LUNGDON HUAI SA ING!

Gelhtu: LB Muan

22^nd Feb.2020

Pathianni khat Biakinn kai din kakuan a, Biakinn katun in lasak ana kipan khinta hi. Hitang lawsim ka hihman in achang in ka khuh cheuhcheuh sek a, huaiziak in asawng tunglam ah kaltou in a last second line ah kava tu hi. Achik-achik inle a malam khawng sang in a nunglam khawng a tut nuam kasazaw tangpi hi.

Hiai ni inle asawng tunglam a last second line a tu kahi a, ka gintak theihlouh di khop a lamdang kasak thil katuak kha hi. Ka nung ah tangvalnou leh nungaknou bangzah hiam tu uhi. Lasak hun in le pau tuptup den uh a, thugen le ngaihsak tuanlou in kihou den uhi. Bengseng kasa petmah mai hi. Dai dia vasawl mawk di lah hilou, achang in kaki heiphei cheuh zel a, nuam salou kahi chih amau le thei thou mahle uh daih sawm tuanlou uhi.

Tutna saupi ahi a, aning khatlam ah pasal 3 leh numei khat tu ua, akal ah gap lianpi om in aning khatlam ah pasal khat leh numei khat tu uhi. Khatvei kaki heiphei khak leh pasal khat leh numei khat tupen kikoi kawm a tu ahihdan uh ka mu hi. Ki thoh den ua, kilop tuah mahmah uh abang hi.

Hichi teng kia ahi kei a, a biang khawng uh le ki kiss sak cheuhcheuh zel uhi. Hiai bang thil Biakinn sung a aom theih lamdang sakna in ka kidim hi. Kum 18/19 lakkhawng lel di ahi ua, zumna neilou leh Pathian lauhna himhim neilou uh kasa hi. Biakinn sung natawm a hichi ngam ahih uleh mite omlouhna mun ah bangteng ahih di uam chih ka ngaihtuahna ah hong pawt hi.

Biakinn sung a tutna te a talab/sikhar hawng ki koihte khawng lamdang kasak mahmah lai in hiai bangthil Biakinn a katuah leh ka ngaihtuahna paisau mahmah hi. I khalam dinmun uh velthak tuak kasa petmah hi.

Kikhom hi-ngal lah Pulpit a thu kigen le ngaihsak mawngmawng lou, Biakinn sung a utdan teng a i khangdawng/tuailaite uh om ngam maimahta uhi.

Biakinn a kikhawm i tuailai/khangnoute hichi ngam ahih uleh, a kikhawm lou a omte aom na mun uah bang achi mah ding uam maw…Lungdon huai sa ing!

 

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.