PIANTHAKNA LEH PATHIAN SAPNA

(Khatvei zaw ka na piangkhial kha, anawn in zaw ka piangthak taktak hi)

(Pathian nasep sang in Nisa nuai a Rickshaw hek ka na teel zaw)

Gelhtu: LB Muan

Hun sawtpek apat ka hinkhua a thiltungte gelhkhiak a koih hoih di ka chisek a, himahleh gelh ngamlouh di tampitak aom man in gelhlou in ka omden hi. Pathian in deihna nei ahi ngei ding a, tuni February 1, 2019 in ka testimony ka hon gelh pan a, ka tu-lel dinmun ka tun masiah sunzom touta ding ka hi.

 

PIANTHAKMA A SIHTHEIHNA MUNTE APAN PATHIAN HOTKHIAKNATE

1. Sugnu khua ahi a, kum 7 lakvel ka hi ding hi. Khatvei pu-khri ah ka taallut kha a, awl chikchik a ka taalsuk lai in a kiang ah numei khat hongpai khachet in hong kaikhia hi. Huai nu om keileh tui lak ah tumsuk a suakta zoulou ding ka hihdan tutan inle ka theichiang mahmahlai hi.

2. Kum 8 khawng ka phak in zingkal khat lawmte khat in a tempawng tawi in ka luzaang hon satkha hi. Ka lu inch 2 khawng kek in ka lu apan sisan pawt in ka pumpi sisan in adim hi. Ka inn kong uh ahi khachet a, ka nu-le-pate’n khonvaktui ka lu ah buak in loulai tawn in khe in damdawi in ah hon taipihpah uhi.

Sugnu a ka omlai uh ahi a, damdawi inn le gamla petmah hi. Ka pa’n anung a honpua in damdawi inn ka tun un Doctor ana om nailou a, sawtlou nung in ken khua ka phawk nawnta kei hi. Kum 28 nung in ka pa’n hiai thu khatvei hon gen khanawn a, “Huai ni in chu na mitkang le dawkkhinta a, ka nau khahsuah keita ve, lohsam keita ve ka chiman hi” chi’n hon gen hi. Bangtan nung a khua phawk ka hia chihle ka theinawn kei, Toupa’n ka hinna honna hawi sak ahi.

3. Kum 10 lakvel khawng ka hi ding a, Bijang Vaiphei Veng a ka teenlai un Tuibuang a Swimming Pool ah lawmte tawh ka va kisilzel uhi. Kei tuizap theilou ka hihchiang in aning ah ka omsek a, himahleh khatvei a thukna sikkha in tui ah ka tumsuk a, tui ka valhman hi. Ka kiang a lawmte khat in hon mupah a, hon kaikhe man in ka suakta hi.

4. Huai nung sawtlou in ka Ubiak (cousin) tawh ama lawmte nungzui in tuithalui ah kisil din ka kuan ua, Saron achihna mun uah ka kisil uhi. Huai in le tui ka zapthei naikei a, aning a om ka kichihlai in tui in tha-khat in hon nawk phei a, a thukna mun ka sikkha zawt hi. Tuilak ah ka tumsuk a himahleh buaisiatma in ka Ubiak in hon mupah a, hon kaikhe man hi.

5. Kum 10/11 di khawng ka hih in Bijang a Vaiphei Veng ah lawmte tawh singtum neuchik khet-vawkte ka kimawl uhi. Ka singzat uh hoih mahmah a, gik bi-beuh hi. Lawmte khat in hon khet leh asing hong leng in ka mit-taklam hon dengkha a, leilak ah ka kipuksuk a, ka taklam himahleh ka veilam inle khua mu nawnlou hi.

Lamka damdawi inn ah hon taipih ua, ka mit langnih a khua mutheilou in nitampi ka om hi. Ka mit in khua muthei nawn di ahihleh hihlouh theilou in lungkhamtak in ka om a, Toupa hoihna ziak in anung in awl-awl in khawvak neuchikchik kon mupan nawn a, atawp in ka mit anih in zattheih nawn hi.

Ka mit zattheih nawn mahleh ka kisukkhak nalam, taklam pen a pressure sang pahpah a, nisa nuai leh mei kiang khawng ah ka omchiang in leh lai ka sim chiang in sa pahpah mai hi. Bible ka zillai khawng in kalteng phial in check-up ding in ka kuan ngai a, Doctor siam tamtakte’n le a damna di theizoulou ua, a pressure control nadia damsung zatdi damdawi hon pia uhi. Eye check-up dia ka kuan chiang in Doctor ten ka taklam lunghihmohhuai asak ziak un honna admit hial sek ua, ki etsak leng thadah huai hial hi. State tuamtuam a ka ki-etsak khakna Doctor te’n ka taklam pen ka damsung seenzou dia hon gintaklouh ziak un treatment bawl didan gen-le-sak hauthei petmah uhi. Pathian hoihna tawh ka damsung ka set ka lam-en hi.

6. Pearson a El-Bethel Camp omlai 1993/4 lakvel ahi a, keile ka vatel hi. Ka damtheihna hoih chiahlou ahi chih ka thei a, himahleh bangchituk a serious ka hia chih bel ka na theikei hi. Pearsonte Biakinn sung ah sisan in ka lua a, huaitak in ka kiang a nupite patau in hon buaipihpah uhi. Damdawi inn ah kuan hon pawsuk a chihle ka thei nawn kei. Damdawi inn ka omlai chu ka thei a, Glucose tatlou in hon khai uhi.

Chau segawp man zaw ka hi ding a, ka damnung in khenkhatten asi di honna sa khin ahihdan uh hon hilh uhi. Kumkhat val damdawi ne in ka ki-enkol hi.

7. 1997 buailai in le sihtheihna di mun ah dingkha mahleng Toupa’n honna humbit hi.

 

PATHIAN NASEP KA NA UTLOUHDAN

1995 kum hi in ka thei a, Central Lamka ah Naupang Chialpina Camp a om a, kei le huai ah valut in halhthakna khat ka vatang tei hi. Ahihziak in hun hong sawt deuhdeuh leh piangthaklou ka hihdan ka kiphawksuah thak hi.

Ka pianthak ma in ka pa’n Pathian nasem din hon kun sek a, “Pawlsawm na zawh chiang in Bible zil inla ka nung hon zui in” chisek hi. Ka pa’n Bible zildi leh Pathian nasep di thu agen chiang in pau hetlou in ka omsek a, himahleh ka lungtang na petmah sek hi.

Ka U numei khat a pasal tawh Missionary a kuan ahi ua, suty zang dia innlam ahongpai un hichi in hon gen hi, “Nang Pathian na nahon sepna ding in kumthum khawng ka nathumta” hon chi hi. Huai agen ni apat ka U houpih utlou in ka mudah hial hi.

Hun hong paizel a, ka U pasal tegel huai hunlai in Mizogam ah om ua, sepna neituak uhi. Ka pa le mangbang ahi di a, hiai hon gen hi “Bawi, na U pasal tegel lah khovel nasem ahi ta ua, ka nungzui a Pathian nasem ding nang lou kuamah om nawnlou ahi. Nang pawl sawm na zawh chiang in Bible zil inla ka nungzui in Pathian na sem in.”

Hiai ka zak nawntak in ken le “Na utleh na tupapa (ka U tapa huailai a kum 3/4 vel di) alet chiah sawl ve” ka chih khum leh ka pa dai vengveng mai hi. Ka pa’n ka kiang ah thil gen mengmenglou a, banghiam agen sunsun chiang abel a lungsim a sawtpi omta atawp a hon genkhe khong ahi sek hi. Ken le thil serious deuhte ka gen mengmeng sek kei a, khatvei ka gen chu ka thupukna ahi chih ka pa’n thei hoih mahmah ahihman in huai nung Pathian nasem din hon sawl khanawn kei hi.

Ka pa Pastor ahi a, unau mi 6 ka pha uhi. Ka pa khaloh tawmchik a gentheitak a ana khawsa ka hi ua, Pathian nasem a gentheitak a khawsak nawn ding chih ka ngaihsut chiang in ka lungtang teipi adawt tawh kibang mai hi. Huaiziak in nisa nuai ah “Rickshaw” ka hek utzaw hi. Rickshaw hek a khawsak a Missionary vaktu apan le ka na utzaw hi.

Navy Officer ka na ut a, NDA alut a Navy Officer hih ngeingei ding chi in NCC khawng ka tel a, Imphal a Mantipukhri a CRPF te camp ah thau ka va kaap zel ua, thaukap leng ka siam mahmah hi. Delhi a Republic Day a parade na atel din Churachandpur District ah mi nih chouh teel khia uh a, ka figure hoih asak ziak un Republic Day atel dia heutute first choice ka na hi ahi.

 

JESU TAWH KITUAHNA LEH A NASEM DIA KIPIAKNA

1998 kum ahi a, Central Lamka ah Tuailai Camp om hi. Huai ah keile ka valut a, ama a ka pianthakna lah diklou ahihchiang in pianthakna diktak neih ut in Jesu zon chihtak in ka va zong a, “Zong in na mu ding, lungsim taktak a zong ten amu uh” chih zaw adik petmah hi. Ka va kimusuah a, pianthakna November 6, 1998 in ka nei teita hi. Adik in zaw kei zon ziak hizawlou a van mun nusia a mihing a hongpiang a Aman kei hong zawn khiak ahi zaw hi, thupi ka sa Jesu’n hon it na. 

Tu khawnung a ka ngaihtuah chiang in tua Camp ana sai Tuailaite tung ah ka kipahna a lian petmah hi. Kei mikhial hotdam a ka om ziak in avai saitute’n vaan ah lawm-man amu ngei di uh chih ka gingta hi. Ka pianthak tuung a ka Bible tang deih mahmah ahih leh Isai 53:3-5 ahi. Ka la deih pen ahihleh “A Lamdang hi, A Lamdang  Lua” chih la ahi.

Hiai Hotdamna Camp ah Jesu ka hondampa dia ka saan kia hilou in ana sem dia sapna le ka za a, utlou pipi in ka na kipekheta hi. Ka pianthak nung in Delhi a Republic Day atel ding in NCC Heutupa’n Inn ah hongchial hial a, himahleh ka hinkhua ana kikhekman ta…NCC le ka tawpsan a himahleh anung in Certificate hon pia ua, tunitan azat nadi aom ta kei hi.

Pathian nasem dia ka kipiak nung inle Navy Officer hih utna abei thei pah zenzen kei, application form te khawng ka muh chiang in ka mittui ka nulnul zel hi. Navy chinna dia application form a dinsang dan kigelh khawng ka en a, kei saan dan khawng ka kiteh sek a, saan lam ah chu ka ching mahmah mai hi. Ka khutzungte tanpha hi zitzet dia hoihtak a ka na kep ahi. Ka pa leh ka U thumna ana ngaihsaklou in a sawlna uh ana nial mah leng Jesu sawlna ka nial zou kei, kei adia a hinna pepa zaw kenle ka hinna ka piakkik tei a kuul hi.

Toupa zaw kei din ahoih petmah hi. Ka pianthak ma a sihtheihna tampitak lak apat honna humbit a, a hotdamna hon pelai. Hampha ka kisa petmah ahi. Ka testimony la ngai utten youtube ah “Kei lel tak” chi in zong le uchin youtube ah akoih om kha ding uhi.

Ka Testimony hon simsakte tung ah kipahthu kon gen a,

Asutzopna pen “Ka nu mehhuan mah limpen” chih ahi. Sutzop ding…

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.