- Dr.LB Muan
04th March 2024
Hiai a i story gelh ahihleh numei khat hinkhua a thiltung ahi a, ahinkhua a athil tuahte apan sinlai banghiam la le chih a kideih ziak a hiai hong kigelh khia ahi. Hiai nu pen ka client le ahi kei a, Client te story bel amau phalna tellou a kigenkhe ngeilou ahi. Amin i genkhe kei ding a, hiai ah amin ding in Lily ichi ding.
India a vaite’khawpi khat a ka omlai un nungak Lily chu a omna di remchang lou in a beidot mahmah ziak in kou innkuan hong bel kha hi. Hiai nungak Lily ahihleh North East India apat ahi. Kei tawh ahihleh ka kithei kha ngeikei ua, ka loinu tawh a nasepna mun uh kibang in huai a hong kithei kha ahi uhi.
Kou kiang bel beidong leh a buaise ten hong belsek ua, om man chihte le ka la ngeikei ua, ka neknek uh nekpih in aom sungteng uh sanggam bang in ka na bawl zel uhi. Hiai dan a hong bel Lily lou midang leng omtham uhi.
Hiai Lily in tangval nei a, a tangvalpa ahihleh vaite ahi. Vaite tawh ki ngaizawng ahihman in kuaman a buaipih utkei ua, ka kim-le-kiang ua om eilam ichihten ngaihsak utlou uhi. Vaite tawh ki ngai chi in a inn ua a valut khak ding nasan deihlou tel uhi. “Ka inn uah a tangvalpa tawh hong hoh leh miten hon musoi kha ding uh” chitel uhi.
Kou bel it tu di neiloute, beidongte, kingaisete, lunggim leh mangbangte panpihna nasem ka hihman un hiai dan ngaihtuahna bangmah ka nei kei ua, kou omna ah Lily ka ompih uhi. A tangvalpa leng hong hoh khak hun om a, huai hun in hoih taktak in ka na houpih zel a, mi sia bel hih chituaklou hi. Bangchileh Lily tangvalpa Jesu khebul ah pilut in aom thei dia aw chih khawng ka ngaihtuahna a om lianpen ahi.
Lily bel kou kiang a sawtpi om sawm ahi kei a, tua aom lel na mun a nutsiat ngai thuh a, huchia amah kia a inn aluah khiak theih ma kou hong bel dia kisa ahi zaw hi. Huchi in inn luah tuam dia hong kisak zawh tak in kou omna kiang nai ah inn ka zong ua, room lianlou ka mu ua, inn neite le hoihtak in ka houpih a numei amah chouh om ding ahihdan leh hoihtak a ana kepbit uh poimoh ding ahihdante kagen hi. Inn neite le houpih nop mahmah ua, amau anuai a teng ding ahihman un lungmuan huai kasa hi. Huchi in innsung van poimoh dite sutuah in inn lianlou khat ka luahsak uhi.
Inn aluah khiak ni in “nitak chiang in ka innluahna adin thumna nei ni” chi a, kou innkuan chihlouh ka kiang ua om midangte kuamah muh ding omlou uhi. Ken thumna ka neihsak a, a kipak mahmah mai hi. Aman le theitui khawng hon sung in huaite ka dawn ua, huchin amah kia a giak kheta ding in ka paisanta uhi.
Lily bel mi hehpih huai mahmah ahi. Eilamten vaite tawh ki ngai chi in numei thulimlou chih bawl mahle uh ken bel ka hehpih mahmah hi. Lily in a hinkhua ah haksatna tamtak ana pal a huaiziak in a lungsim le thoveng lou mah ahi a, lungsim chihdamlouhnate nei in hinkhua ki ningtak a khovel zang chu ahi mai ahi.
A khua ua a omlai in tangval khat tawh ki ngai ua, huai pan a taihsan ziak a aman paw zoulou a lungsim natak a hinkhua zang a lungsim chihdamlouhna hial neihloh chu ahi mai ahi. Huchi in khawlam ale om ut nonlou a, khawpi a sep theihtheih sem dia hong paikhia ahi a, ama’ mi-le-sa a it mahmah pan deihlou a apaih khiak ziak a aman le vaite khawng tawh ana ki ngai mai hidan ahi. Lily bel lungsim natak a hinkhua zang ahihman in athei siamlouten nin huai sa ua, polh hak le sa uhi. Vaite tawh ki ngai chi a muhdah bawl pawl toh hehpih huai mahmah hi. Tu in hiai Lily koi aom a, bangchi khawsak hiam chih ka thei kha non kei hi.
Hiai
Lily hinkhua apat sinlai bang aom a?
#
Lily thiltuah theiloupi a mawk judge adik diam?
A khawlam ua atangval pan ana bawl genthei keileh, ana taisan keileh, a lungsim ana liamsak keileh Lily le vaite tawh ki ngai kha khollou ding ahi.
Numei khenkhat omna mun leh sepna mun ziak a eilam pasal tawh kithuah khak khollouh ziak a namdang tawh kingai a kiteng bang le om ua, khenkhat lah beven ziak himhim a vaite leh negrote tawh ut-le-dah a thangtat a hinkhua zang le om lawtel mah uh ahi. Ahia numei khenkhatte bel lungtang nat ziak a namdang mitsuan chih bang le om lawtel ahi.
Pasalten numeite i moh sasa na ua eilam pasalten i numeite uh ut-le-dah a i khoih thang nung ua, lungsim kitamkham a i koih nung ua i numeite un eimi pasalte huatna leh muan nonlouhna lianpitak neihloh ua, huchi in mahni pau kibatpih pasalte etsawm non vetlou in namdang pasalte chouh en zaw mai uh hi ahi.
Lily in a hinkhua a atuahte theiloupi a mawk demdem pen adik mah diam? Lily in atuah teng tuak le ei bang ichi di ua? Lily sang in i sezaw maimah di uam?
Eilam ten mi hinkhua theiloupi in mi kidem suk pahpah hi. Min a hinkhua ua bangtuak a, gentheihna leh thil haksa bangzahta ana pal uhiam chih theih pihloupi in ki jugde suk zialzial zel hi. Min i kiang a kua hiam hon gensiat uleh agenna uh adik hia chihte lah kisuilou, thudik ahihleh ahihlouh le kisui saulou in gensiat aom pen ki mu-soi sukpahzel hi. Tua kia hilou, en i zaktan ale hun salou, i thil zak pen adik leh diklouh le theiloupi in adik dia koih in midangte kiang a ban gensawn zawmah lai.
# Namdang
pasal a neihlouh himhim ding adiam?
Eimi mah pasal a nei a nupakal hinkhua gentheitak a zang le tampitak om a, huchih lai in namdang pasal a nei a hinkhua nuamsa mahmah le tampitak om veve uhi. Namdang pasal nei fuh khate, a pasalte un duat mahmah ua, eimi numeite sang in nuam sazaw uhi. Hiai kagen ziak a namdang pasal a neih promote hituan zenzen lou kahi.
Vaite tawh ki-ngaih ahihkeileh
nupa a kiten chihte pakta hiam ahihkeileh zadah leng kahi tuan kei. Bang nam
peuh tawh kiteng lele a poimoh pen chu i ginna a kibat ding ahi. I pau kibatpih
louh ahih uleh le Christian ahih nak ua, hon it nak uleh a poina om tuanlou
ahi.
Atawpna din...tuni a i gen ut
pentak chu hiai ahi...
1. Mi hinkhua
theiloupi in mi mawk judge kei ni.
2. Min i kiang a kua
hiam hon gensiat leh adik leh diklouh theiloupi in mawk gintak kei ni.
3. Min a hinkhua ua
bang tuak ahia chih theiloupi in mi dem kei ni.
4. Khovel a hoih bukim
kuamah ki omlou ahi a, kidemna ding i kizon tuah leh demna di bei kuamah ki
omlou ding ahi.
5. Mi hoihna leh
siamna i gen di i theih keileh mi hoihlouhnate gengen sawm kei ni.
YouTube : https://youtu.be/-MwICgv4SMo
No comments:
Post a Comment