MISSION NASEM DIA KUANKHETE TUNG A I LUNGPUT KHEK DIN HOIH

Gelhtu: LB Muan

25^th Feb.2020

Eite lak ah Mission nasepna tawh kisai a kigen chiang in a lunglut taktak leh lunglut taktak loute khenkak theihlouh di khop in i kiphursak souhsouh uhi. Mission nasepna lunglut mahmah i kichih lai un a sepkhiak nalam pen i kiang a kua hiam mohpuak in i koih a, eipen a gentu a pang in i ki hem khezel hi. Lungsimtak a lunglut hilou a kam chouh a lunglut ihih khak ding uh thil lauhhuai ahi.

Hichibang ihih lai un, a kalsuan taktak tamlou i om sam ua, kipahhuai i sa hi. A kuankhe sunsun te panpih leh hanthonna piak pen i mohpuak ahi a, amaute adia khuam kiptak ihih poimoh mahmah hi. Amaute panpihtu leh hanthontu hih naksang a amaute su-thadahtu leh subuaitu a le pankhak theih mawk hi. Huaiziak in Mission nasepna tawh kisai ah i lungput uh diklou khek ding tampitak om hi.

 

1. PAHTAKNA I PIAK BANG IN THEIHSIAMNA LENG PE NI.

Kua hiam Mission Field a sem dia a kuankhiak dek chiang in kamkhum thei tawp zang in phat chihtak in i kiphat sek uhi. Thumpih ngei khollou di te natawm in “Konna thumpih di” chi in haanthonna kampau i theih teng zang in i kikha khezel uhi. Itna, khamuanna leh hasotna tawh khak khiak ding mah ahi uhi.

Huchi a kua hiam Mission Field lut a Pathian nasem a va om in, a sepna nusia a innlam hongpai hiam ahihkeileh a sepna a khek chiang in a ziak le thei kholloupi in gensiat theihdan teng ah i gense sukpahzel uhi. Kipiak natak neilou a Pathian nasem a, innlam ngai leh lungkiat ziak a tawpmawk chih leng om tham hi, tuate bel pahtakna ding omlou mah uhi. Huchi hilou a, kipiakna hoihtak tawh Pathian nasemtu kuahiam in a sepna a nutsiat chiang in a tawpna ziak theiloupi a mawk gensiat ding hilou hi. A sepna Organization ahihkeileh a sepna mun leh seppihte lak a bang haksatna vatuak kha ahi dia aw chihlam ngaihtuah khak inle i neikei uhi. Ahih keileh Pathian in mundang a thildang sem dia a sapkhiak leng ana hithei hi.

Paudang/zatdangte’ organization khawng a vasem a, heutu hihna tan le vatang a, hong lamzang touzel dia i lam-et kua hiam khawng in a sepna uh hon nutsiat chiang un a nutsiatna ziak uh theiloupi in i gense sukmai uhi. Nidang a akuan dek khawng a i pahtakluat leh angel bang hial a i muhte khawng in a sepna uh hon nutsiat chiang un tualthat-kha mah i bangsak hial ua, mikhial koih in i koih hial mawk zel uhi.

Eite lak a agenkhiak ngamlouh uh haksatna leh bawlsiatna le vatuak hi khathei uhi. Sepna organization a pawlam mite theih a hoih mahmah lah asung lungvei mahmah chih leng ana hithei hi. Sepna a thil a tuahte ziak a BP sangloh, Stress, Depression, Anxiety Disorder ichihte neihloh mi hunkhop om uhi. “Pathian min a bangkim tuah ding ahi” ichi ahi maithei, Pathian min a hinna natawm itlou a kalsuan khia kuahiam in a sepna a nutsiat leh i theihlouh thuguk bang hiam om hi peuhmah ding hi. 

Mi kuahiam in haksatna atuah ziak a sepna khek hiam ahihkeileh a sepna apan khawlphot a aom leh a thudik theiloupi a mawk gensiat louh a, a haksatna te uh theihsiam dan leng i kisin ding ahi. A kuan hun ua pahtakna i piak bang in, haksatna a tuah hun ua leng theihsiamna i neih poimoh mahmah hi. A haksatna tuahte uh, a buainate uh suutpih a thumsakna a poimoh zahzah uh thumsak a i panpih ding hizaw ahi uhi. Amaute Pathian nasem dia a kipiak chiang ua angel suak hituanlou uh a, mihing mah, khase thei, dah thei, khalam a le chau thei ahihdan uh theihsiam ding ahi. Amaute panpihtu a panglou a, amaute gensia a alungsim natna ding uh hihtu a i pan leh Pathian lungsim sukha ding hi.

 

2. ORGANIZATION MINTHANG A VASEMTE I THUPI NGAIH MAHMAH LAI UN ORGANIZATION NEU A SEMTE MU NIAM MAWK KEI NI.

I theih ding ua hoih mahmah khat chu akoi-akoi a semte leng Pathian nasem, kumpite’ Kumpi nasem hivek uhi. Organization lian-le-neu, minthang-le-minthanglou a i buai ding uh hilou hi. A minthang deuh a semte ngaihsang chihtak a ngaisang a, a minthanglou deuh a semte neepbawl mawk ihihleh i Pathian muhdan dikzou nailou hikha ding hi. Kumpipa’ nasemte zaw ngaihsang huai vek uh ahi.

Organization a facility tam leh khaloh hoih deuhna mun a semte i koihsang mahmah lai un ei saptuam sung mahmah a semte, organization neu chikchik a sem a khaloh tawmchik tawh semte, mahni-le-mahni ki chawm a ginna petmah tawh kalsuan liai-liaite, neihni a ne a neihlouhni a ngawl a Pathian gam nasemte, saptuam inle a phawkpih khollouh a koi kawm hiam a mittui leh kho-ul kai niip-niap a semte ngaihnep huai hetlou uh ahihdan i theih poimoh hi.

A gamla deuh a vasemte thupi ngaih mahmah a, i kiim-le-kiang a semte bangmah a simlou ihih aleh bel khovel leh a thupina ngaisangte kihi lel ding dan ahi.

 

3. NAMDANGTE’ ORGANIZATION NGAISANG MAHMAH A, I PHUNGVUH LAI UN EILAK A TE LENG DOPSANGDAN KISIN NI.

I mawlluatna mahmah uh bel paudang deuhte ki ngaisang pahpah a, himahleh i mi-le-sate ngaihsang ding dan leh pahtawi ding dan theiloute ihi uhi. Paudang zangten thil houchik ahih uleh kipahtawi pahsek a, tua paudang zangte sang a thupizaw i mi-le-sa kua hiam in hihleh pahtawi naksang in i gense zaw maimah zel uhi.

Namdangte’ organization te thupisa in i boh souhsouh mai ua, sum-le-pai a vuk in thumna leh haanthonna tampitak i pia uhi. Huchihlai in eilak apan hong piangkhete bangmah in i simkei uhi. Eilak apan hongpiangte pahtawidan siam in thumna, sum-le-pai leh haanthonna tawh vuk le, a hamphatpih leh a zaal zoutu eimah ki hi ding a, paudang zang organization te sang in le hong piching leh thupizaw kha ding hi.

Ei a te i nelhsiah nakluat ziak leh ei-le-ei ki domsang a kipanpihdan i siamlouh ziak mah uh le ahi ding a, tunitan national level ah Mission Agency khat mahle ki neizou nailou hi. Neih leng kinei ngeilou ding bang hi.

Tua i ngaihsang mahmah organization te uah i valut chiang unle i mel-le-puam uh ana tuam ziak leh chi-le-kuang a kidei-danna a letluat ziak in i va tuitum thei tuan kei ua, lungsim natna khawng neihloh a atawp a sepna apan hong pawtkhia a hunkhop i om ta uhi. Maban ah leng ki huchitou lai ding hi.

 

THUKHITNA

Mission nasepna ichih pen full-time a Pathian nasem dia kipe khete mohpuakna dan chouh a i koihpen uh ngaihtuahna diklou ahi. Jesu Hondampa dia sang tengteng mohpuakna ahi.

I omna mun, i sepna mun, i nekzonna mun, i siamsinna mun, i lawmpolhna mun, i kimawlna mun leh i niteng hinkhua a i hunzatna mun a i kisuk khakpihte lak a Hotdamna thu tangkoupih pen nang-le-kei mohpuakna hi ahi. Pathian in plan hoihtak nei a tua i tutna/dinna mun a hon koih hikha maithei hi. Tua na omna mun apat dak inla na kiim-le-kiang en in, khamangthang bangzah na mu a? Tuate Jesu khebul a pilut tu dia huai mun a Pathian in nang hon koih ahi.

Mission nasepna lunglut taktak na hihleh lunglutdan kam chouh a gen hun nasa kei ding a, atak inle na semsuah ngeingei ding hi.

Pathian in nang missionary te judge tu dia hon koih na hi kei a, nang le missionary dia hon sawl na hizaw hi.

[Matthai:28:19-20]

Huaiziak in, kuan unla, nam chih a pan nungzuite bawl unla, Pa leh Tapa leh Kha Siangthou min in baptis unla, thu k'on piak tengteng pom ding in thu hilh un. Huan, ngai un, kei khantawn in, khovel tawp pha in leng, na kiang uah ka om zel ding, a chi hi.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.