TATEN NU-LEH-PA SUN IN ENTON

Gelhtu: LB Muan

 

Nu-leh-pa sisan a piang taten kuadang sunlou in anu-leh-apate mah uh ana sun uhi. A hoihna lam uh le sun ua, ahoih louhna lam uh leng sun uhi. Hiai mangngilh in nu-leh-pa khenkhat ten atate hoihlou asak sim ua leh aki siamtanna di un “kei zaw huchilou hi ing a” chi sek uhi. Ahoih lam hi in ahoih lou lam hita leh taten nu-leh-pa te a sutdan uleh etton dan uh khovel thilte apan tamtak muhtheih om mahleh Bible apan I en ding.

 

A HOIHLAM A KI SUTNA/ETTONNA

(Abraham ji iitdan asiam bang in Isak leng ji iitdan siam mahmah hi).

Abraham hinkhua hoihtak a I suut detdet leh ji iit dan siampi ana hi ahi. A ji Sara khasiatna di bang hiam ahih lam kimu lou hi. Kum tampi tanei theilou a om himahle uh Sara damlai in ji dang neih di ana ngaihtuah khalou hi. Huai hun lai a midangte tawh ana kibang hetlou chihna ahi.

Sara in Pathian piak ding ngak zoulou in Hagar tungtawn a ta neih ana sawm hi (Gen.16:1-5), hiai bel Abraham deihdan hi din I gingta kei, himah leh aji kipah sakna din aji thu ana mang maimah zel hi. Sara in Hagar a bawlgentheih in Abraham adin nuam lawtel din agintak huai kei (Gen.16:6), atawp in Sara in Hagar nawhkhiat di thu hon gennawn hi, huai in Abraham dah sak mahmah hi (Gen.21:10-11). Hiai teng nung in le Abraham in aji a iitna kiam tuanlou in aji sih dawng iit tak in kem hi...tampi gen kei lele hiai teng apat in Abraham ji iitdan theihtheih mai hi.

Isak le apa ‘Abraham’ sun in aji ‘Rebecca’ iitdan siam mahmah hi. Amuh ngei leh theihngei le hilou pi aji ding in neithei pah in iit pah ngal hi (Gen.24:67). Hiai in aji tung a akipiak zawhna langsak ahi. A theih ngeilouh ji dia nei himahleh aji a iitna ding in hun bangtan mah ala kei, aki muh ua pat iit pah ngal mai hi. Apa bang in aji lou numei dang lunggulh hetlou a, Rebecca in ta nei theilou in hun sawtpi tak khawsa mahle uh ji dang neih di ana sawm hetkei. Apa apan ji iit didan ana zil a, huchi in apan aji a iit mahmah dan in aman le aji ana iit zou mahmah hi.

 

A HOIHLOU LAM A KI SUTNA/ETTONNA

(Abraham in zuau gen a aji kihumbit nadia ana zat bang in Isak in leng aji kihumbit nadin ana zang hi).

Abraham a omna gam ah kial atun ziak in Egypt ah paisuk hi. Sara bel numei melhoih tak ahi a, Abraham in aji ziak a ahinna ataan khak di lau petmah in mi lak ah ‘ka sanggamnu dan in kigen in’ chi in Sara thuzawh hi (Gen.12:10-16). Hiai mun chouh hilou in Kumpi Abimelek mai ah le unau dan in kigen uhi (Gen.20:2,11).

Abrahamta ‘Isak’ hong let in numei melhoih tak ‘Rebecca’ aji din hon nei a, miten aji melhoih ziak a amah hinna alak ding uh ana lau mahmah hi. Apa sih nung in Gerar mun ah khawsa a, tua lai in aji ziak a asih ding lau in apa kihumbit dan enton in ‘ka sanggamnu ahi’ ana chitei maimah hi (Gen.26:6,7).

Abraham in Pathian humbitna muang ngamlou in aji zuau gensak in ana kihum gige hi. Isak inle apa tuah bang thil ahon tuah tak in apa hihdan enton in apa kihumbit dan in kihumbit hi. Abraham in zuau genlou in Pathian muang in Pathian kihumbitna in ana zang bang hileh ata Isak in huchibang hun lauhhuai a Pathian belh di ahihdan thei ding a, apa hihdan enton ding in gintak huai mahmah hi. Himahleh Abraham in etton di hoihlou tak ana hihkhak ziak in Isak in apa enton in zuau in ana kihumbit tei mai hi.

 

THUKHITNA

Paunak a kigen sek ‘Sakhi api asan leh anou le san’ achih uh zaw ana diklaw dan mah ahi. Taten le nu-leh-pa hoihna hi in ahoih louhna uh hileh ana sun mahmah uhi. Nu-leh-pa mel ahoih leh tate le melhoih uh, melse te tate ana hoih khollou taangpi, laisiamte tate laisiam taangpi uh, lungsim hoihte tate lungsim hoihdeuh, ase te tate lungsim le ana sedeuh, beven te tate beven taangpi uh, mihoihte tate hoih taangpi uh.

Chiamnuih a kigen sek bang in mahni sisan a piang taten nu-leh-pate sun lou in innkiangte ahihkeh midang sun mok le lah adiklou om chihna hizel dia, nu-leh-pa asut di mah uh chu ana hi dan ahi. Tua theisiam lou in nu-leh-pa khenkhat ten a tate uh kiang ah “kei ka neulai, tangval/nungak lai a huchi lou kahi, na hoih kei lua uh, hichi un kha chi un” chi in tate thuhilh sek uhi. Adik a gen in zaw tuabang gengen nu-leh-pa ten a hinkhua lui uh suut kik le uh deih huai mahmah hi. Kei ka hoih kei a ka taten hon sun uh eive chilou in tate mawhsak sawm teitei uhi. Hichibang nu-leh-pate chu ‘Ka hih dan hilou in, ka chih dan in hih in’ chi te ahi uhi. Tate bawl hoih dia kisak ma a eimah kibawl masak pen ana poimoh lua ahi.

Sapte thupil in ‘Live as if the Next Generation is watching you’ achih uh kha diklua ana hi ahi. Tuailai ihih lai leh ta ineih ma khawng in ikhang hong om di ten hon en dan a ngaihtuah in khawsa le bang chituk in ihoih di ua…I ta hong piang di ten hon en daan a ngaihtuah in nungta le ihoih thei mah di uh maw...! Tate mai a utdan teng a gamtaang a, amuh ua thil hoihlou teng kihih ngamlou zenzen lou di, ka taten hon enton kha di uh kichi di in utlou pipi a le kihoih sawm teitei didan ahi.

I tate om didan, hin didan, khawsak didan, hunzat didan, Pathian limsak didan, mihoih didan ilungsim a I ngaihtuah leh deihdan chet in ei om masa le itate hong hoih mai di uh ahi.

Apiang nailou I ta di ten hon mu bang a ngaihtuah in leh Pathian hon mu gige zahtak in hinkhua zang le ji-leh-pasal I neih nung chiang a le I tate ei sun a mihoih taktak hong hi ding uh ahi.

            “Ka hih dan hilou in ka chih dan in hih in” chi lou a “Ka hihdan in hih in” chithei nu-leh-pa hi ding in Toupan hon vualzawl  chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.