TOUPA HON NGIAT ZAW A TAWPKHAWK AHI

Gelhtu: LB Muan

“Toupa ahun ta e, ahun law mahmah ta” chi a hing ut nawnlou a lungtang puakkham di banghial dinmun a Toupa mai a ka lungtang ka sungbuak hun a Toupa’n kei hon houpihna ahi. Midangte adia a phattuam khak leh chia noute adia kon gelhkhiak ahi…

Mihingten Pathian adia banghiam I hih chiang in ei hih ut natan leh ei lungsim in hun a sak tan ki hih zel hi. Tua pen Pathian deih natan ana hi chitchiat khollou hi. Pathian gam adia kal i suanna leh sum-le-pai I thoh khiak na ah Pathian hon ngiat natan hih I hi na hiam…ki veel ni.

 

PATHIAN HON NGIAT NATAN KAL I SUAN HIA?

Pathian gam adia kal I suanna ah Pathian in hon ngiat natan kal I suan mah hiam?

Elija in Pathian thupiakte zui in nasatak in Pathian adin pang hi. Kumpi kiang a Pathian in gen di achih te vagen khe ek zel hi.

Inn a le om theilou in gamdai khawng ah gentheitak a aom hun leng omtham hi. Kerit luita kiang a akibuk lai in a lungsim ah bangteng a kilang diam maw…a innlum ngai mahmah sam ding in gintak huai hi. A nu-le-pa, a sangamte leh lawm-le-vualte lak a khawsa theilou hial a Pathian nasem a gentheitak a om pen haksa petmah ding in gintak huai hi. Ahia Elija bel a phun kei, Pathian chih dandan in a om hi.

Kerit luita kiang a akibuk lai in Pathian in anek ding tanghou leh sa jing leh nitak in va-aakte va pesak zel hi. Va-aak kih huai mahmahte piaksa aan nek ding chih pen thil baihsam hi hetlou ding hi. Inn a sungkuante tawh buh-le-meh limtakte ne baanlou a akhawsak hun in Elija lungsim ah bangteng a om diam maw…

Elija bel lui kiang a suangtum khawng lukham a zang a ihmu sek hiding in gintak huai hi. Huihvot a nun hun a ki tuamlum nadi puan khatbek neilou a zan ihmu theilou a aom hun leng omtham ding hi. Huchia gentheitak a aom lai in tua luita a tui hongkang zawmah lai a, Elija adin khasiat huai petmah ding in gintak huai hi. Hichiteng a tun nung inle Elija a phun nai kei…

Nikhat bel Kumpinu Jezebel in thah a sawm ziak in Elija alauta a, a hinna hum di’n a taimangta hi. Singliim nuai khat ah atu a, huai ah, “Kei di’n ahaksa lua, Toupa, ka hinna la mai in; ka pipute’ saang in ka hoihzaw tuan ngal kei a!” chi a thum in, sih diing Pathian kiang ah a ngenta mai hi…Elija lungsim puakkham ahi ta ding…Pathian pasalpha, phun hetlou a gentheihna teng pal ngam pa’n tu in sih ding Pathian kiang ah ahon ngen maimah ta…beidong leh khase law petmah a lungtang ki tamkham gawp zaw ahi ta di…

Toupa gamna I sepna ah eimah nopsakna tan lel leh min hoihna di tan lel a sem I hihleh Pathian na semkha nailou I hikha ding. Ei om utna mun, sep-utna mun, sep utdan, deih dan, nopsak dan, lunglutdan tan lel a Pathian nasem ihih leh Pathian lungkimna tan semkha nailou I hiding…

Pathian in ei apan hon ngiat pen a tawpkhawk ahi…beidotna tawpkhawk pal a, lungtang kitamkham hial tan a kal I suan chiang in Toupa lungkimna sukha kihi pan lel dan ahi. Mittui leng a pawt di om nawnlou a, i lungtang puakkham di hial bang a kalsuan beh didan leng thei nawnlou a, “Toupa, a hun ta e, ka hinna la tamai in” ichih hun hongtun hial chiang a Toupa adia bang hiam ki semkha pan chihna ana hi dan ahi…Toupa hon ngiat zaw a tawpkhawk ahi.

 

PATHIAN HON NGIATZAH I PEKHIA HIA?

Pathian gam adia sum-le-pai I piakkhiak na ah Pathian in hon ngiat zah I pekhe mah hiam?

Elija omna mun a luita a tui a kang tak in Pathian in Elija kiang ah, “…Zarephat khua ah hoh inla…meithai khat nang hon vak diing in thu ka peta hi” achi hi.

Zarephat khua ava tun in Elija in meithai nu kiang a nek ding leh dawn ding a nget in meithai nu’n Pathian min lou zen in, “sang bangmah ka nei hetkei. Ka neihsun tuh anvui tamlou kuang a om leh thawl khat a olive thau tawmchik om ahi mai hi. Huai ka neih tawmchikte kei leh ka tapa’ nek dia bawlna diing sing tom a hong kahi. Hiai tuh ka aan nanungpen uh ahi dia, huai baan tuh aan ngawl a ka sih uh ngai di” achi hi.

Elija in meithainu kiang ah, “huai na neih apat kei ading bawl masa inla a omlai teng nang leh na tapa adin bawl in” chi zawmah lai hi. Meithainu adin lungkham huai petmah ding hi. Meithainu lungsim ah bangteng a om dia, khatvei nek khit chiang a sih ding ngaak a om taak mai ding achih lai in tua aneih sunsun apat Pathian Jawlnei adia khenkhiak lai di chih tel, tua kia hilou a amau adi bawl ma a Elija adi bawl a neksak masak di hilai tel…

Meithainu lungsim ah bangteng a om mah diam maw…Huai khua ah meithainu khelkhel lou le Elija ana zintun ding mi neizou bangzah hiam zaw om kha ding uh hiven maw...meithainu bel beidong tawpkhawk, nek di a zonna ding leng thei nawnlou. Panpihtu ding leng kuamah nei nawnlou a khatvei nek a sih mai ding chia lungtang ki tamkham a beidotna tawpkhawk ana tuah lai a midang panpih lai ding chih bel dah huai petmah ding in gintak huai hi...Dinmun se tak a om a, sihna liimguam a tot lai in le aneih sunsun Pathian Jawlnei adin a khenkhe lai hi.

Pathian gam adia I thoh chiang in, ei adia poimoh teng I ngaihtuah nung a thoh khepan ihi hia? Ei khawsak nadia a tamzaw zang a tawmchik petmah Pathian adia khenkhe zel I hi hia? Ei man kilawm I sakzah I thoh pen Pathian deihzah hisek lou hi. En ngapzah I thoh pen Pathian hon ngiatzah hi khollou hi.

I utzah leh hoihsakzah in Pathian lungtang kipaksak zoulou hi. I thilpiak in I khawsakna a sukkhak a, I lungtang a dawtkhak hial a, Toupa hiai tantan zaw I chih hun hongtun hial chiang in Toupa gam adia banghiam kipekhepan ana hi ahi. Toupa hon ngiatzaw a tawpkhawk ahi.

Tua a tawpkhawk peel ah Jesu’ mel muh ahi pan sek hi. Mihing in i hihtheih teng i hih zawh chiang in Pathian in na sem thei pan hi. Tuipi san lehlam ah Toupa ading hi. Jordan lui gal khatlam ah Jesu in honna ngak hi, Jordan lui kan zou te lak ah i telkha hiam...

Toupa adia kal I suanna leh thilpiak ah Toupa hon ngiat tan kalsuan leh pekhetu hi ding in simtute Toupa’n hon vualzawl hen!

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.