COUNSELLING TRAINING

Dhemaji Mission Field, Assam

Amun : Multi Purpose Building, Dhemaji.

Ahun : Sept. 12-14, 2019

Hiai hun a sinsaktu din Rev. Thangzasiam Field Superintendent, EBC Dhemaji Mission Field apan chialna ka ngah in kenle kipaktak in rem kasa a, chial a ka om bang in 11^th Sept. zinglam dak 1:00 lakvel in inn apat kaki pankhia hi. Zingkal baihdeuh in Delhi apat Flight in Kolkatta zuan in kalengkhia a, Kolkatta ah dakkal-4 vel katawldam khit in Dibrugarh zuan in Kolkatta apat kalengkhe-nawn hi.

Nitaklam dak 2:00 pelzek lakvel in Dibrugarh Airport apat kapawtkhia a, tua mun ah hongpi ding a Htp.Thangzasiam in honsawl Dhemaji a i missionary-te uh mi thum (Mang, Lun leh JK) ten honna dawn uhi.

Dibrugarh Airport apat Dhemaji kikal kilometre 80 lakvel ahi a, i saptuam uh gari Bolero a tuang in Brahmaputra luitung tawn in katai uhi. Dakkal-2val khawng katuan nung un Dhemaji Mission Field a FS Quarter/Office damtak in katung uhi. Tua ah FS leh a innkuante’n honna welcome ua, FS in Pathian kiang ah kipahthu genna nei in tua khit in singpi khawng dawn in katawldam ua, tuazan bel program bangmah omlou hi.

Khaw-hun kikhek ziak ahi ding a, Dhemaji Mission Field a semtute damlou khawng in ana buaisim uhi. A zingchiang a training kipanta ding ahihman in damlouhna ziak a telkim zawhlouh khak ding ka lau mahmah mai ua, thumna ah Pathian kiang a damna leh hun thoveng ngen in a kithum a, Toupan i thumnate uh hon dawng in Missionary om teng mi 9 kitelkim vekthei a, training hun in damloute’n le hoihlam leh damlam ma-nawh in training sung telsuak vekzou uhi.

• ·         Ani masa ni : 10:30am – 8:30pm
• ·         Ani nihni : 8:30am – 8:00pm
• ·         Ani thumni : 8:30am – 6:30pm

Hiai training hun ah Counselling Skills leh subject tuamtuam sinna ka nei uhi. Mission Field a Missionary ichihte eite’n Khamangthang matna-na kia sem ding dan in kikoih khasek a, tuapen ana dikkhin hetlou hi. Amaute’ nasep Khamangthang matna-na kia hilou a, khamangthang-mat ban ah ahong piangthakte khalam a ahong pichin na ding ua keptouh hilai hi. Tua ahihman in a nasep uh poimoh in a huap lian mahmah a, tuate lungsim a koih kawm in amaute tawh kituak ding subject-te kisinsakna ka nei uhi.

Pastor-te kia in “Pastoral Care and Counselling” kisinsakna poimoh hilou ua, Mission Field a i Missionary te’n leng tua na mahsem ahihman un amaute’n leng hiai poimoh petmah uhi.

Nithum sung chouh kisinsakna nei kahihman un ka hun uh ka-am petmah ua, achang in break hun bang kahih tomzel uhi.

Kiginni (14^th Sept) in training ka zousiang ua, nitak in bawngsa-meh limtak ne-khawm in agamla a omte’n a zingchiang Pathianni kikhop zing delh haksa ding chi in hon paisan uhi.

Pathianni in Evan. Siam leh Evan. Luni te nupa sepna biakinn khat ah kikhawm din Heutupa Thangzasiam makaih in kakuan ua, tua mun ah Thutak genna hun ka nei a, Evan. Chin in agam mite’ pau in siamtak in hon lehkhiaksak hi. Kikhop khit in saptuam memberte tawh annkuang uum-khawm in tuazawh in kongpai uhi. Tua ni in semtute inn phak batte Heutupa’n hon phak kualpih hi.

Dhemaji a semtute fel in mi pahtakdan siamthei mahmah mai uh a, agam mite’ puan 5 (nga) tak tawh hon kiksak uhi. Tua kia hilou in training zawh ni in FS in envelope sung ah sum tamtak kithun piakna hon nei zawmah uhi.

Missionary-te’n sense of humour hoihtak neichiat ua, Heutupe’n apat semtu a naupangpe’n tan ah kipawllim thei mahmah uhi. Ki ngai-niam thei petmah ua, heutu leh heutu-lou chih omlou in lawm bang in kipawl ua, alak ua om nuam ka vasa petmah hi. A ki-thuah dante uh leh Pathian’ na asep dante uh ettontak ka vasa petmah hi. A sepnate uah le kipezou petmah uhi. Training a telloute le refreshment leh ann huan khawng in ana buaiden ua, FS-nu le khebawk kawm in suun nitum in ana tangden zel hi.

Dhemaji khiatlah huai mahleh innlam zuan a ka kalsuan khiak ni di a hongtung a, Thohtanni (16^th Sept) in innlam zuan ding in ka hong kisata hi. Mundang a kimu hetlou “Phek” hoihtak tua mun ah kizuak om a, tuanglai a phahdin deihhuai kasak ban ah ka “Zinpak” ding in lei ka-ut a, vuah nuai ah Heutupa (Field Superintendent) leh Pastor Mang in hon valeipih uhi.

Zing-annek khit in Heutupa (Field Superintendent) makaih in semtute mi 2 (JK leh Lun) tawh Dibrugarh Airport lam kazuan ua, Airport ah kikhelahtak in ka kikhen uhi.

Nitaklam dak 2:40 lakvel in Dibrugarh apat Kolkatta zuan in ka hong lengkhia a, Kolkatta katun in Pastor Khamzalam (EBCC Kolkatta) in honna dawn in a Quarter ah sawtlou ka vatawldam hi. Nitak-ann ne manlou ding kahihdan athei ua, huchi’n ka tawldam sung in Pastor-nu’n nekding tuamtuam hon bawl in gilvahtak in hon khakhia uhi.

Nitak 8:55 lak in Kolkatta Airport apat kong lengkhe nawn a, Delhi Airport apat ka pawtkhiak in nitak dak 12 lak gingta hi. Nitak in lampi thoveng a, traffic omlouh ziak in sawtlou nung in zinglam dak 1 lak in inn katungta hi.

Hiai training nadi tawh kisai ah noute thumna tamtak kidong ahihdante hoihtak in ka nathei a, ahun ma apat ana thum den a inn damtak a katun masiah thumna a honna delhzui dente tung ah ka kipahna alian petmah hi. Na thumnate uh ziak a lohchingtak a program kizouthei ahihman in navek ua tung ah kipahthu ka hon gen hi.

Setan in hiai program subuai ut petmah ahihdan ka theihna bel hiaite ahi...

·                     Ka kuanna ding Flight ticket kila pen a flight a hong ki cancel ziak in ticket lak thak ngai a,                     Dhemaji apat Heutupa’n hon khak thak nawn hi.

·                     Training hun chet in Dhemaji a semtute thakhat thu in damlouhna neuhneuh nei in buai vengvung            uhi. Khenkhat te bilna, khawsik, khebawk chihkhawng in ana om uhi.

Setan in hon sukbuai sawm ahihdan ka chiang mahmah mai a, noute thumna ziak a damloute le hongdam ua, hoihtak a program kizou ahihdan kathei chiang petmah hi. Tuaban ah nidang in training hun a ka din sawt chiang in ka khe khawng bawksek a, tutung bel bangmah chilou in zawh tanpha taksalam ah chauhna le om hetlou hi. A gal apat thumna a nana pan ua, setan gal nonna doupih ziak un kipahhuai kasa petmah hi.

Dhemaji a semtute’n tutung Training hun a azil khiakte uh a phattuampih chiat nadi uleh Pathian’ gam adia hattak leh hangsantak a hongpan touhzelna ding un thumna ah phawktou laile chih deihhuai kasa a, tuaban ah REBUILD AND RESTORE in hichibang a mi tamtak Training apiak zomzel theihna ding leh Pathian’ gam adia kal asuan touhzel theihna ding in noute thumna ka hon ngen lailai ahi.

Lungdam mahmah ing...Toupan navek un a vaan vualzawlna in hon vualzawl chiat hen!

LB Muan

Director,

Rebuild And Restore

New Delhi

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.