“PATHIAN NASEM LEH SOLKAR NASEM KITEENG THEILOU DIING”

Gelhtu: LB Muan 

July 2012 kum ahi a, Punjab ah Pathian nasem in ka om hi. Sungkuan ten ji nei dia hon sawl na kumkhua uhle sawt ta, lawm-le-vualte’ tate le lianpipi pha-ta uh, a kikhel lam hita chi in ken le kaki ngaihpihnu kiang ah kiteen di thu ka gen leh aman leng pha sa in huchi in ka sungte kiang ah mou ana hel un chi’n thu ka pia hi. Zi nei dia hon sawl zawhlouh pa un mouhel di thu kagen khiak leh chu, ka sungkuante a phur zak uh a, mou hel ding in kisapah uhi. Lohching ngei dia kikoih in mou hel ding in gari nih dim zen in ka sungkuante va kuan uh a, mou va hel uhi…

Kei lah chu ka lupna tung apat sungten hon phone di uh ngaklah in kana buai mahmah mai a, phone hong gin di ngak in ka mit chu phone apat ka lakhe theikei hi. Zan hong sawt simta, mouhel hitawk le uhle innlam adia zaw zan sawt lawta hiveh aw ka chi a ka om maimai thei nawn kei. Sungte va phone di lah kilawplua hon sak khak di bang uh kalau gusim a, kua pen phone di adia aw chi in ka buai petmah mai hi.

Atawp in sungte tawh ka kihou kha khong ua, ka ki houpih teng thil omdan gen chiang ut omlou mawk uhi, ahem zawng ngen in thu ahon genta uh a…ka lungsim abuai deuhdeuh a ken le ahi bangbang hon hilh un ka chih chiang inle gen didan theilou in om vek mawk uhi. Piching ngen mouhel dia kuan ua, mouhel na report gen theilou a bangchidan a dang-awk vek mawk ahi ua chi in kei hon buaisakzou petmah hi.

A jinglam in ka U-te khat in chu hichi in hon genta hi…“Mou helna singpi le honna dawnsak ut kei uh…singpi i vapiak dek chiang inle anu bang un i khut khawng hong kaihsak a, nou khawng hon suhsak in hon khiin khiaksak mai ahi…bangchidan ahia, nou a ki-ngai mah hilou nahi umaw?” hon chi maimah hi. Ka Pute khat in lah “Mouhel ding in kakuan nawn mawngmawng kei di” chi mai hi. Ka U-jite khat in, “Hichibang mouhel na katheih patna ahi…a khellaw zawzen ua alehlam ah neih a neihkhiat mawngmawng din le a uthuai zawzen” hon chi hi. Ka U-pasal khat in “Lungsim nasak hetken, amau sang a hoihzaw na mu law mahmah di.” Akhenten lah “I mouhel ten hon simmohlua ua azum huailua, vaki hoh ngamnawn kenteh” chi uhi. Ka nu leh pa lah gen ding pen leng theilou in khase zawzen uhi.

Hiai teng kon zak tak in zaw lung-aam a puk-ek theih ahi. Gen ding theilou in ka hai-nuih maimah hi. Ka lawm ompihte’n le gen ding pen athei kei uh, hon hehnep didan leng athei tuan samkei uh. “Tualthat khate le pupa daan a kihoulem in singpi dawn khawm in annkuang uumkhawm thei uh a, kei huchile hilou…mouhel kihi a hon deih kei uh lehle singpi bek hon dawnsak uh henla, kamsiam in hon khakhia maile uh zaw theihsiamhuai deuh di hi a” ka chi nelhnelh mai hi.

Ka sungte’n anung in mouhel nitak a apu-le-anu kampau honhilh uhi. Anu-le-Apu’n hichi’n gen uhi “PATHIAN NASEM LEH SOLKAR NASEM KITEENG THEILOU DIING” ana chi uh hidan ahi. Hiai thu kazak tak in zaw ka lungsim ana mahmah…amau le Khristian mah hi ua, mak kasa in na kasa law mahmah hi. Ka lungsim ah “kei hon nawlkhin nahi kei ua, ka Pathian nawlkhin nahi zaw uh” kachi a mittui ka nul kei, ka lungtang kahih khauh a kaki pasalsak teitei hi. “Pathian’ na kasep ziak a hon deihlou nahih uleh poi kasa kei, ken ka Pathian kataisan kei diing” ka lungsim ah ka chi a ka nung-hei nawn kei.

Huchi in ka ki-ngaihpihnu kiang ah “Kei leh ka sungten natung ua kahih khelh uh aom leh hon ngaidam unla…na sungten nang adia hon rem geelsak uh hoihzaw om hiding ahi. Tuaban lawmta bang in i kipawl ta diing” chih teng phone in kagen a huai ka mangpha khakna ahi ta.

A nung in ka U-te leh Nu leh Pate’n thuak siamlou ding in hon gingta ua, kei hon khualna ziak un mouhel nawn mai ding thu khawng hon gen nawn uhi. Ahihjiakin ka lungtang ah “PATHIAN NASEM LEH SOLKAR NASEM KITEENG THEILOU DIING” chih aging-ging mai a, huaiziakin kei bel nung-hei nawnlou ding in malam suan in ka paita hi. Ka Pathian ading in bangteng kataan ding, ka Toupa kei adia ka bangkim ahi!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.