KOPPIH NEIHNA A NUMEI LOHCHING

Gelhtu: LB Muan M.Th in Counselling

2^nd March 2020

Siamsinna a lohching, sepna a lohching, sum-le-pai zonna a lohching, khawsakna a lohching...lam tuamtuam tamtak ah lohchinna ngahtheih a, lohchinna khempeuh adeih huailou omlou hi. Numei in thildang teng ah lohchinna ngah hen la, laisiam in sepna lianpi nei mahleh koppih neihna ah lohching keileh thildang a alohchin nate bangmah suaktuanlou hi. “Pasal nei theilou...” chi a gensiatna atuah ban ah mite’n gim-neih uhi. Huaiziakin, numeite ading in thildang a lohchinnate leng poimoh thou mahleh koppih neihna a lohchin pen apoimoh pen hikha maithei hi.

Koppih neihna a numei lohching ihih theihna ding in thil tamtak i theih kuul khading hi. I kibawl na ding leh pan ilak na ding le tampitak omkha ding hi. Hiai anuai ah tamlou i suutkhawm ding.

 

1. NA PASAL ZAHTAK KHIAL KEN

Na pasal bangchituk a simmoh huai in zahtak huai kei leh leng nang adia na “LU” dia Pathian in aseh ahihman in na pasal zahtak khial hetken. Na pasal nazahna zahzah a nang tawisang a om ding nahihdan mangngilh hetken.

Na pasal nazah keileh mite’n “Pasalte simmohnu” chi in nang pen bangmah in hon mutuanlou ding uhi. Na pasal nazah leh na tate’n leng apa uh zah ding uh a, huchi in tate thunun leng nuam ding hi. Na pasal nazah keileh na tate’n le apa uh zahtaklou ding ua, nang le hon neepbawl ding ban uah thuzawh haksa ding uhi.

Nang na pasal nazahtak kia hunlou a, na-nawlamte tengteng inle na pasal azah theihna ding ua pan nalak ngeingei ding ahi. Na-nawlam te’n a makpapa uh a simmoh ngeingei uleh nang na mohpuakna na zawhlouh ziak hi ding hi.

Na pasal na-nawlam ah gense kenla, phattuak ahihnate ah phatzel in. Na-nawlam te’n na pasal a zahtak ua a bawlhoih uleh na pasal kipak ding a, a kipah leh na pasal in nang hon bawlhoih ding chihna le hi ahi. Huaiziak in na-nawlam ah na pasal tawisang dan leng siam in.

Na pasal na simmoh a, na-nawlam te’n le a simmoh uleh na-nawlam ah na pasal mai-ngallou ding a, hoh leng hoh utlou ding hi. Simmoh a om na pasal in lungtang natna lianpi tawh nang hon kitenpih hamham hikha thei hi.

 

2. NA PASAL SUNGKUANTE MUDAH KEN

Kiseel ni leh kinakni leng omkha ding, himahleh na pasal nu-le-pa, unau leh sungkuante muhdahna mit in en hetken. Na huchih ngeingei leh it tu ding neilou in na vaal loh kha ding a, na pasal a pichin zawh mahmah keileh na meithai loh kha zawmah ding.

Na pasal bangchituk in thuzawh zou in, it kichile chin le asungkuante na it pih keileh hon pakta tuan hetlou ding ahi. Pasal pil in apian apat anuam-ahaksa ana palkhawmpih a sungkuante bangchituk in hoih kei le uleh leng haw ngei ngeilou ding uhi. Na pasal sungkuante na huat leh na pasal in nang hon itna kiam thei ding ahihban ah na nupa ua kikhen loh theilai nahihdan uh mangngilhlouh ding ahi.

Nang na sungkuante na it leh na pasal in le asungkuante it lawsam ding ahihdan theihpih ngeingei in.

 

3. NA NUTSIATSA NA-NAWLAM AH KI HEI-HEI KEN

Na lutna innsung ah na ki inntek-sakna zahzah a inntek hi ding na hi. “Tanu bang a om hia na ut ahihkeileh mou bang a om” chihpen nang khut ah ki nga hi. Na lutna innsung in hon bawlsiat khak uleh leng nang pen na ki innteksak thouthou ding ahi.

Asia-apha na pasal leh a innkuante kiang ah kum in. Na pasal kiang a kup dia kilawmte na pasal kum inla, asungkuante kiang a kup dia kilawmte a sungkuante kum in. Na nutsiatsa nang nu-le-pa leh sangamte kiang ah thilteng tun ken.

Na-nawlam ah a poimoh omlou in va mawk hohhoh ken, nawlam phapha numeite kua man pakta lou hi.

 

4. NA INNSUNG AH NA-NAWLAM VAIHAWM SAKKEN

Na innsung ah nang nawlam vaihawm din chial hetken. Nauzaw’ ji nahih a, inntuan nahihleh leng nang nawlamte sang in na pasal a lamte kiang ah anuam-ahaksa kum lechin na ma vang ding hi.

Na innsung a na-nawlam hong thu neihluat uleh na pasal’ a lamte ki daang koih ding uhi. Na nupakal uh a hoihlouh ni inle na pianna nu-le-pate kiang na tut sang in nalutna innsungte kiang tun masa in. Na pianna nu-le-pa’n nang pasal neihna innsung ah vai ahawm di uh bangmah omlou hi.

 

5. NA LUTNA INNSUNG A THIL PAIDAN MAWK KHEK SAWM KEN

Nang huai innsung a nalutma a kum tampi ana zuih uh paidan pen nikhat thu a khek dia nava kisak mawk ding hilou ahi. A paidan uh hoihlou aom aleh leng nava mawk soisel ding hilou a, thil hoih natheihte awl-awl a nava hih ding hizaw ahi. Thil banghiam ahoihlou ana zuih/hih pen uh amau kum tampi, akhang-akhang a ana paidan uhle himaithei hi...huai pen tha-khat thu a khek theihlouh ding ahihdan natheih ding ahi.

Thil hoihlou leh khalam tawh kisai leh kisiatna di zen khawng ahih kei nakleh nalutna innsung a paidan pen vazuih sawm inla, nang pianna innsung a paidan pen na pasal neihna innsung ah va pawlut ken. Na mouvan ken puaklut teng ah hunsak inla, na nu-le-pa leh na innsung tawndan leh paidante na pasal neihna innsung ah va pawlut ken.

 

6. NA LUTNA INNSUNG HOIHLOUHNA NA-NAWLAM LEH MUNDANG AH GENKEN

Na lutna innsung pen hoih hetlou ahihtak aleh leng na-nawlam leh mite kiang ah gen hetken. Mite’n na lutna innsung hoihlouhna atheih louh ua, ahoih dan a atheih pen uh nang ading a lal-lu-khu ahi. Na lutna innsung pen ahoihdan a mite’n atheih uleh nang hon zahtak ding uh ahihdan mangngilh ken.

Na-nawlam leh mite lak a na innsung hoihlouhna nagen leh na pasal lungtang bangchituk a sukha ding hiam chih theilou nahi. Nathil gente’n na pasal lungtang a suknat khak leh na nupakal uh leng buai thei hi.

 

7. BIBLE A NUMEI HOIH KIGENTE BANGBANG HIHSAWM IN

Inn kiim-le-kiang a numei dangte tawh ki tehteh lou in Bible ah numei hoih etton ding tampitak omte etton sawm ding ahi. Ruth bang etton dia hoih petmah khat ahi.

Tuaban ah numei om ding dan, numei hoih leh Pathian pahtakdan numei Bible ah kigelh tampitak te lungsim a koih gige ding in hoih hi.

Innsung a “LU pen” pasal himahleh numei in innsung alam keileh bangchituk in pasal in pan la leh leng innsung bawlzou tuanlou hi. Paunakte 14:1 in agen “Numei pil in a inn alam a, himahleh numei hai in ama’ khut ngei in a phelsia” ana chih zaw diklawtel mah hi.

Numei hoih leh numei pil ichih te’n a innsung uh alam ban uah u-le-nau, tanau-laina leh sungkuante leng kaikhawm uhi. Numei hai in bel ama’ innsung a phelsiat ban ah a pasal’ u-le-nau, nu-le-pa leh tanau te kal ah kisiatzakna tun hi.

Bible a numei pil kigelh pen bangbang hi sawm ding ahi.

 

Paunaakte:31:10-12

Numei hoih kuan a mu dia? a mah lah rubi suang tunglam pek ah a om ngal a.

A pasal lungtang in amah a muang a, punna taksapna a nei kei ding hi.

A damsung ni teng in amah a hih hoih a, a hihse kei.

 

THUKHITNA

Koppih neihna a numei lohching hihna ding in hiai atung ateng ban ah tampitak leng aom lai tham ding...Koppih neihna a numei lohching hi ding in Toupan simtute hon vualzawl hen!

Numeite aw, nang na pianna nu-le-pa leh sanggamte na it leh na pasal inle a pianna nu-le-pa leh sanggamte it lawsam ding ahihdan mangngilh mahmah ken aw...

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.