I TENNA GAM AH KI-INNTEKSAK NI

Gelhtu: LB Muan

Director, RnR.

15th Aug.2019

India ah Hindu Kulmuut tamtakten ei Christiante leh Muslimte hon muhdahna mahmah khat uh ahihleh Patriotic honsaklouh ziak uh ahi.

India leitang it ziak a hinna ana pia Muslim mi tamtak om mahleh tunitan India ah ki-inntek saklou tam petmah uhi. India leh Pakistan te Cricket khawng aki mawl hun ua Pakistan ana panpih, India leitang a piang a India buh-le-meh ne a khawsa a India gam a hamphatna teng tang hina zenpi a India kalh a gamtaang leh paupau tampitak om uhi. Huaiziak mah in India a Hindu ten Muslimte a muhdahna uh lian petmah hi.

Koi hiam ah Pakistan leh India thu aki genkhakna ah India pahtawi leh panpih a kampau zangkha khenkhat a om zenzen chiang in bel tuate Hindu ten nak pahtak law mahmahzel uhi. Muslim te apan "Unau i hi uh, India ka gam ahi" chihdan kampau khawng a hong pawt chiang in Hindu te kipaklua in tui-gai pah theizel uhi.

Muslim te bang in ei Christian-te le India ah ki innteksak zoulou deuh i bang uhi. Hindu ten Christian sahkhua pen West lamte sahkhua dan in koih ua, India kum tamtak ana uk a ana sikden te sahkhua kikoppihdan a hon koih zawkmah utawh, ei ki inntek sakdan i siam zohlouh utawh, India a Hindu ten hon muhdah uleh ahi di mah abang hi. I teenna gam paidan zui a, i gam it a i ki-innteksak pen Pathian deihdan mahleng hi ahi.

Christian gam Great Britain in India kum tamtak ana uk-khum in, itna leh hehpihna tel hetlou a India mi-le-sate ana enkol ua. India hauhsakna tamtak ana paw-mang ua, India mi-le-sate mihing bang ale mulou a ganhing bang a ana bawl ua, mi tamtak ana that ua...Christian kichite'n Jesu itna suklat naksang a Divide and Rule policy tawh ana bawlsiat India mite adin Christian kichite muhdahhuai lawtel di mah ahi.

Huaiziak in, India nithupite Independence Day/Republic Day chih nite khawng in i gam it lawsam ihi chih suklatdan siam in, mite lak ah alah khiakdan bangle siamdeuh le hiai sang in Tangthupha puanzakna nasep ah ki tuitum theizaw ding inle gintak-huai hi...

I khua-le-tui hihnatak zaw Van ah ahi, ahihziak in tuagam i tun ma in tua i tenna gam ah leng ki-inntek sakdan siam ni.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.