SETAN IN HON LOK AHI.

Gelhtu : LB Muan  M.Th in Counselling

Director, RnR.

Bangtan hiam paita apat Lamka khawpi sung ah ganhing lamdangtak a si tamtak muh in om hi. Hiai in Lamka khawsung a omte kia hilou in muntuam leh gamtuam a omte lungsim ah ngaihtuahna tamtak piangsak hi. Mihing nasepna hidan agen pawl leng om a, damdawi khamtheih ngoh pawl leng om hi. Khenkhat in lah ganhing dan in gen ua, khenkhatten bel setan leh amah bete gamtatna hiding in gingta uhi.

 

1) MIHING.

Mihing hileh bel asa nek di hiam ahihkeileh zuak ding in gu zaw ding a, mulkimhuaitak a that in nuse mawklou ding hi. Mihing hih hileh bel ahihtu theihkhiak in omta ding hi. Guta leng kiman sek a, hiai bang hihtu khatmah leng kiman zoulou chih phetlouh mit a mukha khatle om tellou hi.

 

2) GANHING.

Ganhing dan a mute gen dan in Ui sang a lianzaw zek chi uhi. Tua ganhing pen mangtheidan a gen leng om hi. Ganhing sitawp om ahihtak leh leng asa le nezek hiam ahihkeileh balzak zek ding hi. Ak a ngong ah bottan geihgeih thei mawklou ding hi. Vok luguh bei a koih thei ganhing om tellou ding hi. Ban ah Lamka khawpi sung ah ganhing lamdang deuh om hileh hichitan kisel zou nawn mawngmawnglou ding a, matkhiak in omthamta ding hi. A gamtatlai mu kuamah omlou a, hichibang a mun tuamtuam a agamtat hun in a ganhing soisak pen thawmging zak in om ngeilou hi.

 

3) DAMDAWI KHAMTHEIH.

Damdawi khamtheih WY/Yaba ahi chi pawl leng om hi. Hiai khamtheih ahihleh kidoupi nihna hunlai a Hitler in a sepaihte nek dia German Chemist-te a bawlsak ahi. Sepaihten hiai damdawi anek uleh ihmulou in sawtpi omzou ua, a thahatna uh leng kibehlap hi. Hiai damdawi netute gamtatna ahi chipawl om hi. Mit a mute gendan a Ui sang a lianzaw zek chi uh ahihleh kuahiam damdawi khamtheih nekziak a ganhing suak chih khovel ah om nailou hi. Damdawi khamtheih nekziak a mohna bei ganhing mawk thah gige chih om ngeilou hi. Khamtheih nek ziak a voklu a pawlam bangmah chilou a aguh nethei chih om ngeilou hi.

 

4) SETAN LEH AMAH BETE.

Satanic/setan bete gamtatna hi ding a gingta hunkhop leng om hi. Setan bete sisan in kithoih sek ua, sisan leng dawn zel uhi. Mi muhlouh dia a omtheih ban uah thilhih theihna leng neizek uhi. A taksa uh inn ah om mahle uh a kha uh setan in a utna gamgam uh tunpih thei hi. Setan in a utleh leenpih a, singkung/gawlek khawng ah leng tuanpih thei hi.

 

---------------------------------------

THUKHITNA

Mihing, ganhing leh damdawi khamtheih nete ngoh dek lele ngoh theih chetlouhna di asan tamtak om a, himahleh Setan leh amah bete gamtatdan I suut aleh tuate gamtatna hi ding in gintak huai petmah hi. Mihing ahihleh leng setan panpihna tawh gamtang ahi ding a, ganhing ahihleh leng setan panpihna tawh gantang hi ngeingei ding hi.

Gammial a gingloute lak ah dawimat khawng thumsak dia hon tonpih chiang un lamdang kana sa ngeikei a, kana thumsak sek ua Jesu Min in dawi ka holkhe sek uhi. Gammial a hichibang dawimatte katuah chiang in lamdang sakna lungsim hong piang ngeikei himhim a, himahleh Lamka khua, I Jerusalem uh…Khristian 90% khawng omna I chih uh, Tangthupha honglutna kum 100 a chinna bang I lopkhitna mun ua hichibang a setan mai-ngaltak a agamtat pen na kasa petmah a, ka lungtang dawt kha petmah hi.

Ka ngaihtuah sau deuh hun chiang in ka khasiattha bang suak in Toupa mai ah I dinmun uh zumhuai ka sa tuntun sek a…Toupa kiang ah ngaihdam ka ngen zel hi. I siatdan uh mihing mit a I etchiang inle ei-le-ei le kikih huai tuntun sek a, Toupa mai ah bang chituk a kihhuai I hi di uam chihkhawng ka ngaihsut khak chiang in Pathian mai ah maizum huai kasa petmah sek hi.

Khalam a hatlou hilel le zaw adan omlai di hiven…tuate sang a khawk zaw setan/melmapa bang be maimah hang a...setan betu tamtak a om theih mawk ei gingtu kichite adin na law deuh hi. Biakinn lah tam in hoih deuhdeuh, setan lah laang deuhdeuh…Khalam a I kikepdan uh le suut thak tuak mahmah maithei bang hi.

Gospel I muhna kum 100 a chinna kipaktak in I lawm zuazua ua, kum 200 a chinna lop hun hongtun chiang in Jesu a hotdamna neite sang in setan leh dawi-le-kau bia a tamzawta maimah diam maw…

Setan in hon lok ahi…ih mu lai ding I hi hiam unau?

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.