ABRAHAM LEH SARAH KITUAHNA THUGUK

Gelhtu: LB Muan

03/02/14

Bible ah, ‘Jite a pasalte uh mai a aki ngaihniam ua a pasalte uh a zahtak ding uh chih leh Pasalte’n a jite uh a iit ding uh’ chih Ephesate bung 5 ah chiangtak in kigelh hi. Numei in a pasal a zahtak a, pasal in a ji a iit leh nupakal ah kituahna om a, innsung leng nuam hi. Hiai toh kisai ah Abraham leh Sara ettontak ahihdan uh i suutkhawm ding…

 

SARA IN A PASAL A ZAHTAKDAN

[1] THUMANGTAK IN A PASAL ZUI-DEN

Abraham in Pathian’ sapna hon zaak tak in a omna mun a paisan ngai a, midang leh namdangte gam ah a teen ngai hi. Apianna gam Ur nusia in Haran tung a, Haran ah hun bangtan hiam a om nung in Kanaan hon lutsuk nawn a, Kanaan ah kial atun ziak in Egypt gam ah taisuk nawn hi. Tua zawh in Kanaan ah hong leh lutkik nawn hi. Hiaibang a omna mun det neilou a alanglang a apai hang un Sara in apasal kiang ah kamkhat mahleng bangmah genlou in thumangtak in zui ngit-nget hi. Hiai in apasal zahtak a, ki-niamkhiak mah ahi chih chiangtak in a kilangsak hi.

 

[2] A PASAL’ GINNA AGIN PIH

Tua hunlai in Pathian-hing bia ana om khollou uh a, a omna mun uleh apai na mun peuhmah ua miten milim pathian ngen bia uhi. Abraham in bel Pathian-hing ana gingta tinten kha a Pathian chih dandan in kal ana suan hi. Pathian in a nupakal hinkhua uleh a suante uh maban ding tampi agente tangtung taktak mah ding hiam chih gin-lelh theih ding hun tam mahmah a, a Pathian biak uh Pathian diktak mah hiam chia gin-lelh theih ding khawp dinmun ah ding mah le uh Sara in a pasal’ gintak Pathian pen mah ana ginpih tinten a, milim pathiante ana biaksan mawklou hi. Hiai in a pasal zahtak a ki-niamkhiak mah ahi chih chiangtak in a kilangsak hi.

 

[3] A PASAL’ THU ANIAL KEI

Abraham in thupukna alak chiang in Sara in hoihsa in sakei lehleng ana nial hetkei hi. Kanaan gam a kial atun ziak in Egypt ah hong lutsuk uhi. Egypt ah Abraham in asih khak ding alauh man in a ji ki-humbitna in zang a, zuau gensak hi. Sara in hiai pen hoihsa in sakei taleh niallou in a pasal chih dandan in om hi. A pasal’ thu aman ziak a Pharo angsung a mangthangthei dinmun ahi, huchitan ah leng a pasal’ thu ana niallou lai hi. Hiai in a pasal zahtak a ki-niamkhiak mah ahi chih chiangtak in a kilangsak hi.

 

[4] A PASAL ‘TOUPA’ CHI IN SAM

Sara in a pasal Abraham pen a pasal chouh hilou a alu ahi chih thei mahmah in a pasal mai ah ki-niamkhiak petmah hi. Tuaziaktak in ‘toupa’ chi in sam hi…(1 Peter 3:6). Hiai in a pasal zahtak a ki-niamkhiak mah ahi chih chiangtak in a kilangsak hi.

 

ABRAHAM IN AJI A IIT DAN

[1] ZI DANG NEIH ANA SAWM NGEIKEI

Tua hunlai a mi khenkhatten ji tampi aneih lai un Abraham in a ji Sara lou numei dang ana en mawngmawnglou hi. A nupa un ta neitheilou in a upat dong uh khawsa mahle uh ji dang neih ding Abraham lungsim ah pianglou hi. Hiai in a ji a iit chih chiangtak in a kilangsak hi.

 

[2] A JI A ITLUAT ZIAK IN KHIALKHA ZAWZEN

Abraham in a ji it-lua a, tuaziak in a ji’ thu a hoihloulam nasan ah leng ana mangkha zawzen hi. Sara in Hagar tungtawn a taneih asawm pen Abraham ngaihdan ana hikei mahleh a ji a iit ziak in ana niallou hi. Hiai in a ji a iit chih chiangtak in a kilangsak hi.

 

[3] A JI’ THU ANA ZUI

Sara in inn apat Hagar leh ata (Ismael) a hawlkhiak dek in Abraham adin thupukna lak haksa mahmah ding in agintak-huai. Abraham adin Hagar hawlkhiak pen haksalaw di bangkei mahleh a sisan apiang ata Ismael inn apat hawlkhiak ding chih pen haksa mahmah ding in gintak-huai hi. Huchi dinmun ah leng a ji tai hetlou in a ji’ chih dandan in thupukna lakpihlai hi. Hiai in a ji a iit chih chiangtak in a kilangsak hi.

 

[4] SARA SIH IN ASUUN A AKAP

Abraham in a ji iit mahmah ding in i gingta. A pianna gam uh nusia ua, theih ngeilouh nagam a amau tegel chouh khawsaden ahih chiang un aki iitna uh zaw ana thuk mahmah ahi ding a…Bible a imuhdan in Abraham in a ji suun mahmah a kap hi didan ahi. Hiai in a ji a iit chih chiangtak in a kilangsak hi.

 

THUKHITNA

Abraham leh Sara nupa ettontak ahi uh. Abraham in a ji a itdan leh Sara in a pasal mai a aki niamkhiakdan enton le nupa kituaklou chih vaang mahmah ding hi. Pasal in a mawhpuak chu ‘Ji te iit ding’ ahi a, Jite mawhpuak chu ‘Pasalte zahtak a thunuailut ding’ ahi. Nupa in a mawhpuakna tuak uh honzawh chiang un nupakal chidam a, taten vangam ana chiamlawk uhi.

# Jite aw, Toupa kianga na kiniamkhiak bang un, noumau pasalte kiangah kiniamkhiak un (Ephe.5:22) 

# Pasalte aw, na jite uh it un, Kris in saptuamte a ita, a sik ua a kipiak bangin…(Ephe.5:25)

Jite iit tak a kem ding leh Pasalte zahtak a thu nuailut thei din simtute Pathian in honvualzawl hen!

____________________________________________________

#  Na phattuampih leh midangte khualna in ana SHARE sawn in. 

# Article ki post chiang a nana muhzel na ding in hiai atung a taklampang a "Follow" kichi pen CLICK in.