TOUPA MEISEL

Gelhtu: LB Muan

Lungsim a dim leet kam in a genkhia ichih sek bang un ka lungsim a kipahna dim leet saulou in kon gelh khe mai hi.

Rebuild And Restore a kipat tuung in sponsor khat le kinei lou hi. Bible College ah sem kawm in hiai ministry poimoh tak chu ginna liu-liau tawh ki pankhia in ki kalsuan pih hi.

RnR in tup-le-ngiim nih nei a, tuate ahih leh;

(1) Christiante lak ah Counseling Centre hon diing

(2) Gingloute lak a missionary sawl ding.

Sponsor di lah khat le omlou, sum neihsa hiam ahih keileh source of income ichih di mit a muhtheih khat leng omlou hi.

Hun sawtpi tak Toupa ka buan nung in nikhat chu hichi in thumna kon nei ta mai hi "Toupa, hiai ministry poimoh tak pan din non sawl a, sum-le-pai tampi tak seen na di ahi a, sponsor di lah khat le kanei kei...Ka bei dong petmah a huaiziak in hiai ministry paitouh pih dia non deih taktak leh tukha sung in sponsor tu ding mi khat bek hon pia in, a sum tam-le-tawm lam hilou in zakhat, zanih lel a pang ding ahih tak leh le sponsor ding khat hon pia in, hiai nang apan a sign hihen"

Ka thum khit a niziing zek in nurse khat in "Ka sawm-a-khat hiai ministry adin kon pe ding" chi in hon chiam hi. Toupan khakhat leng hon ngaksak lou in ninih sung in sponsor tu ding mi khat hon pepah hi. Kha teng in Rs.2000 hon khak sek hi.

Ken leng hiai pen Pathian meisel ahi, Pathian in a sign hon pia ahi, Pathian in hon pi zel ding ahi chi in Bible College a sem kawm a ministry ka paipih lai pen kasepna tawpsan in ka loinu tawh Delhi ah Counseling Centre kon hong ta uhi.

Sponsor tu ding adang lah kimu sam lou ahih man in ka loinun company khong ah hon sem a, achang in ken company a ka va sep hun leng om hi. Huchi in Counseling Centre luah man di leh khakhat nek-le-dawn di ka sutuah zou hamham ua, huchi in ministry chu awl-awl in hong paitou nel-nel ta hi.

Bangtan hiam nung in hon sponsor tu pen in sum-le-pai ah haksatna hon tuah ziak in hon sponsor zou nawnlou in kou le sponsor khat le neilou in ka omtou nawn uhi.

Bangtan hiam nung in private a sem nungak khat in anau tawh pangkhawm in khateng in Rs.2000 in hon panpih nawn a, private a sem mah tangval khat in Rs.200 in khateng in hon panpih hi. Toupa meisel mit ta kasak leh ana mit nailou ahi maw chi in ka lung a muangsak mahmah hi.

Hun sawt kuam tak hon panpih nung un amau le sum-le-pai ah haksatna te hon tuah ziak un hon panpih ut lawlai le uh le hon panpih zou nawnlou suak uhi.

Achang in panpihna mi khenkhat apat kidong cheuh sek mah leh permanent a hon sponsor tu di neilou in ki om nawn zel hi. A sum a tam-le-tawm lam hilou in Pathian sign, Toupa meisel in hon mitsan taktak hi ta mai hia chi in lung dongtak in ka om hi.

Huchia sponsor khat le neilou a ministry kon paitouh pih nilh-nelh lai un, sawt nailou apat RnR Bank Account ah khateng in Rs.2000 hong ki deposit zel hi. A hon deposit tu ding tunitan ka sui khe bun naikei uhi. Toupa meisel zaw mit nailou ahi maw chi in kipah huai kasa petmah hi.

Ka loinu khalawh lah tam hetlou, Counseling Centre luahman ipiak leh a khaloh kimkhat bang bei mai. Nidang in Sponsor ana zong mah leng kana loh sap ziak in Sponsor zon leng ka tawpsan mai hi. Ahia Pathian in a meisel hon det vak sak lai man in khamuanna lian tak kanei hi.

I Toupa meisel dia ana pang te leh achang a panpihna hon pe te tung a kipahna mittui luang ahi chih kon gen khiak ut ziak a hiai kon gelh ahi. RnR Ministry adia ana pang khate pan na thupi tak mai chu aki mangngilh ngeikei ding. Pathian in amau te salam, khalam, chidamna, sum-le-pai a vualzawlna, a sepna uah lamzan na leh a van vualzawlna in vuk hen chih ka thumna ahi gige.

(A min te uh leh omna kon gelh louh pen amau le mi theih a ut uh ka gintak louh ziak ahi. I thumna te uah amau te adin Toupa vualzawlna ngetsak ni)

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.