HIAI KHUA NA PAWTSAN THEI KEI DIING UH

Gelhtu: LB Muan

22^nd March 2016

May 24 (thohlehni), 2005 kum ahi. Zingkhua hong vak a, ka lawmte tawh niteng a ka nasep uh sem ding in ka hong kipankhe nawnta uhi. Mi nih-nih a kiton in singtang khuate ah tangthupha gen ding in ka omna inn uh kon nuse nawnta uhi.

Bus a dakkal bangzah hiam katuan nung un ka kumkhia ua mi tenna khua kazuanta uhi. Ka lawmpa Gabin (Assam te) tawh kou tegel ka tonkhawm ua, lampi lian apat khaw omna zuan in mual kong kaltou uhi. Himachal bel mual sangthei mahmah a, mualkal gimhuaithei petmah hi. Ka bag uah Bible, Caset (Jesu film), tract, comics chihte pua in ni-sa nuai ah mual kongkal uhi.

Mual a inn omna mun katun tak un kathil puakte uh hawm kawm in Pathianthu gentheih dandan in kagen kawmzel uhi. Tua ni a ka khaw hohna uh bel kalut tuung uapat mai-ngal huai hetlou ahi chih kathei ngal uhi. Koule inn teng luut suakvek kasawm thouthou ua, aneu-aliante kiang ah tract khawng hawm in ma kasawnzel uhi.

Atawp in chu Kristiante muthadah mi bangzah hiam ka tuakta uh a, ka lawmpa tawh hon man taangta uhi. Dotna tuamtuam hon dong uh a, hon vaw dia mansa ahi mai uhi. A hon vuak mawk di ulah hi sazoulou deuhzel in a om uhi. Ka thiltawi teng uh hon suhsakvek ua, “Na I-CARD uh hon lak un” achi uhi. Ka I-CARD uh bel bang mah ding chi ahi kei ua, ka mawhna di uh azawn ut ziak ua hon ngen ahi lel uhi.

I-CARD lah di ka zawn chiang un ka muzouta kei ua, kabuai petmah uhi… “nidang a zaw ka puanak sa-khau khawng a kuahsek hi ing a, tuni akoi a om ahi dia aw” chi in kalungbuai petmahta hi. Ni lah niamta, maban bangchi ding chih lah kitheilou…lungsim bel patausim mahmahta hi. A hon mattang theihna di uh remchang sa in “Na I-CARD uh non lak kei ualeh hiai khua na pawtsan thei kei ding uh” hon chi uhi.

Inn ah khat in I-CARD va lak ding chih lah Bus a leng dakkal bangzah hiam luut di. Lawmte kiang ah I-CARD hongpia un chia phone di chih leng tua hunlai in phone ki-neilou zel. Ka lawmpa tawh gen di le theilou in a khut uah ka omta mai uhi. Ka bag uh ka loklok ua lah bangmah hong ke ding le om nawnlou…lungsim a Pathian panpihna ngen kawm in achih dandan un ka om mai uhi.

Huai khua ah nitak hon koih le uh a khaw upa-te uh hong kihou khawm di ua bang hon lawh di uhiam chih gen theih ahi kei. Ka mangbangthou mahmah uhi. Lungsim bel paisau mahmah mai a, beidongsim petmah a ka omtak un Pathian thil-hih lamdang hong kilangta hi. Chik mah a ka I-CARD ka Bible kal a kakoih ngeilouh tuh huai ni in ka Bible apat hong ke-khe mawk hi…thillamdang ahi…ka Bible kal a ka I-CARD bangchidan a ana om mawk adiam chih ka ngaihtuahtuah chiang inle katheikhe bun kei. Ka puanak a kakuah gige ahi. Bible ah chikmah in kakoihkha ngeikei himhim.

Ka I-CARD kalakta hi, huchi in a suanlam ding uh dang aom nawnta kei. Kei kiang ah “Nang na pai dia na lawmpa apai theikei ding” hon chi ua, ken hehpihtak in ka nih un hon paisak mai un chi in ka ngen ngutngut mai hi. Mawhna neilou kahih chiang un hon mawk khoih ding ulah a ngam chiah kei ua, a suanlam ding ulah anei nawn kei ua, atawp in hiai hon gen khum uhi, “Kin-a-kin in hiai khua pawtsan un” hon chi ua, ka vanteng ulah hon suhsak khin ahihchiang ua koule kin-a-kin in khua kataipawt sanpah uhi. Huchia huaikhua kong pawtsan nung un lampi-lian zuan a ka paisuk uleh ka lawmte mi nih hiam khawdang a vakuante kontuak ua amau tawh Bus a tuang in innlam kazuanta uhi.

Bible a ka I-CARD hong kia mawk chih pen kei ding in thillamdang ahi. Toupan zaw a tate hon kem na mahmah e ka chilou thei kei!

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.