TOUPA MEL MUHNA

Gelhtu: LB Muan

25^th April 2020

Nikhat chu gamdangte pasal khat Counselling Centre ah hong hoh a, a buaina tamtakte ka suutkhawm uhi. Sawt kuamtak ka houlim nung un kikhen ding in kong kisata uhi. Hon din khiaksan dek in table tung ah Rs.500 note hunkhop hon piaksawm hi.

Counselling bawlna a sum la ngeilou ka hihdan leh lalou ding ka hihdan hoihtak in kagen a, sum lakik ding in ka ngen hi. A kipah ziak a hon pedek ahihdan gen mahleh ka na chiindan ahihlouh man in ka la utkei hi.

Counselling room a sum la utlou a ka nial laitak in ka tapa kum 3 pha nailou deuh khekol le tenglou in hong tailut taltal a, ka Client in huai amuh tak in hiai hon gen hi, “Sum pen hiai naupang adia ka piak ahi ta, nang adi hilou ahi, tua chu lalou chih om theilou di” hon chi hi. Ken le rem kasa tuan kei a, “Naupang le piak ngai tuanlou ahi” chi in ka nial lai hi. Himahleh naupang adi ahi chi in table ah nuse thouthou a, hon paisan hi.

Inn nuaitan kava kha a, huchi in Counselling room ah ka kik nawn hi. Office table a sum kikoih pen ken le kipaktak in kala mai a, Innkuan in Pathian kiang ah kipahthu kagen uhi. Kasim uleh Rs.10000 pha hi.

Sum zatna di bel tam petmah a, poimoh tampitak ki nei ahihman in tuate ah kizang leh beipah mai ding hi. Himahleh naupang adi chi ahih chiang in bang lei nadia zat di ahi mahmah dia aw chi in ka nupa un ka kikum uhi. Atawp in ka nau uh zun puante sawpna ding kilei leh kizang dikpen ding in ka gingta ua, Washing Machine lei ding in kong kisa uhi.

Washing Machine lei na ding in tawm deuh zel a, huchih laitak in ka account ah Rs.5000 honglut guih mawk hi. A details ka etleh nidang a Rebuild And Restore kipat tung a ministry support na dia private company khat a ka va sepna apan honglut ana hi a, ken le company ten ahih khelh uh hi ding in ka gingta hi.

Kum khat val ka sep nonlouh nung a sum hong lut ahihman in thawmhauna khat le ka nei a, a piakkik didan khawng ngaihtuah in ka lungsim abuai mahmah mai hi. Huchia lungsim buaitak a ka omlai in email hon khak ua, ka seplai a ka sep hoih ziak ahon piak uh ahihdan hon gelh uhi.

Ka lungsim bang hong zang hut a, manglam bang hial hi. Kipahna in ka dim a, Toupa kiang ah innkuan in kipahthu kagen uhi. Toupa zaw kou adin hoih khol diak hi.

Huchi in ka Client in hon piak tawh, ka sepna lui company apat honglut tawh kigawm in Rs.15000 ka neita uhi. Online a Washing Machine ka et uleh Amazon ah Lightning sale etlah huaitak LG 6.2 kg Fully-Automatic Top Loading Washing Machine ka mu ua, ka budget utawh kituak chet hi.

Huchi in Rs.14990 in Washing Machine ka order uhi. Ka sum neih utawh kituak mahmah a, Rs.10 val hi. Ka order ni uh ahihleh 5th Nov. 2016 ahi a, ni tamlou nung in hong deliver uhi.

Hong deliver khit un Toupa kiang ah kipahthu genna ka nei ua, huchi in ka zang phatuam mahmah mai uhi. Tunitan hiai Washing Machine hoih mahmah a, khatvei mah le se kha nailou in kou adin phatuam petmah hi.

Hiai Washing Machine hon piandan kou ading in thil lamdang ahi. Pathian in hon piak liu-liau mah ahihdan ka chian mahmah uh a, dinmun setak a ka omlai ua le hon taisan ngeilou Toupa tung ah ka kipak petmah uhi. Ka don vuallouh uh a vualzawlna simsenglouh ka muhte uh ziak in amin kaphat hi.

Tulai khovel ah mite adin Washing Machine chihkhawng thil thupilua ahi zenzen kei, ahia kou adin bel Pathian mel ka muhna uh ahi. Hiai Washing Machine ka et teng in Toupa mel ka muthei hi. Kou adin Toupa mel muhna suak hi.

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.