SETAN KAMPAU

(Pathian nasemte hanthon nadia gelh ahi)

Gelhtu: LB Muan

Pathian nasemte zaw setan in le hon bei nakdeuh a, Bible a Job bang in i hinkhua le soisa nak petmah hi. Ei kia hon bawl kei a, i sungkuan leh ei tawh kisukha teng ban ah i vanzatte tan in le hawi nei hetlou hi.

Hichibang a hon soisak lai in i lungsim ah adik simsim lah dik taktaklou tamtak hon gen zel a, Khasiangthou in hon houpih gige bang in setan in le i lungsim ah tawlngalou in thu gengen mai a achang in hon khemzou dekdek sek hi. Jesu in “Setan, ka nung ah pai in” achih bang a en le “Setan, ka nung ah pai in” i chih zel uh poimoh hi.

Pathian nasemte’n setan kampau i zakmun mahmahte uh hiaite ahi.

 

1. NACHIN KEILUA

Hun tamtak ah Pathian nasemte lungsim a pawt gige khat chu hiai ahi. “Na chin keilua” chih lungsim ah ging mun mahmah mai hi. Pathian nasem dia i chitlouhdan, i hoih zawh louhdan, kampau neem i zatzawh louhdan, mite it di bang a i it zawh louhdan, Pathian na i sep di bangtak a sem zoulou i kisakdan, i hinkhua mite adia ettontak i saklouhdan, Pathian nasem dia mawllua, hailua, zawnglua i kisakdan te khawng lungsim ah hun tamzaw in lang den sek hi. Hiaite bel setan kampau ahi a, setan apat ahihdan i theihlouh chiang in ki-ngaihsiat hun omthei dekdek hi.

Ahi, kumpite’ Kumpi nasem dia achin zaw khovel ah kuamah omlou ding hi. Bible a mithupi mahmah ichihte nasan le chin ana kisa hetlou ua, hoihlou leh chinlou kisakna kampau ana zang lawsam uhi. Mosi, Gideon, Saultak Paul chihte khawng Pathian galhang chimahle amau bel Pathian gam nasem ding in chin ana kisatuan hetlou uhi.

Pathian’ gam nasepna dia qualification zaw “Piangthakna ahi”. Piangthak i hih a Pathian sapna i zak a Pathian adia i lungsim, taksa leh pumpi i piakkhiak leh kua ahia chinlou hon chi ding? Ei chin i kisak leh kisaklouh in thu apaw kei, mihing thaunilh i hikei a, Pathian thaunilh i hi. Pathian thaunilhna tang i hihleh hiai khovel ah chinlou hon chi ding kuamah a omkei.

Setan in i hoihlouhnate mitkha ah hon langsak dundun in lungsim ah i chitlouhdan ngen hon gengen mahleh “Setan ka nung ah pai in” chihkhum ding ahi.

I hoihlouhnate kibawl hoihzel in, i chitlouhnate ah chitzawk sawm in Khasiangthou pi dandan in kalsuan ni, setan kampau ngaihsak kei ni.

 

2. NA INNKUANTE EN IN

Hun tamtak ah setan in Pathian nasemte kiang ah “Na sungkuante en in, hichibang a thulimlou sanggam, sungkuan, tanau nei nahi, na innkuan bawlhoih zouloupi a bangziak a midang bawlhoih dia kisa na hia? Pathian gam nasepna a milak a kizat le zumlou maw?” hon chihkhum zialzial zel hi.  

Hiaibang a setan in hon kou zialzial chiang in “eimah ve, adik eive, kei innsungkuan le bawl zoulou hi ing a” chi a Pathian nasep bang zum huai i kisak tuntun hun omsek hi. Ahihziak in hiai kampau setan apat ahi a, Pathian apat hilou ahihdan theih ngeingei ding ahi.

Sanggam leh innkuan thulimlou i neihkhak leh milak ah i hangsan di bang inle kihangsanlou a zum huai lawmah hi. Ahihziak in innkuanpihte ziak a Pathian gamna i sepna abuai ding himawklou ahi. I sanggam i bawlhoih zawhlouhte ziak a i lungsim i sukbuai di ahi hetkei, amau bawlhoih phot a huaikhit chiang a Pathian nasep kipan di chimawkle i sihtan ale kibawlhoih zoulou ding uh le hikhathei ahi.

Amaute ziak in Pathian nasepna a ze-ol ding le ahi kei, i sep di sem ngamlou a i om ding le ahi kei, amau chu amau ahi ua, ei chi ei i hi. I hihtheih tawk i suah nung a i bawlhoih zawh tuankei leh amaute ziak a i lungsim i sukbuai ding hilou a, huaisang a i lungsim thovengtak a koih sawm zawk a lungsim nuamtak a Pathian na sepdan kizil zawk ding ahi. Setan kampau kizousak kei ni. 

 

3. KUAMAH PAHTAK LE HI KEI TEH

Hiai setan kampau Pathian nasemte bil alut sekte lak a khat ahi. “Kuamah pahtak le hikei teh, awl sepdeuh in, huchisep tel di hikei, bangmah lohtak kei teh” setan in hon chihkhumsek hi. 

I taksa hinglai ahihman in Pathian kia pahtak hilou a mihingte pahtakna kampau i poimoh hun le omtham hi. Mihingte’ pahtak ut lua chihna hizawlou in mihingte pahtakna kampau i zak chiang in tha hon guan in i nasep hon suhatzou hi. Huchibang pahtakna kampau i zak ngeilouh chiang in hiai setan kampau in hon thadahsak phialphial hun om hi. Ahia, mihing nasem hilou a Vaan a om Pathian nasem i hihdan mangngilh hetlouh ding ahi.

Gentheitak a sem i kichih lai ale hehpihtu ding kuamah neilou a, miten hon kou zialzial ua i hihlouhnapi khawng a honna gense zialzial uh le ahikha ding, mittui nul nilh-nelh a kalsuan haksapi suan leng i himaithei, huai hun ah Jesu’n hiai khovel khelhna lamang dia Khros apuaklai in kuaman “ka khelhna ziak ahi maw…” chi in ana hehpih le omlou ua, a chilphih ua, a kilhlup tel khawng uh lungsim ah ngaihtuah khiak zel sawm ding ahi.

 

4. NA LAWMTE EN IN

Pathian gam nasepna a i lungkiat nadia setan kampau dang khat chu hiai ahi “Na lawmte en in, sepna hoih taktak nei ua khaloh tampipi lawh ua nuamsatak a khawsa uh, lailam a pailoute nasan le inn leh lou nei a nuamtak a khawsa zou uh, nang gentheitak a duh le nezoulou, na poimoh le lei zoulou, Pathian nasem nahih hang a na zawn ziak a miten nathu le lalou uh, kuamah in hon zahtaklou, koimah a lah tazoulou.”

Hichibang a setan in hon chih chiang in bangchi in i dawng a? Adik le bang thou mah veh aw maw…Lailam sin ek nung in Bible sin ding in Bible College/Seminary ah kum tampi khuak sa zen in i kikhum a, sum tampipi seng in kum tampi Bible i sin a, i zawh nung in i zillai a i sen teng le i lohsuah zoukei a, Bible i sin tuk in lai ana sin hile IAS, IRS chihte i min tawh kigelh khawm thou ding eive maw...

Ahia, ei bel lei-leh-vaan Siamtupa leh Aneitupa nasem i hi. Khovel a Degree-te, sum-le-paite, thuneihna leh lalnate tunglam tham a Kumpi nasemte kihi ahi. I lawmte bel en huai hun tampi om lawtel ding hi. Ahihziakin hiai khovel en a kal i suan leh bangtan mah kitunglou ding hi.

I lawm-man ding zaw hiai khovel ah i mukei hial ding, Pathian in Ama’ nasemtute hiai khawvel lawm-mante leltak piaktak salou a huaiziak a vaan a atul theilou lawm-man honna koihsak ahi. Tua ahih kawmkawm in a it na leh kepna in hon taisan ngeilou ding a, i poimohte hon pezel ding hi. Huaiziak in setan in i lawmte en dia hon sawl chiang in lehlam i ngatsan ding a vangam lam etsan zel ni.

 

5. TAWPSUK MAI IN

Pathian nasemte lungsim ah setan in hichibang gensek tham hi. Elija bang a sih ut huai tuntun hun le tam hi. Nasep haksa salua a tawldam hiuhiau mai a ut huai hun le tam lawtel hi. Bangchituk a setan in hon dou a mimal, innsung leh nasepna a haksatna pal i hi a chih hon theihpihlou a honna simmoh mahmahte khawng in Pathian na hon semsang uh henla, ei a entu in kipang phot leh chih ut huai vungvung hun le omtham hi.

Setan in, “Tawpsuk mai in” hon chih hun a tawpsuk ek phot a ut huai mahmah hun le omtham hi. Ahihziak in Pathian in a nasem dia honsap in atawp din hon sam kei a, tek tanpha le chilou in sih tanpha sem dia hon sam ahi. Melmapa bangchituk in hat in, pil in, panmun khoh siam in, i nasepna ah hon makhelh zatzat in ana tangpang gige mahleh i tun nadi mun i tun masiah chu khawllou a paizel ding ahi.

Jesu in “Zawh ahita” achih bang in nang-le-ken le zawh ahita chithei di dinmun i tunma khapet zen a pan ding ahi. Lungkiatna melmapa setan apat ahi, Pathian khut len peuhmah le a vualzousa i hi.

 

THUKHITNA

Setan kampaute bel adik bangbang in hon ging sek a, himahleh adik taktak hilou hi. Jesu’n ni 40 le zaan 40 an a ngawlh khit in setan in a khemna kampaute le adik di bang abang thei ahi. Himahleh dik taktaklou hial hi.

Pathian nasemte’n zaw setan kampaute ngaihsak in nei kei ni. Khasiangthou’ kampaute i bildoh zaw ding a, Khasiangthou pi dandan in kalsuan ni. Mittui nul kawm in pangzel ni, sawt nawnlou hial ding hi.

“Tu hun a i thuaknate zaw i tung ua thupina latsak a hong om ding toh tehpih tham in ka sep kei hi” (Romte 8:18)

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.