PATHIAN’ LUNGTANG SUKHA “THILPIAK”

Gelhtu: LB Muan

24^th Oct.2019

Pathian min in thilpiak i pesek a, tuapen bangziak a pezel ihi hiam chih kidong le i piakna ziak tuamtuam kigen ding hi. Khros a Jesu in hon tatna ziak, i thumna hon dawn ziak, sepna hon piak ziak, lohchinna tuamtuam hon piak ziak, khovel neih-le-lam hon piak ziak, chidamna leh a vualzawlna tamtakte hon muhsak ziak leh adangdang tamtakte ziak a Pathian tung a kipak a thilpiak pezel kihi khading hi. Tuate ban ah a kilawmsakna leh mite pahtak lawhna dia i piakkhak hun leng omtham ding hi. Ahihkeileh Pathian’ vualzawlna i deih ziak a i piak hun leng om ding hi.

Ahihleh Pathian min a thil i piak chiang in i thilpiak pen in Pathian kipaksak ahi na diam? I thilpiak Pathian adia saantak ahi diam? Banghun leh bangchidan mun a piak in Pathian lungkimsak ahi dia? Koi mun a piak ding ahi di? I thilpiak in Pathian a kipaksak zou diam? I thilpiak in Pathian’ lungtang a sukkhak zawh keileh a kan-natna omlou ding hi. Pathian’ lungtang sukha “THILPIAK” ichih bangchi bang thilpiak hi hiam chih suutkhawm ni.

 

1) NEIH SUNSUN PIAKKHIAK IN PATHIAN’ LUNGTANG SUKHA HI (Lk.21:1-4)

Nikhat chu mihaute'n sumkholna a sum a khiak lai un meithai tagah tak kua hiam in dal dangka muza nih ava khe tei hi. Jesu’n huai amuh in a nungzuite kiang ah hichi in gen hi, “Chihtaktak in k'on hilh ahi, hiai tengteng sa'ng in tua meithai tagah tak in a khe tamzaw, hiai tengteng in a neih let uh a khia ua ama'n bel aki tunhingna ding a aneih sunsun a khevek ahi” a chi hi. Hiai Meithai tagah takmai in a neih sunsun a thohkhiak pen in Pathian’ lungtang sukha hi. Hiai Meithainu in tawm athoh ziak a Jesu’n ana pakta hilou in, aneih sunsun a thohkhiak ziak a ana pakta ahi zaw hi. Eite’n i piak chiang in bangchi in i pia a...?

Sum-le-pai i thoh ah ei adia piak nop ditan lel, haksalou a i piak zawhtan lel Pathian adia pezel ihi maimah hia? Tampi ineih lak a tawmchik lel khawng pia ihi lel hia? I piakzah in ei leh i khawsakna sukkha nailou ahihleh Pathian’ lungtang leng sukha nailou ding chihna ahi. Pathian in Abraham kiang ah aneih sunsun, a it penpen, adeih thoh penpen a tapa ‘Isak’ ngen hi. Nang-le-kei kiang ah leng Pathian in i deihpen leh i phalzah hilou in i phallouhzah leh haksa i sakzah hon ngen ana hi maimah hi. Eite’n i zatval Pathian i piaksawm maimah ua, tua ding hilou in i neih sunsun piak ding ana hi maimah ahi.  

Tamtakte’n sum hauh deuh chiang a Pathian’ gam adia thohkhiak pat kisawm hi. Hiai bel sum aval ding neih chiang a Pathian adia piakkhiak pat ding chihna ahi. Hiai setan in i lungtang hon khem-haina ahi lel hi. Sum val chih om ngeilou himhim ding hi. Mihausa ten le deihkhop ngeilou uh a, hauhzawk asawm ziak un suun-le-zan in nasatak a nasem in pang uhi. Sum zatval ding neihkal ngak ihih leh Pathian’ gam adia pangkha ngeilou ding chihna ahi. Pathian’ gam adia i pankhak ding setan in lauh chihtak in lau a, huaiziak in i sum zatna ding lam tuamtuam hon ngaihtuahsak ding a, seenlouhna di tamtak ah leng seenna ding hong om ding a, sum kidaih ngeilou in hon koih ding hi.

Pathian in le a itpen leh neih sunsun a Tapa hon pia ahi. Huaiziak in ei leng i itpen mah hon ngen ahihdan mangngilh hetlouh ding ahi. Abraham in a itpen a ta ‘Isak’ hial leng ana laankhe ngam ahi chih mangngilh kei ni.

I neih sunsun pekhia a Pathian’ gam nasepna dia i sum-le-pai i thoh leh Pathian in i khawsakna hon enkai ding a, i sum neihte hon zeeksak ding a, a kidaihlou di lai leng hong kidaih ding a, kipahna leng tam ding hi. I mangngilhlouh dia hoih mahmah chu ‘Tanghou 5 leh Ngasa 2’ lel hih pung a mipi sangtamtak vakpa i Toupa Jesu Khris ahi. Huaiziak in i sum neih sunsun leng hon hih pungsakthei ahi chih muang ni. Aman hon zatpih leh kidaihlou chih himhim omlou ding ahi. Ahihziak in sum hon zatpihtu Pathian hilou a setan ahihleh i sum kidaih chihni om ngeingeilou ding hi.

Pathian’ gam adia piakkhiak nalam a i panna ah i piakkhiakzah in ei hon sukhalou, sukha nailou ahihleh Pathian’ lungtang leng sukha nailou ding chihna ahi. Pathian lungtang sukha ditan a i piak le bel a vualzawlna bukim ei adi sa himai ahi.

 

2) PATHIAN IN PE DIA HON DEIHNA MUN A PIAK IN A LUNGTANG SUKHA HI (1 Kum.17:9-16)

Pathian’ Sikha Elija bel Kumpi Ahab apan taimang in Kerith Lui ah va kibu hi. Himahleh vuah azuk ngeilouh ziak in luitui hong kang a huaitak in Pathian in Elija kiang ah hiai gen hi, “Zarephath khua ah hoh inla, huai ah om in. Nang hon vak ding in meithai khat thu ka pekhinta.”

Huchi'n a thou a, Zarephath khua ah a hohta a, huai khokulh kongpi a vatun in, meithai khat sing tom ana om a huai Meithainu kiang ah nek ding leh dawn ding a ngen hi.

Zarephat khua a Meithai nu’n Pathian deihna thei in khatvei chouh nek ding aneih sunsun pen gilkial a buaisia Elija adin ana pekhe ngam maimah hi. Amah leh a tapa adia khatvei nek daih lel aneih sunsun chu it hetlou in a meltheih le hilou, chikmah a amuh ngeile hilou Pathian’ Sikha Elija ana neksak pen in Pathian’ lungtang sukha hi. Huchi in Pathian in Meithainu a vualzawl a, a tangbuang beel leh sathau thawlte avuak in omsaklou hi. Tua kia hilou in Pathian in Elija tungtawn in Meithainu’ tapa sihna apan damkiksak hi.

Pathian in Elija vaktu ding in mihausa leh lalte azang kei a, meithainu khatvei chouh nek di nei nu azang maimah hi. Meithainu inle a mohpuakna kipaktak in semsuah a, Pathian’ vualzawlna thupitak donloh in mite nek di neilou a abuai vengvung lai un aman bangmah semlou in Pathian in anek di tasamlou in koih hi. Pathian in pe dia adeihna munchet ah pia a, khatvei chouh apiak leh Pathian in amah adi niteng in leh piak maimah hi.

Eite’n le Pathian in pe dia hon deihna mun a i piak ding ahi. Tua mun pen mitamtakte piakna mun hi chitchiat khollou ding a, mite’n hon muhlouhna mun leh kuamah phawkpih louhna mun leng hikha-thei hi. Pathian in koi hiam a nang-le-kei piakna mun dia adeih om ngei ding hi. Tua mun ah midang sawllou a, nang-le-kei chouh hon sawl hikha-thei hi. Zarephat khua a midang tampitak om mahle uh Pathian in Meithainu a teel khel-khel bang a nang-le-kei hon teel a, tua mun a ineih sunsun pekhe dia hon deih ana hi maimah hi.

Pathian in pe dia hon deihna mun ah hia i piak ding ahihkeileh en i piak utna mun ah? Kuamah hon phawk louhna di mun lah a poimoh tenten na mun ah hia i piak ding ahihkeileh min hoihna leh pahtawina i muhna ding mun ah? Pathian in hon muanna pen vuaksuaksak mai ding ihi hia ahihkeileh semsuah ding? Ei utna mun a piakpen in mihing lungtang sukha a, Pathian hon deihna mun a piakpen in Pathian lungtang sukha hi. Thilpiak a Pathian’ lungtang i sukkhak chiang in a vualzawlna kidong theipan hi. 

Munteng a thilpiak piak pen ahoihlouhna a om kei, ahia Pathian in mihingte mohpuakna tuamtuam hon pia a, ei chouh mohpuakna hon piak ana omsek hi. Tuapen ngai-nep a taisan a, mundang a i va kidaihlah chiang in Pathian deihdan ana hituanlou hi.

 

THUKHITNA

Tulai khovel a i thilpiakdan khawng uh ka et vengveng chiang in Jesu thugen ka lungsim ah hong langzel hi. “Na thilhoih hihte uh mi muh di'n, mihing mitmuh a hihlou ding in pilvang un; huchilou in zaw na Pa uh van a om kiang ah kipahman na nei kei ding uh. Huchi'n, mi kiang a thilpiak na piak in, milepchiahte'n mi phat aloh theihna ding ua, kikhopna inn khawng, kongzing khawng a ahih nak bang un na ma ah pengkul mut ke'n. Chihtaktak in k'on hilh ahi, a kipahman uh a muta uh” (Matthai:6:1-2).

Pathian in pe dia hon deihna mun pen chet leh pe dia hon deihzah chet piak in Pathian’ lungtang sukha ahi. Pathian’ vualzawlna i deih a, a pahtak i loh ut a, van a gou i khol utleh i thilpiak in Pathian’ lungtang a sukkhak ngai ahi.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.