NUPA KITUAHNA DIA POIMOHTE

Gelhtu: LB Muan

Khovel ah nupa kituak leh kiduat mahmahte leng kitheihsiam louh hun nei thousam uhi. Nupa kisuheh, kitheisiam lou, kina chihte omtheitham hi. Nungak-le-tangval hih lai a ki-iit mahmah leh kituak mahmahte leng ahong kiteen hial chiang un kinak leh kihehsan hun nei veve uhi. Kinak leh kihehsan chihte ahoih louhdan thei mahmah a, kituah sawm gige a panla nupa tampiten le kitheihsiam louh hun neizel uhi.

Nupakal a kitheihsiam louhna leh kituah louh nate ziak in nupa tampi kikhen in innkuan kisia tamtak om a, tagah tampi pianloh hi. Nupakal buaina ziakin mi khenkhat lunggimlua kisa in a hinna tanpha uh ana lakloh ua, akhenten lah akoppih hiam ahih keileh midang hinna tanpha ana la hial uhi.

Bangziak a nupakal a kituah louhna hongpiang hiam chih vasuut di hile, ahong kipatnate houchik ana hilel di a, houchik apat hong kipan in atawp chiang in thupitak hongsuak thei mawk in buaina thupitak hongpiang maimah sek hi.

Nupakal a buaina hong pianna taangpite bel; koppihte tung a mohpuakna theihlouh ziak, numei ahihkeileh pasal sungte thutheihluat ziak, khosakna haksatluat ziak, sum zatdan kitheih siamlouh ziak, sepna lam kiphawkpih louh ziak, lungsim kitheihtuah louh ziak, utna kibatlouh ziak, sep-le-bawl kipanpihtuah louh ziak, damtheihna kibatlouh ziak, lungsim kibatlouh ziak, nupakal gin-om louh ziak, khamtheih ziak, Pathian phawklouh ziak leh adangdang tampi om ding hi.

 

NUPA KITUAHNA DIA POIMAWHTE

[1] KITHEIHSIAM TUAH DING

Nupa kitheihsiam tuah ichih sum-le-pai in alei theihlouh gou manpha ahi. Nupa a kitheihsiam nak uleh ahinkhua uah, asepna uah, sungkuan khawsakna uah leh thil tuamtuamte ah haksatna hongtung mah leh akaal uh chidam gige ding a, lungsimkhat tawh kalsuan khawm gige thei ding uhi.

Nupakal ah kitheihsiamna ataksap leh bel hinkhua ah anuam chih gending om tawm mahmah ding a, kihehsan leh kinak chihte innsung ah om mun mahmah ding hi. Huaiziak in nupa kituahna ding in kitheihsiam tuah poimoh petmah hi.

 

[2] KICHIAM NATE MANGNGILH LOUH DING

Nupa bel kihihheh khakni omthei tham a, lungsim anat mahmah ni leng omtham ding hi. Huchia koppihten hon hihheh khak uhiam ahihkeileh koppihte tung a ilungsim asat vitvit laitak in nidang a I kichiamnate ngaihtuahkhiak sawm ding ahi. Nungak-tangval hihlai a ‘iit tak in kon kem ding, na mittui ka pawtsak kei di, kon duat di’ chi khawng a i kichiamnate phawkkik sawm ding ahi.

I ki-iit, ki-ngaihlai a I gente leh kiteenni a mipi leh Pathian mai a I kichiamnate I ngaihtuah kik chiang in I lung natna leh hehnate hong damthei mai ahi.

 

[3] NUPAKAL A KUAMAH KIGOLHSAK LOUH DING

I koppih toh I kal a banghiamthu aom chiang in midang kiang ah gen sese lou a hihfel pah ding ahi. I koppih tawh I kal a midang kuahiam hong kigolh mawk ding uh hilou ahi. Midang tawh ikal thu ah bel a utteng hong kigolh taleh, ahihziak in I koppih tawh I kal ah bel Jesu lou kuamah dang I chiallouh ding ahi. Midang hong kigolh chiang in thilhoih sang in thilsia piang utzaw a, thil houchik leng thupitak suakthei mawk hi. I kal a midang hong kigolh leh bel I koppih tawh I kitheichiang zou kei a, I kal ah mun awng lianpi om chihna ahi.

I koppihte tawh lungsim noplouhna hiam leh hehnate hoihtak a genkhawm a kituahna ding lampi zon khawm ding ahi. Huaiziak in nupakal ah zaw Jesu Kris chihlouh kuamah dang akigolh louh himhim ding uh ahi.

(Counsellor-te vanaih hiam ahih keileh Counsellor sam a nupakal gemkhawm pen hoih petmah hi)

 

[4] KIPANPIH TUAH DING

Tulai khovel ah ‘numei-na’ ‘pasal-na’ chih om lawtel nawnlou hi. Kipanpih tuah a sepkhawm theihte sepkhawm ding ahi. Khat tu manlou zen a kipei a, khat lah hihdi theilou a mawk luplup chihpen dik hetlou hi.

Nupa kipanpih tuah theiloute alungsim uh leng kigamla hi. Nasepna ah nupa a kipanpih tuah chiang un alungsim uh leng paikhawm hi. Koppihte nasep pen ihih theihlam hi kholkei leh leng I man nakleh panpih le I kal ah kituahna om ding hi.

 

[5] HEHNA OM LEH KAMDAM A GENDING

I heh mahmah hun in leng mawkpau hiam ahih keileh thagum a kimawk khoih ding hihetlou ahi. Kikhoih khelh a anungchiang a kisiik ek nading bawlkhak theih ahi. Heh mahmah lai a kam a ut teng gen hiam ahih keileh kivuak ek sang in hehna pen kamdam a hoihtak a koppihte kiang a gen ding ahi. Heh mahmah laitak a kamdam a gen kichi pen thilhaksa petmah khat ahi. Ahihziak in kisin le hih theihluat ahi. Kamdam a genkhawm theih pen nupakal chidamna ding leh tate thunun zawhna dia lampi hoih petmah khat leng hi ahi.

 

[6] MAHNI NAWPSAK NADI CHOUH NGAIHTUAH LOUH DING

Mi khenkhat in koppihte ading khual khalou in hinkhua zang ua ut dandan in taal uhi. Mahni lunglutna, mahni deih, mahni nopsak dan, mahni duh, mahni paidante kia a koppihte kaih ding hilou ahi. Koppihte leng ei bangbang a mihing ahi uh chih phawksam ding ahi. Kipak leh dahthei ahi uh chihleng theih ding ahi. Koppihte duh, deih, utna, lunggulh chihte theih sawm a kipahsak dan leng kizil ding ahi. Ei nawpsak dandan a taal chihpen koppihte bangmah a simlouhna ahi. Amau ading leng I ngaihtuah zelzel ding ahi. Dahna leh kipahnate I kikup a, anuam-ahak I thuak khawmpih ding ahi.

 

[7] MIDANG TOH KOPPIH TEHKAK LOUH DING

Koppihte midang toh teh hetlouh ding ahi. Kuate hiam koppih pen ei koppih sang a ahoih zawkna lam aom khak tak aleh leng ei koppih pen tawh vateh pah mawk ding hilou ahi. Ei koppih inle midang tampite sang a hoih zawkna neikha ding ahihman in, ahoih louhna lam I muhni in ahoih nalam leng muhsawm ding ahi.

Adik agen in zaw I koppih pen midang tampite sang a hoihzaw I sak ziak a I neih ana hi ahi, huaiziak in midangte koppih tawh ei koppih tehkak a, koppihte tung a phunphun chihte chiin louh ding ahi. I koppih tung a lungkim dan leng kisin a midang etlah nawnlouh ding ahi.

 

[8] BUAINA HIHVEN PAHPAH DING

Buaina, kitheih siamlouhna, hehna banghiam aom chiang in hun kidiah saklouh a hihven sawm pahpah ding ahi. I hehlai mah a, kamdam a gen a, I koppih tawh kikup a hihveng ding ahi. Hun hong kivei chiang in I kal ah kitheihsiam louhna ding hong kibehlap den ding a, atawp chiang in thil thupitak hongsuak mawk ding hi. Lungsim hong kigamla deuhdeuh ding a, thil neuchik ah leng kinakna hongpiang pahpahta ding a, atawp chiang in nupakal ah I utlouh tantan kitung ding hi. Huaiziak in hehnate khol louh a, nupakal adam nadia genveng tawmtawm ding ahi.

 

[9] SUM-LE-PAI ZATNA KITHEIHPIH TUAH DING

Nupa kikal a kituah louhna hong piangsak ut mahmahte lak a khat chu sum ahi. Koppihte tawh sum zatna kitheihpih tuah ngeingei ding ahi. Khaloh lak chiang a sumzat dingdan kikup a budget bawlkhawm gige ding ahi. Aloh tamzaw in zattam zawk ding chihna om tuanlou a, a poimoh dan a sum zatkhawm ding ahi.

Aguk a sum zat hiam ahihkeileh sum gukneih pen hoih hetlou hi. I koppih tawh I neih teng I neihkhawm ding hizaw ahi. Sum in nupakal ah siatna leh kikhenna tanpha hon tunthei ahihman in I sum muhna, zatdan leh neih zahte kitheihpih tuah a kikup gige ding ahi.

 

[10] TUP-LE-NGIIM NEIH DING

Nungak-le-tangval ki-iit, ki-ngai a kiteng mawk a, maban bangchi di chihle theituanlou nupa khovel ah tam mahmah hi. Nupa in bel ta neihding mah ahi, ahihziak a ta neihneih mai a tup-le-ngim neihlouh pen haihuai leh haina khat ahi. Khovel a I hinna ziak leh I hinsan I theihlouh chiang in nupakal ah ki ninna leh kituah louhna hong om sek hi. Nupa in maban a hihding ‘goal’ hoihtak neih ding ahi. Maban pai dingdan ngaihsun detdet a hinkhua zatding ahi, huchih chiang in nupa lungsim leng munkhat ah omkhawm in kituahna le om hi.

 

[11] PATHIAN NEIH DING

Pathian phawk nupate bel atangpi in kituak in a innsung uh leng chidam tuam se hi. Nupakal ah Pathian hong din gige chiang in kitheih siamlouhna, kinakna, kihuatna, kivuak chihte omlou hi. Pathian I kal a hong din a, hon gawmtu a hongpang chiang in nupa lungsim munkhat ah luang a, ut kibang a, kitheih siamna om in ki-iit tuahtak in kal kisuan khawm thei hi. Pathian nei nupa bel khovel ah midang bang in neizoulou in, pillou in, nek zawnna haksa in, genthei mahle uh kipak gige thei uhi.

 

THUKHITNA

Khovel ah nupa kituak utlou leh kituaklou mawngmawng dia kiteng kuamah omlou ding hi. Ki-iit mahmah leh ki-ngai mahmah a kiteng ahih keileh ki-ngai hetlou a kitengte nasan leng kituah ut vek uhi. Nupa tamtakten kituak a innsung nuam mahmah alunggulh lai un agintak louhlam uah a nupakal uh hong om in agintak theihlouh ding khop uh ahinkhua uah tung maimah hi.

Nupa bel long baang nihte tawh kibang hi. A langkhat hoih mahmah leh leng a langkhat asiat a leh bel tui honglut in long tum thouthou ding hi. Huaiziak in nupa bel khat hoih a, khat sia chih leng omtheilou in nihtuak ahoih sawm a hiai khovel a kituahna dia pankhop ding ahi. Tehkhinna khat genlai le, nupa bel cycle tawh leng kibang hi. Pei langkhat hoih a pei langkhat hoih kei mawk leh tai thei tuanlou ding hi, tua ahihman in anih tuak a ahoih ngai ahi. Nupa pangkhawm a lungsim kituaktak a kalsuan khawmte bang a nuamsa kuamah omlou hi.

Tua ahihman in I koppihte tawh I kituahna di’n atung a kigelhte zuihsawm in panla ni, Toupa leh I koppih tawh kituaktak a innsung I bawl leh kuadang innsung I eng dia…

Simtute, Nupa kituak leh mite adia etton tham ching nupa hiding in Toupan hon vualzawl hen!

 

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.