REBEK HOIHNA THUGUK

Gelhtu: LB Muan

3th March 2014

 

[1] NUNGAK SIANGTHOU LEH MELHOIH

Rebek bel nungak siangthou pasal toh kipawlkha ngei-nailou leh melhoih mahmah ahi chih Bible ah chiangtak in ki mu hi. Melhoih ahihman in adeih pasal leng tam mahmah diing in a gintak-huai. Pasal tampite’n a haipih phialphial uh leng ana himaithei hi.

Nungak hi in pasal hitaleh mi melhoih taangpite zulhzau ut mahmah uhi. Rebek bel nungak melhoihtak ahi a, tangval adeih penpen tawh a utdandan a che-thei ding leh ahun teng a tangval kheng zetzet thei ding himahleh nungak dangte banglou in omdan hoihtak in om a, a siangthouna ana keembit tinten hi.

 

[2] FEL LEH KI-NGAINIAM

Isak ji di hel dia kuan Abraham’ Sila Eliazar in Rebec kiang ah tuidawn diing a nget in Rebek in pepah hi, huai kia hilou in “Na Sa-ngawngsaute’ dawn diing leng kava tawi diing, adawn kham mateng uh” a chilai hi. Kuamah sawl leng hilou in Sa-ngawngsau 10 (sawm) takte dawn diing tui tawi din hong kisa hi.

Sa-ngawngsau 1 (khat) in tui litre 100 (zaa) vel gaizou hi. Sangawngsau 10 (sawm) tak adi bel litre 1000 (sangkhat) poimawh chihna ahi. Tuikhuk bangchituk in nai lehle Litre 1000 (sangkhat) numei khat chouh in tawi ngah diing chihzaw thilbaih lua hilou diing hi. Tui bangzah tawi hiam chihzaw i theikei, ahia sa-ngawngsaute’n adawn kham matan uh kagimta chimailou in tui vatawi den hi.

Hiai Abraham’ sila mouhel dia vakuante Rebek in atheih ngeile ahi kei uh. Mi’ sila maimai ahi ua ngaihsang luatna ding le om khollou ding uhi. Ahihziak in Rebek in ana simmoh hetlou hi, hiai in Rebek a ki-ngaihniamdan hon hilh. Rebek in sa-ngawngsaute’ dawn diing tui atawi lai in hiai sila ten ava tawipih uh chih Bible ah i mu kei, Rebek in gim pipi a tui atawi hang in phun hetlou hi. Numei dang bang hileh “Na tui di uh hon kitawisak a, pan le non panpih kei uh, kon theih ngeile nahi kei uh” chi in innlam pai daih diing in a gintak-huai.

Nungak melhoihte bel ki deihkhop ut viau uh a, atheih ngeilouhte uh houpih nate dawng khollou uh a, hi vat-vat uhi. Rebek bel nungak melhoihtak himahleh Abraham’ Silate dotna teng hoih taktak in dawng hi, hiaite ziak in Rebek bel nungak-fel leh ki-ngainiam mahmah ahi chih chiangtak in theihtheih hi.

 

[3] PATHIAN MUANG

Abraham’ Sila Eliazar in mouhel dia hong kuan ahihdante, Rebek toh a kituah dante uleh Pathian in athumna adawn dante agen teng Rebek in a zaak chiang in Pathian apan ahi chih gingta pah a nialvual in koihlou hi. “Isak bangchi mel pu ahi dia aw? melsia hia, melhoih? mihoih hia, mikhel? adin tom hia, adin sang? Jite iitdan siam di hia? milungsim piching hia? mi zaidam hia? bang siamna nei a?” chihte atheih kholh bangmah om hetlou hi…khatvei mahleng amuh khak ahi kei…Ahi a Pathian aginna ziak in Pathian’ thu mang diing in kisapah mai hi.

Anu-le-pate’n “Hiai mipa nazui di hia?” achih un Rebek in bangmah gen tamlou in “Hi, kazui di” chipah mai hi. “Ka pasal di tawh khatvei khawng bek kakimu masa di uh” chi’n le a ngiatkei, “ka lawmte mangpha kon khak phot diing” chi’n leng a ngenkei. Rebek in apian nagam paisan a, a nu-le-pa, sanggamte, lawm-le-vualte paisan a atheih ngeilouh gam a, amuh ngeilouh pasal va nei ding a hong kisa mawk chu thupi mahmah ahi. Nungak melhoihtak ahi a, a omna mun uah a deih penpen tawh kiteng a nuamsatak a hinkhua zangthei dinmun ahi. Tu in a inn paisan leh adamsung a anu leh pa mu ngei nawnlou ding ahi chih leng ahaih kei, Rebek adin hiai thupukna lak baih hetlou ding hi. Ahihziakin Pathian a ginna akoih ziak in inn apat hangsantak in kal hon suankhia hi. Rebek ginna a thupidan leh Pathian a aki ngakdan lamdang in thupi petmah hi.

 

[4] A PASAL ZAHTAKDAN SIAM

Rebek in Isak agalmuh tak in sa-ngawngsau’ tung apan kumkhia in puan in amai khuh ngal hi. Nungak dang khenkhat hileh bel “kalam zotna gimhuailua” chi in sa-ngawngsau tung ah tuangden diing in gintak-huai hi. Rebek in Isak agalmuh in apasal ding ahi chih theitum nailou a, himahleh Isak ding a gintakna aneih ziak in sa-ngawngsau apat kumpah in Silapa kiang ah dong chian hi. Huchi’n Isak ahi chih atheih in a mai ki-khuh ngal hi. A pasal mai a aki niamkhiakdan sa-ngawngsau apat akum khiak apan chiang mahmah hi.

PATHIAN IN SIMTUTE HONVUALZAWL HEN!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.