Gelhtu: LB Muan
23th August, 2019
Tangthupha gen i chih a haksatlouhna mun om ding in a gintak-huai kei, aziak bel nasatak a ana dal gige setan ahihman in. Ahia Tangthupha genna dia gam kihong deuh, nam kihong deuh leh agen anop zawkna deuh bel ana omtham mah hi.
Ei
India a teeng ten le veina liantak tawh hihtheih bangbang in i sem ua, himahleh
tunitan India mial-chihtak in miallai hi. India ah Tangthupha genna ding in
tha-le-zung, sum-le-pai tamtak beita ding a, himahleh Christian population
bangzahmah pha nailou hi. Adik in zaw India a Tangthupha gen a haksatluat ziak
ana hi ahi.
BRITIST-TE TATSIATNA MANG NAILOU
Britist-te thunuai ah khang tamtak ana om in haksatna tamtak India mite’n ana pal uhi. Britist ten tua hunlai in iitna tawh India mite ana enkollou in ganhing bang a musit in ana bawlsia ua, India gam hauhsakna chouh enlah in India sisan ana tawpkang sawm uhi.
Tua hunlai in Pathianthu hoihtak a ana gen a iitna tawh India mite ana enkol hile uh India pumpi christian gam ana suakzou mahmah ding in gintak-huai hi.
India mite’n tunitan Britist-te tung ah hehna leh thangpaihna neilian mahmahlai ua, tumlam gammite huat-a-huat thoh India ah mi tamtak om hi.
Christianity
pen hon bawl gentheite sahkhua ahi chi in bildoh ut hetlou ua, Christianity pen
huat thoh maimah uhi.
US-TE GINTAK BANGLOU
India in Independence hon muh dek in Hindu leh Muslim kal nasatak in Britist te’n hon subuai malam ua, huchi in Hindu leh Muslim gam in hon khen malam uhi. Huchi in hiai gamnihte kal ah kimelmakna liantak hong piangtou a, Pakistan in US tawh kizopna hoihtak bawl in galvan leh lam tuamtuam ah panpihna mutou den hi. Huchi in India le galvanlam ah amah khe a ding thei nailou ahihman in Russia apat galvanlam ah panpihna ngen in Russia in a poimoh teng ana petouden hi.
Tuni chiang in bel US leh Pakistan kal ah kitheihsiamlouhna tamkhop om in a kal uh siat chihtak in hongsia a, huaiziak in US in India mitmei hon leh ven simta hi. China hong hat hiaihiai ahih man in Asia ah China nangzou di omsun India ahi chih US in thei hoih mahmah a, huaiziak in India tung ah hongsiam panpanta hi.
Himahleh hun paisa a US in India ana bawldante, India Scientist-te leh vaihawmtute CIA ten a thah dante, India mite muhsitna kampau a zatte uh tunitan mangngilh theilou a, US te huat-a-huat thoh India ah mi tamtak om hi. US-te christian gam ana hilou a dawi-le-kau bia gam ana hikhale uh India ah Tangthupha puanzakna hiai sang in nasatak in nuamzaw ding in gintak-huai hi.
India a om mi tamzawte'n US te christian hivek di un gingta uhi. Kicheidan, khawsakdan, numei-pasal kal a thangtatna leh siatna a kidim US bel tawndan a kulmuut mahmah India in etton nadi om sa-hetlou a, huaiziak in Christian Sahkhua leng lunglut nadi theilou uhi.
Christian ichih chiang in India mite lungsim ah US khawng kilangpah ahihman in India miten Tangthupha laklut haksa sa mahmah uhi.
Tumlam
gamte zekhemna, neksiatna, muhsitna ana tuaktou ngit-nget India in bel tumlam
gamte Jesu leh Tangthupha lalut ding in a lungsim uh hong hetlou ua, huaiziak
in tunitan India mial chihtak a miallai hi ahi.
ISRAEL TE’N GOSPEL NEILOU
Pakistan in Nuclear Galvan a bawllai in Israel in va bomb siatsawm a, tua ding in Israel in India kiang ah nget khat nei hi. Tua bel Pakistan Nuclear Galvan bawlna mun va bomb-se dia hongkuan ding Israel-te leennate Mumbai/Delhi mun a a-fuel ana thunsak ding in ngen hi. Himahleh tua hunlai a India te PM Morarji Ranchhodji Desai a hailuat ziak in bangmah hih theilou ua, Pakistan Nuclear gam khat hong suahloh in huaiziak in tunitan India muangchang in khawsalou hi.
Gintak hetlouh in Israel in India panpih chihtak in panpihsek hi. Kargil War lai bang in tumlam gamte'n India-te poimoh galvan apiak utlouh lai un Israel in panpih theihna teng ah aguk in ana panpih hi.
Israel in chiklai peuh a India adin pihsek ziak in India mite'n Israel muanhuaisa hi. Huchi in Israel muanna lian deuhdeuh a, tuni chiang in Russia sang inle Israel ngainazaw in “lawm diktak ahi” chi in tamtakten pomthei dekdekta uhi.
India in Israel gin-om sa a, “Israel muantak ahi” chi a Israel hon ngaihnat chiang in lungsim ah Thukhunlui hunlai a Pathian in Israel tungtawn a namdang leh gamdang mite a angsung a pilut ana sawmdan khawng honglangsek hi. Huchi in Pathian in a Tapa neihsun Jesu hiai khovel ah honsawl a, himahleh Israel tate'n a kumpipa uh ana theitumlou in ana nawlkhiin maimah uhi.
Israel in Jesu ana nawlkhiinlou bang hi uh henla, Tuhun in Israel gam pen Christian gam hita zenzen leh tuni in India te'n Israel te tungtawn in Pathian iitna sang mahmah ding un gintak huai hi.
Pathian namteel Israel in a Kumpipa ana pomlouh ziak in tuni in India tawh akal uh bangchituk in hoih mahleh apiak ding Gospel neilou a, Tangthupha taang in Galvan pezaw maimah hi.
Hiai
khovel ah Israel tungtawn a Pathian in nasem utlua ahihdanzaw kichiang mahmah
mai hi.
THUKHITNA
Hiai atung a te ziak in India a ana changkang leh ana pildeuhte lak ah Pathian’ thu gen haksa mahmah mai hi.
Ana mawl mahmah leh bangmah ana thei kholloute lak ah bel Tangthupha gen nuamzaw deuh a, huchi in organization teng in namniam leh nepbawl theih deuh ichihte luh chihtak in kiluh a, namsang, laisiam, hausa leh ana pil deuhte lak kilut ngamlou leh lut le kisawmlou maimah hi.
Namniamte lak a tangthupha gen a poimoh zah-zah in namsangte lak ah leng poimoh petmah hi ahi. Nam niamte Christian hongsuah chiang un namsang leh changkangten Christian lut utna neilou sem uhi.
I nasepdan uh khek in haksa lehle namniamte kia chilou in namsangte lak ah tangthupha gen in namsangte tungtawn a namniamte kailut di hile nasatak in nuamzaw ding a, Chirstian leng kibehlap hatzaw ding hi. Ahia report hoih leh minhoihna i zon chiang un namsang leh changkangte lak buaipihtu ding ki-omlou hi...
Tuni
in Tangthupha genzakna nasep nang-le-kei khut ah ki-nga lian mahmah mai a,
nang-le-ken bangtan kal i suanta a…?
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi pen CLICK in.
No comments:
Post a Comment