PATHIAN’ TEEL HEUTU vs MIHINGTE TEEL HEUTU

Gelhtu: LB Muan

04/03/20

Saptuam sung leh khotang ah hitaleh heutute Pathian’ seh leh Pathian’ teel dan in ki ngaihsun a, amaute thil-hih leh nasepdan hoih in hoih keileh ki soisel ngamlou hi. Saptuam sung bang ah hichidan ngaihdan diklou uang diak a, Pathian in heutu dia hoih asak pen eite heutu dia hon piak dan in ngaihsutna ki nei lian petmah hi. 

Pathian in ateel heutu leng omtham a, himahleh Pathian teel heutu sang in mihingte teel heutu saptuam leh khotang ah tamzaw ding hi. Aziak ahihleh heutu ding i teel hun in Pathian in force in Ama' deihpen hon teelsak zenzen kei a, eite'n Pathian' hon piak zaleenna zang in mihing’ mit leh ngaihsutna apat hoih isak pen i teel zel ziak uh ahi hi.

Kumpi Sawl leh Kumpi David etsakna hoihtak ahi uhi. Kumpi Sawl leng Pathian’ teel ichi kha maithei, Pathian in Israel tate’ lungsim a Kumpi dia adeihdan chet uh hon pholhkhia ahi zaw hi. Ateel diktak Pathian hilou in Israel tate ahi zaw uhi. Pathian in Israelte’ Kumpi ding ahon teel tak in bel Ama’ Lungtang bangpu-mi “David” a hon teel hi. Mihingte’n bel a pawlam i en ua, Pathian in bel i lungtang hon en ana hizaw ahihdan 1 Samuel 16: 7 ah chiang mahmah mai hi.

Pathian’ teel leh mihingte teel heutu in kibatlouhna tampitak nei hi. Hiai ah tamlou i suutkhawm ding.

 

1. VAIHAWMNA LEH THUPUKNA LAKNA AH

• Mihingte teel heutu in vai a hawm chiang in ama’ mit ahoih a amuhdan leh a lungsim adik dia agintak dan in vai a hawmsek a, hoih asak dandan in thupukna ala mai hi. Vaihawmna leh thupukna lakna ah Pathian dong a kichih hun in leng Pathian’ aw za ding in abil adoh kei a, ama’ lungsim ahoih a sakdan in thil ahihsek maizel hi.

• Pathian’ teel heutu in bel Pathian alau tinten a, Pathian’ deihlouh dan a vaihawm khelh khak ding lau in thil bangkim ah Pathian’ deihdan a dong masazel a, Pathian’ aw ngaikhelou in thupukna ala mawk kei hi. Ama’ hoihsakdan leh Pathian’ deihdan a kikalh khak hun in leng Pathian’ chihdan mah in thil ahih zel hi.

 

2. MOHPUAKNA THEIHNA AH

• Mihingte teel heutu in bel a mohpuakna pen kiletsakna in ala a, vaihawm leh thuneih nuam asa hi. Ama’ mohpuakna hoihtak a semsuah zoulou hi napi in ama’ mohpuaklouhna tantan ah kidaihlah in thilteng ah a theipen kisa in kikum suakvek hi. Huchi in midangte ading in dongkholh leh buaihuai asuak hi.

• Pathian’ teel heutu in bel a mohpuakna athei a, “hiaibang mohpuakna Pathian apan ahi” chi in kiletsakna neuchik le neilou in a mohpuakna hoihtak a asepsuah zohlouh ding lau in pilvangtak in na asem hi. Mohpuakna petu Toupa’ lungkim natan a asep zohlouh ding lau in kal asuan hi.

 

3. MITE VAIHAWMSAKNA AH

• Mihingte teel heutu in bel deihsakna leh khentuamna liantak nei in vai ahawm sek hi. Ama’ ate adeihsak a, midangte ading a khual kei hi. Hamphatna tan ding om teng ama’ deihsakte lak ah a hawm khezel hi.

• Pathian’ teel heutu in bel a melma natawm a it a, mi deihsak leh khentuam anei kei hi. Pathian in khentuam leh deihsaktuam nei a vaihawm dia tua dinmun a akoih hilou ahihdan athei a, miteng adin ahoih a deihsak vek a, itna tawh vai a hawm hi.

 

4. PAHTAKNA DEIHNA AH

• Mihingte teel heutu in bel mite’ pahtak leh ngaihsang a ut hi. Mite’ biak tuau-tuau chihte a ut a, ahi veu-vau hi. Amah bezoute leh pahtawi siamte tung ah asiam a, amah bezoulou leh pahtawi zouloute adin athuak hak mahmah hi.

• Pathian’ teel heutu in bel mite’ pahtakna sang in Pathian’ pahtakna a delhzaw a, Pathian’ mitmei veng tet-tet in kal asuan hi. Mite’ biak tuau-tuau a utkei a, ki ngaihniamna liantak hinkhua azang zaw hi. Mite pahtak lohna ding in na asem kei a, Pathian pahtak lohna ding in thil ahihzaw hi.

 

5. THILDIK LEH THUDIK A DINNA AH

• Mihingte teel heutu in bel thudik agum gige kei a, ama’ lamzanna ding leh mite kipahna ding ahih nakleh dikloupi a thil hih leng poi asa kei hi. Amah ah chihtakna leh migitna omlou a, huih-nunna lamlam ah a awn theizel hi.

• Pathian’ teel heutu in bel thudik a gum tinten a, thudik gup ziak a minsiatna tuah ding aom leh leng tua minsiatna tuak ngam in thudik gum in thildik ahihzel hi. Thudik gup ziak a mite’ huatna leh pampaihna tang ding ahih aleh leng thudik gup mah ateel zaw hi. Mihing nasem hilou a Pathian’ nasem ahihdan a mangngilh ngeikei hi.

 

6. NASEPNA AH

• Mihingte teel heutu in bel ama’ lungsim a pawt dandan in na asem a, hoih asak te aban hihsuk mai hi. Pathian tup-le-ngim theilou in ama’ geeldan in a paizaw hi.

• Pathian’ teel heutu in bel Pathian in bang semsuah dia deih hi hiam chih a suut masa a, Pathian kiang ah asep di leh asep didan adong hi. Pathian’ tup-le-ngim pen atheih masiah thil ahih mawk kei a, Pathian’ aw chiangtak a azak chiang in nasep a kipan pan hi. Huchi in Pathian’ chihdan dan in haksa lehle a kalsuan a, alohching zel hi.

 

THUKHITNA

Saptuam sung leh khotaang ah Pathian in a teel heutu leh mihingte teel heutu koipen atamzaw mah diam maw...?

Kigawmna sang a kikhentuamna, ki itna sang a ki huatna, ki ngaihnatna sang a kituam bawlna, khalam thilte sang a khovel thilte pahtak zawkna, asemtu sang a vaihawmtu hih utzawkna, chihtakna sang a minhoihna deihzawkna, Pathian deihdan ngaihsaklou a mahni hoihsak dandan a ki makaihna chihte khawng i muhmuh chiang in zaw hiai atung a dotna pen dawnna ding hong chiang mai abang hi.

KI SUUT ZUAL NI!

1) Nang le ken heutu ding i teel hun in thumna tawh pang in Pathian i dong hia, ahihkeileh i tanau, i lawm, i theih ngei, ei adia phatuamna om dia i gintak pen tekhawng teel zaw maimah ihi hia?

2) Nang le kei mihingte teel heutu ihi hia ahihkeileh Pathian teel heutu?

____________________________________________________

#  Na phattuampih leh midangte khualna in ana SHARE sawn in. 

# Article ki post chiang a nana muhzel na ding in hiai atung a taklampang a "Follow" kichi pen CLICK in.