DAIH DIDE DING HILOU AHI

Gelhtu: LB Muan

4^th Jan, 2019

19^th December 2018 ahi a, mi inn apawt ka hi ua, ka pawtna mun ua nitak aan ka nekkhit un innlam zuan ding in ka innkuan un ka hong kisa uhi. Phalbi lai ahi a, khua votlua ahihman in Cab book in ka omna mun uah kana ngak uhi. Ka Cab book uh hongtun in a mailam mit khatlam chouh hoih ana hi a, nitak mialtak nuai a tai ding kahih man un ka lungsim khat anuam keisim hi.

Car a ka lut leh driver-pa kiang a Jesu lim kikoih kamupah a, huaitak in driver-pa kiang ah Khristian ahihleh-hihlouh kadongpah hi. Aman le Khristian ahihdan hon gen a, keile Pathian nasem ka hihdan khawng ka gen leh kipak mahmah mai hi. A kipahna mahmah hon gen a, nitak inn pai dia a kisak laitak a kou a cab book khachet, huchia aman le ka omna uh kawm sim ahihman in cancel mai asawm leh a lungsim ah “va pai in” chia anoh khat a om ziak a hongpai ahihdan hon gen a, “Pathian in hon sawl ahi, i kimuh di uh adeih a ahi” chi in kipak mahmah mai hi.

Keile kakipak petmah hi… zinkualna hiam ahihkeileh vakkual hun in auto/taxi/train/flight chihte khawng a katuan chiang in katuanpihte hiam ahihkeileh a driver-te houpih didan lampi kazongpah a, huchin a sahkhua uh kadongzel hi. Gingtu ahihkei ualeh Jesu Pathian diktak ahihdan saulou bek in kagen malam teitei zel hi. Tun ken gen keileng a damsung ua Jesu khovel Hondamtu ahihdan zakha nawnlou maimah thei hi ua, kei tawh le kimukha nawnlou di huaiziak a kei adia le hichibang genna hun om nawnlou di...chih khawng ka ngaihtuah chiang in ka tuanpihte/driver-te kiang ah Jesu Pathian diktak ahihdan genlou in ka omzou keisek hi.

Hiai ni a ka driver-pa uh Khristian ana hihkhak zenzen pen in hon kipaksak petmah hi. Huai nitak chu kei a ngaikhetu in ka pang a, amah kagen saksak mai hi. Khristian hong suahdan khawng hon gen a, azak anuam mahmah mai hi.

Khristian ahihma in hindu ana hi a, huchin aji tawh ta aneih theihlouh ziak un temple tuamtuam leh mun tuamtuam ah kithoih in diangkual uhi. Huchin atawp in Jesu Pathian diktak ahihdan hon theikhia ua, Jesu a pianthakna nei in Gingtu hongsuak uhi. Pathian in a thumna uh dawng in kum 16 nung in ta hon nei ua, tu in tapa khat leh tanu khat nei uhi.

Pathian tung a akipahdan khawng hon gen a, Pathian in tanu leh tapa apiak ban ah khawpi ah inn bang le nei ua, huaiban ah tukumthak 2019 a car thak le nei di ahihdan khawng uh le honhilh hi. A innkuan khawsakdan khawng uleh Pathian vualzawlna a donte uh ziak a Pathian tung a akipahdan khawng hon gen hi. Pathian in ahinkhua a thillamdang ahihte kei kiang a agente midang tamtak kiang a le genzel leh gensawnzel ding ahihdan le honhilh hi. Lamtawn in kahoulim ua, inn ka tundek un “honna thumpih in aw” chi in thumna a phawk di bangzah hiam hon gen a huchin ka innkiang uh katuntak un gari apat kum in mangpha kikhak in kakikhen uhi. Vakkualna ah Khristian Driver tuakkha ngeikhollou kahihman in huai nitak chu kipahhuai kasa mahmah mai hi.

Ei gingtute bel “khovel vaak” ihi taktak mah uhi. Bangchituk in hoihlou in khalam ah hatlou kisa mahle Jesu a Hotdamna i neih ziaktak in “khovel vaak” ihi uhi. Thudik theite, Vangam lampi theite, Jesu Pathian diktak ahihdan thei a Jesu sisan a sawpsiangte ihih man un mial lak a meisel tawite ihi ua, paina di theiloute lampi hilhtu leh lamkaihtu ding chu ihi taktak mah uh ahi. Huaiziak in i teenna gam India a mi hichizahte adia meisel tawitu ihih man un i sepna mun leh paina mun khempeuh uah Jesu Pathian diktak ahihdan leh Hotdamna Jesu kiang chouh a om ahihdan i gengen ding uh ahi.

Nang-le-ken i gen keileh Jesu hong kumsuk a hong gen nawnlou ding ahi, Tangthupha gen nang-le-kei khut a ngakkhit ahita (Mathai 28:18-20). Athawn a i muh, athawn in pesawn ni.

Kalvary a Khros chouh mu a aki kilhden Jesu i mubatlouh chiang in kipahna gensawn ding kineilou mah chu ahi, ahia Jesu mutaktakten athil muh uh iim haksa sa uh hiveh aw…nang-le-kei bangchi i hi a unau…hun nanung ahi, daih dide hun a hilou!

 

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.