TOUPA TAWH KA THU-KHUN

Gelhtu: LB Muan

15^th April 2020

Ginna petmah tawh ministry kipan ahihman in ministry adi leh innsung khawsakna dia poimohzah sum kisutuah zoulou a, haksatna genvual louh kituak touzel hi. Haksatna leh beidotna tawpkhawk a kituah hun in le Toupa’n hon taisan ngeilou a, a lampi di hon bawlsak zel in zahlak in hon koih ngeilou hi. Toupa bel i muanna leh ginna zahzah a muanhuai ahihdan kou innkuan in ka theichiang mahmah uhi.

2016 kum ahi a, Ministry a kalsuan zel theihna ding in ka nupa un pantheih dandan in kapang ua, khat in private company khawng ah semkawm in kaki toudelh uhi. Hichibang a haksatak a khawsa a Ministry aki kalsuanpih lai in lawm-le-vual mi nih-le-thum chihlouh gingtu kipawl khawmte apan haanthonna leh panpihna honglut aom kei hi. Khalam a muanhuai isak tata bang setan vanzat in hong pangthei zawmah uh a, khawsakna a haksat tawh lungkiat hun tam petmah hi.

Delhi khawlum lah AC zang zouloute adin thuak haksa petmah a, nitak ihmu theilou a aki om hun tam mahmah hi. Khawlum nuai ah tuivot dawn ding le ka nei kei zawmah uhi. Fridge neih zawhlouh ziak in khawlum nuai ah tuilum mah kadawn zel ua, dangtak le pha theilou hi. Delhi khawlum thuak agim huai tawh, khawsakna a haksat tawh, lungsim asih hun tam petmah mai a, khawvel lam en a kalsuan khiak a ut huai hun tam mahmah hi. Ahi a hon lung kesak pente zaw khawsakna leh sum-le-pai haksat ziak hiam ahi kei a, atung a kagen setan vanzatte ziak ahi pen mai hi.

Ka lungtang anat luat ziak in Delhi pawtsan ka ut tuntun mai hi. Nikhat chu Toupa mai ah ka lungtang ka hon sungbawta a, Toupa mai ah thukhun ka hon bawlta mai hi. “Toupa, hon hehsan kenla hiai kon gen di, Delhi a omlai dia na hon deih leh tukum sung ngei in Fridge hon pia in. Tukum sung a Fridge na hon piak leh Delhi a omlai din na hon deih chihna hi henla, na hon piak keileh kumnawn a Delhi pawtsan na hon phalta chihna hi hen” chi in kathum hi.

Delhi bel India a ka om khakna munte lak a nuamlou kasak penpente lak a khat ahi. Ministry adia poimohna liantak aom ziak a om kahi lel hi. North India a Mission Field hon leh ka mi-le-sate lak a Counselling Centre hon ding chihte ministry tup-le-ngim ahi a, Mission Field lam etkaina dia mun poimoh ahihman a Delhi ki pansan ahi lel hi.

Bible College a ka omlai in Toupa kiang ah ka na thumna bel hiai ahi, “Toupa kei sep utlam hilou in sem in na chih mah hon semsak inla, kei om utna mun hilou in nang om in na chihna mun ah hon koih in.” chi in kana thum den hi. Hiai ka thumna ka theihdet ziak in kei thu in Delhi ka pawtsan ngam kei hi. Sungkuante, lawm-le-vualte leh deihsaktute apan Delhi pawtsan dia thuhilhna kampau ka za mun petmah hi. Himahleh Jona bang a leh-tai kahih khak di kalau a, Pathian hon sawl ahihkeileh ka dingkhe ngam kei hi. Lungsim ahong nat luat tak in Delhi ka omlai di leh om nawnlouh di theihsakna Toupa kiang a ngen ka hipen mai hi.

Fridge ka deihluat ziak a Toupa kiang a ngen kahi kei a, ka maban ding thei ut kahi zaw hi. Kou neihsa a Fridge  leizou ding ka hihlouh man un kum hong bei ding ngak in ka om a, Fridge ngen a ka thumna mah ka leenkip hi. Huchi in bang chichi hiam in thakhat in Fridge man ding hong om guihta mawk hi. Fridge man di Pathian in hon piak in Delhi a omlai dia hon deih ahihdan ka chiang a, a kumnawn 2017 a pawtsan ding ka sawm pen ka tawpsan thak hi.

Pathian in Fridge man ding hon piak in khua votta a, phalbi kipanta hi. Huaiziak in a kumnawn khawlum kipatdek chiang a lei ding kana sawm hi. Huchih laitak in ka lungsim ah hiai honglang hi...Toupa tawh ka thukhun uh hi a, tukum sung a hon piak dia ka nget Aman hon peta a ken bangziak a kumnawn ngak ding ka hia...

Huchi in 16^th December 2016 kum phalbi laitak in Fridge ka lei mai ta uhi. Rs.20,590 a flash sale om laitak khat tuakkha in Toupan kimantak in hoihpi khat hon pia hi.

Delhi ka pawtsan utna zaw lian petmah a, lian deuhdeuh leng abang hi. Himahleh Toupa’ aw ka ngaikhe zel a, pawtsan dia hon deih ni atun chiang in kipaktak in ka nuse ding hi.

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.