Ka sepna ah suspend in ka om a hon thumpih inla, kasep nawn theih leh kongpang ding” chi uh...hoihtak in kithumpihzel a, Pathian in thumnate hon dawng in hong lohchingzel uhi...huaichiang in ama a agen uh mangngilh ua, sponsor ding in ki-ngen lehle hon ngaihsak nonlou uhi.
Mi khenkhat i muan mahmahte tata bang in hon sponsor ut hetlou ua, khenkhat lah hiai ministry ziak a damna ngah...khalam-salam, nupakal, tate kepna, ki-ngaihsiatna, mahni hinna laksawm hial a buaigawp leh lam tuamtuam a buaina tuak a...hun leh lungsim tamtak seng a i na buaipihte tata bang ahong hoih khiak chiang un hiai ministry ziak a damna ngah a kipak mahmah hi nazenpi in hiai ministry sponsortu in hongpang ut tuanlou uhi. A phattuampih ta-ta a sumchil in pang ua, a phattuampihlou ta-ta hiai ministry sponsortu in pangzaw mai hi.
Hichibang
a sponsortu ding zawn a haksat mahmahlai a nget hetlouh a Pathian iitna ziak a
kiphaltak a hongpangte tung ah kipahna lian petmah a, achang in kipahna mittui
luang hialsek hi. Amaute kiang ah kipahthu kigen ngeikei mahleh amaute ziak in
Pathian kiang ah kipahthu ana kigensek a, a sepnate uah, a innkuansungte uah, a
nupakal uah, koppih nei nailoute adin koppih hoihtak a muhna ding un leh khalam-le-salam
a vualzawlna tamtak adawn touhzelna ding un Pathian kiang ah ana kithumpihzel
hi.
b)
Sponsortute’n
min hoihna leh minthanna poimoh ngaihlou uh.
Sponsortu khenkhatten hiai ministry a hongpan uh kou natawm in katheih ding uh deihlou ua, huaiziak in dai dide in Account ah sum ana thunzel uhi. Ministry hon sponsortu theihkhiak louh a omte theihkhiak sawm in nasatak in kisuisek a, hun tamtak nung khawng a suikhiak a ompan hunkhop om hi. Suikhiak a aom chiang un “Mite theih di utlou kahi” chi tangpi ua huaiziak mah in sponsortute min leh hihnate kigenkhe ngeilou himhim hi.
Mi khenkhat saptuam leh khotang a kuamah phawklouh, miten bangmah a asimlouhte uh, Pathian phawklou leh mikhial tawp a akoih uh khenkhat bang hiai Ministry sponsortu ahi uhi. Pathian amaute tung a ahoihdan mu a niteng a “Toupa kei mikhial non it a kakipak” chi a Pathian kiang a kipahthu gengen a, aneih bangbang ua kiphaltak a hiai Ministry a hongpang om tham uhi.
Hiai RnR Ministry tungtawn in thiltampi ka muhsuah om a...vangam a lawmman tam sangpen dite hiai khovel a kuamah phawklouhte hiding uh ahihdan ka chiang mahmah mai hi. Eiten miteng theih na-mun koi hiam a sum tampipi thohte khawng i ngaisang mahmah ua, tuate khami mahmah dan in kikoih in vangam ah amaute lawm-man tam sangpen didan in kikoih hi.
Hiai khovel a mikhial leh mithulimlou a i koih tamtak te’n eite sang in vangam ah lawm-man tam sangzaw ding uhi. Eite’n mite muh ding deih in mite mai ah i pia a, amaute’n mite theih ding natawm deihlou in aguk in pia ua, a neihtam ziak ua pia hilou in aneih sunsun uh kipaktak in pelai uhi. Hiai Ministry sponsortute mihausate hi zenzenlou uhi, mi hausate apan panpihna neuchik le ki dongkha ngeilou hi. Meithainu’ thohlawm diktak hiai Ministry in dongkha ahi.
Jesu in
agen bang in kizuakte leh siahkhonmite’n vangam hon kaisan taktak ding ua,
amaute’n eite sang in lawm-man tam sangzawlai ding uhi.
c) Sponsor tute’n
ministry report poimohsalou uh.
Hiai Ministry in report lampang ki-ngai poimoh khollou a, tuasang in asep lampang ki-ngai poimohzaw hi. Report piaksiam sang in chi-taktak a aseplam pibawl kipoimoh ngaihzaw hi. Tuaban ah report piaktheih ding chii le om khollou a, aguk a mite’ theihlouh a nasemte a kihihman in genkhiak theih ding kinei khollou hi.
Counselling lam tawh kisai bang mite’ thuguk iim ngai ahihman in tuate genkhiak theih ding omlou hi. Nasepdante genkhia hile mite leh saptuam pahtak nasatak in kiloh ding a, Saptuam ah le kituitum in sponsortu ding leng tam mahmah ding hi. Himahleh genkhiak theih chii hilou ahihman in hiai Ministry pakta ding tawm mahmah mai hi.
Hichibang a dai dide a
aguk a na i-seplai in, tha honguantu ahihleh Sponsortute ahi uhi. Amaute’n
nasepdan report le hon ngiat hetkei uh a, tualam sang in amaute’n le dai dide
in kipaktak in ministry adin ahihtheih bang tawk un hongpangzaw ua, kha abei
tawh kiton in Account ah sum hon thunzel uhi. Hiai sponsortute Pathian apan leh
Pathian in hiai Ministry sponsortu dia hon sawl ahihdan uh a kichiang semsem
hi.
2. THA-LE-ZUNG A
PANGTE PAHTAK-HUAI DAN
a)
Gim-le-tawl
khawsalou uh
Hiai
Ministry a kipat tuung apat tha-le-zung a hong pangkha tamtak om uhi. Sponsor
hon zawnpih, na hon seppih, vai hon hawmpih, fund-raise hon bawlpih, nisa nuai
a alanglang hon dianpih, zan khovak a buaipih ding a kineih hun a hon buaipih,
Client khenkhat Counselling leh Therapy chouh a kep theihlouh damdawi inn a
etkol ngai hialte etkol hun a hon buaipih, laibu/calendar honna zuaksak a nisa
nuai a alang-lang ana diangte...ministry tawh kisai a lam tuamtuam a hon
buaipih a gim-le-tawl khawsalou mitamtak om uhi. Amaute’n hon panpihnate ki
mangngilh ngeilou ding hi.
b)
Mahni
tha-le-zung, sum-le-pai seng uh.
Hichibang
a Ministry adia hong kalsuan chiang un “tha” kia hilou in “sum” asen khak hun
uh tamtak omsek hi. Tu naizek a Laibu leh Calendar honna zuaksakte bang
genle...alang-lang adiang na uleh aki veisuk-veitouh hun un amau sum-le-pai
tamtak sengkha leng om lawtel uhi. A ki senna tengteng uh Pathian gam adi ahi
chi a awlmohna liantak tawh honna panpihnate uh ka ngaihtuah chiang in
kipahluat nalam a khasiattha asuah hun bang om a, Pathian kiang ah, “Toupa
nangziak a hiai bang a panpihtu di tasamlou kahi” chi in kipahthu kagen gen mai
hi.
c)
Kipaktak in
kal hon suanpih uh.
Sepna leh innsungna a buaipipi khawng ngen ahi uhi. Ministry fund-raise nadin laibu/calendar khawng a kizuaksek a, thilzuak ichih baih hetlou ahihlai a mite mai a hiai Ministry adia va kuun a kal hon suansak mite thupi petmah uhi. Hichibang a mimal leh pawlpi hon awlmohte’n tha hon guan mahmah mai uhi.
Ministry
adia kal asuan hun un a nuamlou leh mite kamsia azak hun uh leng om kha ding a,
phut-luih ziak hizawlou a Pathian’ gam adia pantheihna lamlam chi a kipaktak a
hon panpihte ka muh chiang in kipahna mittui luang thei maimah hi.
3. THUMNA A PANGTE
PAHTAK-HUAI DAN
a)
Phutluihna
ziak hilou in awlmohna ziak in thum uh.
Mitamtak ten hichi in hon genzel ua, “Konna thumpihzel uh, lung-ke-lou in hongpang un” hon chizel uhi. Hichibang a hon gente chikmah a hon thumpih dia ka nget khak ngeilouhte khawng ahi tangpi uhi.
Mi
khenkhat “Honna thumpih un” chi a i nget-nget hon ngiat om uhi, tamtakte’n bel
tuabang a hon ngiat seselou in honna thumpih uhi. Hon thumpih dite bel
nget-nget le kuullou ua, hon thumpihlou dite bel ngen-ngen lele honna thumpih
tuan khollou uh ahihdan ka muhsuah thak khat ahi. Hichibang khawng a nget
hetlouh a honna thumpihzel mitamtak om ahihdan katheih in khamuan huai kasa a,
kipahna ka neilian petmah hi.
b)
Thumpihna di
point ana ngaklou uh
Hon
thumsak gige te’n thumna ding point ana ngaktuanlou uh ahihdan ka theihna sawt
nailou hi. Ka theih ngeilouh leh ka nasepdan chiangtak a theilou mitamtak ka
kihoupih khak te’n honna thumpihzel ahihdan uh hon gen chiang un thumna di
point ka hilh ana ngak seselou uh ahihdan ka phawksuah hi.
c)
Thumna a
pangte tha-le-zung, sum-le-pai ah le pang uhi
Sum-le-pai,
tha-le-zung leh thumna ah hongpang le omtham hi. Pantheihna teng a hongpang
mite bel a inntek in a kikoih mai hi. Hichibang a mi kipezou leh Ministry iit
tute ziak in khamuanna liantak kinei a, lungkiat hun inle amaute hon hihhat
tute ahi uhi.
THUKHITNA
Saptuam, Organization leh Foreign Support chihte bangmah aki neikei. Mitamtak te’n hon gal-et thoh uhi. Na kasak mahmah bel hiai Ministry adia bangmah a pangkhaloute Ministry gensetu in pang maimah uhi...
Ginna petmah tawh kal kisuan a, khakhat a poimoh di zah sum kisutuah zou ngeilou hi, himahleh Pathian inle i ginna zahzah a honpi ahihdan chiang mahmah a, tunitan buaiselou leh zahlaklou in hon makaihtou den hi.
Sum-le-pai a pangte, Tha-le-zung a pangte, Thumna a hong pangte lawm-le-vual, u-le-naute aw...noute tung ah ka kipahna uh lian petmah ahihdan kam in gensiam zoulou a, gelhkhiak zawh ding le hituanlou hi. Hiai Ministry poimohtak adia na panna uh Toupan theilaw mahmah ahihdan ana haih het kei unla, haksa pipi a i kalsuan khopna uh i mualsuahni hong om ding a, Toupan Vaan ah ei adia le lawm-man hunkhop honna koihsakta ding ahi chih mangngilh kei ni.
Chikmah a mel kimukha ngeilou khawng Pathian gam adia pantheih nalam lam apang a kalsuan khawm ihih bang uhle thil thupitak ahi. Eite pankhawmna ziak a khalam-salam damna ngah tampitak om thamta a, maban ah tamzaw semte’n damna ngahlai ding ahihman un lungkiatni in leng pang hamham ni.
Nang-le-kei khut kilen a kal i-suan a, hon makaihtu Toupa ahih nakleh setan in honzou ngei-ngeilou ding hi. Tomchik damsung in Toupa’ gam adia atam theipen semsuah din hat-tak leh hang-tak in pangtou zel ni.
I omna peuh uah Toupan a Vaan
vualzawlna bukim in hon vualzawl chiat hen!
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi pen CLICK in.
No comments:
Post a Comment