NUNGAK SIANGTHOU MARY DINMUN LEH THILTUAHTE

Gelhtu: LB Muan

5^th Dec.2013

Christmas ni a naih chiang in i lungsim ah bangbang hong omsek a…vanthak lei ding, innlam pai ding, inn chei ding, sungkuan leh lawmte toh nuam deuh a zatkhawm ding, nitak chia leenkhop ding, Christmas sa mipite’n nuamdeuh a nekkhawm laih-laih ding, kuate hiam gift piak ding. Khenkhatte bel lawmte toh zu-le-sa a nawpbawl ni a zat ding, nungak/tangval tetoh nuam theipen a zat ding chihkhawng hikha ding hi…Unau, nang bangbang nana ngaihtuah a?

I kipahpih mahmah Christmas ni nang-le-ken nuamtak a i lop theih nadia Nungak Siangthou Mary in lungsim-le-taksa a haksatna tampi ana tuahte i ngaihtuahkha ngei hia? I ngaihtuahkhak ngei-hetlouh uh Mary thiltuahte suutkhawm zual ni.

Pathian apan a thu hongtung chu Mary adin thil haksapi himahleh nial vuallou ahihman in ahi bangbang tuak ding in Mary chu hong kisata mai hi.

 

1. SUANG A DENLUP TUAKTHEI HI

Mary bel Joseph toh kiteng nailou a gai mawk ahihchiang in, a maban ding lauhthawnghuai petmah hi, aangkawm a ngoh a denlup mawk a omthei ahi. Numei angkawm bel suang a denlup ding chih tua hunlai daan ahi. Mary bel sih-le-hin kal ah ding a, maban a thil hongtung ding a ngaihtuahna ah a lungsim bangzahta in abuai diam maw…

 

2. A IT MAHMAH JOSEPH CHAAN MAIMAHTHEI HI

“Khasiangthou apat naupaai kahi” chileh Joseph in lah mawk gintaklouh dia, kuamah Khasiangthou apat naupai chih lah om ngeilou a…hichibang dinmun ah Joseph tangval hoih mahmah khahsuahthei ahi chih Mary in a theilaw mahmah ding, a lungsim gim mahmah ding in i gingta. Itpen chaanthei dinmun ah Mary hong dingta maimah hi…

 

3. MAIZUMNA THUPITAK TUAKTHEI HI

Joseph toh kiteng nailoupi a hong gai mawk chih chiang in maizumna thupitak tuakthei dinmun ahi. A nu-le-pate’n lah theisiamlou ding ua, innkuan su-min-sia dan a ngoh a omthei ahi. Inn apat nohkhiak leng tuakthei dinmun ahi. A lawmte leh innkiim-innkiang in gimneih ding ua, miteng in “Nagil a kua-ta paai na hia?” chi in dong souhsouh ding ua, “Khasiangthou apan ahi” chi lelah “Aangkawm nu’n Pathian min agensia” chilai di ua, chiamnuih bawlna leh miteng chilphih tuakthei hi. Zumna leh engbawlnate tuak dia aki sakmai ngai a, ihmut theihlouh hun leng hau mahmah ding in gintak-huai hi.

 

4. A LUNGSIM THAWMHAU DEN DING IN A GINTAK-HUAI

Mary in a gilsung a nau apaai pen Khasiangthou apan ahi. Hiai pen bangchi bang nau ahong hi dia aw? Mihing mel hongpu diam ahihkeileh tuamna anei diam…chihte ngaihtuah in Mary lungsim tawldam lawtel ding in a gintak-huai kei. A pasal apat a naupaai hilou a, Khasiangthou apat a naupaai ahihchiang in a gilsung a kha huaizah a paailai in achang in alungsim thawmhau vungvung sek ding in gintak-huai hi.

 

5. PASAL NEIH NUNG A LE NUPAKAL HINKHUA ZANG THEILOU

Joseph in a ji ding in Mary pi mahleh Angel thupiak bang in nupakal hinkhua zang theilou uhi. Nupa hi a, zaan chiang a lupna khat a lumkhawm a, kha huaizah va kidek ding chih pen haksa petmah ding in gintak-huai hi. Hiai hun ah kidek zohlouh baihsam mahmah ding hi, Mary in taksa utna hih pichinlou a, kha hiaizah athuak chu haksathou mahmah ding hi.

 

6. GANBUK A NAUNEIH MAIMAH NGAI

Angel Gabriel in Mary kiang a nau hongpiang ding toh kisai a genlai khawng in Mary in hichibang dinmun ah ding diing in kigingta khollou ding hi…Khual-inn tangzoulou in Ganbuk ah naunei a, gan-aanpiakna kuang a naungek a siallai in, Mary lungsim ah bangteng aom dia… “Bangziak a Pathian in hiaibang dinmun a hon koihtel adia aw?” chi a Pathian tung a khasiat theih dinmun ahi.

 

THUKHITNA

Unau, Christmas tampi vei ana zangta le ihi ding, Christmas-ni chi a kipaktak a i lop zuazua theih nadia Nungak Siangthou Mary kipiak zohna i suutkha ngei hia? Mary in Angel Gabriel thupiak zuilou in ana talekkha zenzen bang hileh bang dinmun ah i ding di ua…Mary in lungsim tamtak seng a, zumna leh gentheihna khawksalou in, hinna taan a ngaih lele taan mai ding a ana kipiakkhiak ziak a tuni a Christmas-ni nang-le-ken nuamtak a lawm zuazua thei ihi.

NANG LEH KEN PATHIAN ADING LEH MIDANGTE ADIN BANG I HIH KHATA A? MARY THILTUAHTE NANG-LE-KEN TUAK DI HILE I NGAP NA DIAM?

PATHIAN ADING LEH MIDANGTE ADIA HING DING IN PATHIAN IN SIMTUTE HONVUALZAWL HEN…!

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.