LAWM CHU LAWM AHIH DET DING AHI

Gelhtu: LB Muan

17^th July, 2019

Nikhat ka lawmpa Lialian honghoh a, huchi’n ka nih un vak-halh ding in ka pawtkhia uhi. New Lamka lak a lampi khat kon zuih uleh numei khat lamning ah ana tu a, ka lawmpa tawh hong houlimzual uhi. Bangtan hiam a houlim zawh un ka paisan uhi.

Bangtan hiam ka pai nung un ka lawmpa Lialian kiang ah “den a na houpihnu kua a?” chi a ka dot leh ka lawmpa’n lamdang sadeuh in “High School a i-classmate nu uh Tete (min khek) eivoi, thei nonloutel maw?” chi in hon dawng hi. Ken le thei nonlou a haih gawp ka hih chiang in “thei nonlou a haih keivoi” ka chihleh ka lawmpa’n “nangzaw hichitel neive” hon chihkhum a huchi in lampi ah ka kihou suksuk uhi.

Kei bel mi haih hat-ahat khat ka hi ahi. Kisaktheih ziak le hi-hetlou in mi ka haih pahpahsek a kisuanlah na ding ka mutam petmahsek hi. Pastor’ ta ka na hihziak in mun tampi ah ka na omkha a, school le tamtak ah ka na kaikha hi. Huchi in lawm le kihau hi. Himahleh mi tam a kipolh khak luat ziak in mi theihdet haksa kisa petmah a, “Theih ngei bang na e, koi a ka theih a le?” chih khawng a lungsim abuai hun tam mahmah hi. Mi khenkhat ka muhna mun a tuam aleh leng thei buaipah maidan ka hi ahi.

Mundang a kum tamsimtak Bible zil a omkhia ka hi a, lawmte tawh kithuah louhna leh kimuhlouhna asawt luattak ziak le ahi ding a, ka lawmnu uh Tete bel haih petmah kha ka hi ahi. Nidang a school ah chiamnuih khawng genkhawm a hoihtak a ka kipolhpih uh haih ka hih chiang in lungsim kisuanlahna lianpi ka nei hi. Ka lungsim ah saupi ka ngaihtuah a, kisathei honsak didan khawng ngaihtuah in nuam ka sa hetkei hi.

Huchi in khatvei a inn uah ngaihdam ngen ding in ka va hoh hial hi. Kong ka va kiuh leh anaute khat in kong hong hon a. Ka lawmnu uh bel ana om kei a mundang ah ana pawtkhia hi. Ken le anau kiang ah “Na U ka haih kha a huai gen dia honghoh ka hi” chi in ka paisan hi. Huchi in ka lungsim hong nuam deuh hi. Kei le mundang ngen a om ka hih chiang in huai nung ka lawmnu uh Tete tawh ka kimuh khak lam uh ka thei nawn kei hi.

Ka classmate uh midang khat inle “lawmte zahtak huai thei lawta uh, kuamah ka houpih ngam nawn kei” achih ka zasawn kha a, ka lungsim a sukha petmah a, khe a ka pai hun in a dawr ngakna ka totkhak nakleh ka bangzual malam teitei sek hi.

Mi ka haih khak hiam, ahihkeileh lawmte’n hon zahtak bawl chiang un nuam ka sa hetkei a, nidang a kipolhdan a kipolh theih na ding in pan nasatak in ka lazel hi.

Lawmta bel lawmta hih det ding ahi. Sepna, zilna, hihna, theihna in i kal a gamlatsak ding hi zenzenlou ahi. A zilsang zawdeuh om dia, sepna hoih zawdeuh nei a om dia, Pathian nasem a om dia, solkar nasem le om dia, khenkhat lah nektawm zong leng om ding hi. Khat Officer hi in khat rickshaw hek ahihlehle nidang a kichiamnuihdan, kineeldan leh kipolhdan a kipolh ngeingei ding ahi. Hiai ding in a tungsangzaw pen in atung sangzoulou pen kisuanlah ding veen a, a hausazaw in a zawngzaw pen nopsaklouh ding veen a, a theizaw in a theilouzaw zumna ding veen dan siam ding ahi.

Khenkhatte’n degree, sepna hoih deuh, minthanna, sum-le-pai hong neih chiang un nidang a alawmte uh polhtak leng sa nawnlou mawk uhi. Kiletsakna in kidim in lawmte zahtak bang ut uhi. Hiai dingdan bel ana hi-hetlou hi…

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.