GINNA PETMAH TAWH...

Gelhtu: LB Muan

18^th Jan.2020

Sungkuante tawh innlam a Khristmas zatkhawm louhna kum 6 bang phata hi. Sungkuante’n “Sungkuan kim a zatkhawm ut huai a, innlam ah Khristmas hongzang un” chi in leenna ticket hon laksak uhi. Huchi in innlam ah Khristmas ka vazang uhi. Nuamsa chu kahi di ua, pai hun tungbaih kasa mahmah uhi. Kha-khat sung innlam a va om himahle ung hun-awl ka nei man kei a, tawldam manlou in inn ka nuse nawn uhi.

January 15, 2020 in Imphal apat Delhi zuan in ka innkuan un Air India in ka hong leng nawn uhi. A last line ah ka tu uhi. Ka nau uh window kiang ah tu den a, a ihmut hongsuahtak in alai ah ka lumsak ua, kei a window lam naihpen ah ka va tu hi.

Leenna a ka tuan chiang in window ah ka daksek a, mualsang taktakte khawng ka en-en sek hi. Hiai ni in le window ah ka dakdak a, himahleh meipi asah luatziak in meipi chihlouh thildang et ding bangmah ka mu kei hi.

Leenna meipi tung ah leeng a, nitum dekkuan ahihman in nisa neem hiai-hiai hi. Nitum dek ka etlai in ka lungsim ah thawmhau na liantak ka nei hi. Ka thawmhau na bel hiai ahi. Khaloh neilou a Pathian na sem ing a, ginna petmah tawh hiai Ministry poimohtak kalsuanpih touh-touh lai ding ka ngaihtuah chiang in kalung a liap mahmah mai hi.

Delhi tunkal le ka ngaklah hetkei, hun paisa a ka tuahte khawng ka ngaihtuah a, ka khasiat tha bang suak hi. Neihsa sum hiam ahihkeileh sum nak hoihtak nei le hilou a, hiai ministry kalsuan touhpih lailai ding ka ngaihtuah chiang in ka lung a liap petmah hi. Khateng a “Tukha bang a kichi mahmah dia aw...” chi a lungsim seng vungvung a ginna petmah a ki-ngak pen thil haksa leh gentheih huai mahmah hi.

Hiai bang a thazoitak leh maban hu-phulhtak a ka ki ngaihtuah dedu lai in Pathian in hon houpih a, “Hiai leenna le ginna petmah tawh tuang chin a, meipi tung ah leeng a, pilot in damtak a Delhi hon bohpih di chih ginna petmah tawh tuang chin a, silou a damtak a inntung di ginna tawh leenna na tuan ngam leh bangziak a ginna tawh ministry kalsuanpih ngamlou ding?” hon chi hi.

“Ahi mah ve maw Toupa” ka chi a...kei hatna hilou a Pathian hatna leh Ama’ pi dandan a ginna tawh kalsuan touzel ding in ka lungsim ka bawlrem nawn hi.

Hun tamtak ah zaw lungkiat nadi tam petmah hi. Sum-le-pai haksatna leh khenkhatte bawlsiatna tekhawng in tha teng zoisak gawpsek hi. Himahleh Pathian in a hon kalsuanpih dandan a kalsuan dia ka kipiakna pen ka lenkip tinten lai hi.

Elija nek di tamsamlou a koih pan hon pizel ding chih ginna nei ing...

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.