- Dr. LB Muan
4th March 2024
Mihingte i hinkhua paisa i sutkik chiang in lunglenna ding bang, kipahna ding bang, khasiatna ding bang omsek hi. Hinkhaw paisa va sutsut ding hikei mahleh achang a va ngaihtuah kik hun le neihzel pe poilou hi. Ahia, ei hon khasesak leh dahsak ding lamte hilou a, ei hon kipaksak ding leh Pathian thupina i muhte khawng sutkik zel ding ahi.
Nikhat Office a ka tulai in Kum 20 bang paita a thiltung khat ka ngaihtuahna ah honglut phut hi. B.Th kazil lai ahi a, North India ah ahi. Kei bel mite hon gintak hetlouh lam ah mi zahkai leh kisuanlah hat kahi a...tua ka hihna taktak pen mite theih di lau a, zahkailou dandan a pang apang kahi zawsek hi.
B.Th kazil tung in mite mai a ka din chiang in ka lungsim aom teng bang le beithei maite kahi ahi. College a zingkal devotion hiam ahihkeileh group fellowship chihte khawng a thugenna hun hon piak chiang un miten ka thugen theihlouhdan thei ahihman un ka din tawh kiton in honna nuihsan sek pah uhi. Gen siamlou theilua ka hihman in ka thugente nuihzat huai sa in ka thugen ngai ut a, nuih na di zong hunkhop ana om sek ua, ka lawmte khut beng zen a ana nui hunkhop omsek uhi. Ka dinkhiak tawh kiton in ken le, “thugen siamlou kahi” ka chih toh kiton a ana dur pah chu ahi mai uh ahi.
Ka lawmpa Burma te khat leng group fellowship na khawng a thugenna hun atan khak chiang in thugen kizil din kei hon zawn sek hi. Thugen ka kizil chiang un aman kei kiang ah “Nang hon gen inla, ken kon translate di” hon chisek hi. Huchi’n ken le topic khat peuhpeuh ka gensuk a, ka lawmpan le pau dang in ana translate zel hi.
Ka nuihzat huai na mahmah uh ahihleh thugen kizilna ka neih hun ua kagen zelte ka lawm pan group fellowship a thugenna atan hunte ah kagen bangbang in vagen zel hi. Thugenna atan nawn chiang in kei thugen kizil din hon zawn zel a...kei hon gensak in aman letzel a...huai hun a ka gente aman fellowship te ah vagen zel hi.
Kei lah chu thugenna katan nate ah genthei mahmahlou kahi a, hun hon piak zah uh le sawt sathei mahmah in ka gen masak di leh gen nanung di le theilou in buai in ka buaisek hi. Tuchiang in ahihleh Pathian in hon panpih in nidang sang in thugen le ka genthei zaw deuhta hi.
Ka lawmpa tawh kum 20 khawng paisa a ka na omdan uh ka khawnung ngaihtuah chiang in ka nuih bang aza a, alehlam ah Pathian in honna zatdan chituam mahmah khat ana om hidan in ka ngaihtuahna ah hong kilang hi.
Kei pen a genkhetu hiam a va pang hikei mah leng, Pathian in athu kei hon piak pen ka lawmpan la sawn a, huchia aman midangte pesawn a..ka lawmpan agen hun a ana phattuampih le om kha maithei hia chihte khawng ka lungsim ah hong khawnung lat phing hi.
Hiai apat a ngaihtuahna a hong om khenkhat chu ei pen agenkhetu hiam, asa khetu in pangkha sese kei lele mi kuahiam gen di petu, mite inspire tu, mite motivate tu ale nasatak a pantheih ana hi ahi.
Kuamah phawklouh a behind the scene a Pathian gam adia thupitak a pantheihna tampitak om lua hi ahi. Tuhun inle achang in khenkhatte’ sermon ding leh seminar paper di khawng ka bawlsak hunte le omtham hi. Kagelh khiakte leh kagen khiakte ana gensawn bang leng hunkhop omtham hi. Hiai pen thil kipahhuai hi ahi.
Hiai apan sin khiak theih adang khat ahihleh ei Pathian’ khut a i kipiak khiak a, Pathian in i ma a hih dia a koihte ihih touhtouh nak leh Aman bang lamlam hiam a, koi lamlam hiam a manphatak a ana zang khezel hidan ahi.
En houchik leh thulim hetlou ichihte bang le Pathian in thupitak a ana zangkhe thei ahihdan phawk in Pathian gam adia i septheih bangbang sem in ihih theih bangbang hih chiat le Pathian’ gam kekna a pangkha kihi khavek mai ding ahi. Huchi in van i tun chiang in i gintaklouh tan a lawmman kitang khamohlou ding hi.
I thadah hun leh lungkiat hun
in le Pathian in hih dia hon deih pen aneu hia alian hia...peihlou pipi inle
hih tuntun le Pathian in tuapen zang in midangte adia vualzawlna thupitak
suaksak thei a, en le i na zou kihi mai ding ahi.
Midangte adi leh Toupa gam
adin hih theih bangbang hih zel ni!
No comments:
Post a Comment