KA NU SINGTANGMEH HUAN MAH LIM PEN E!

Gelhtu: LB Muan

25/01/14

 

Pathian hon sapna lah nial vual ahihlouh chiang in 2003 kum in chu Bible sin ding in kong kisa ta hi. Ka nu-le-pa chouh toh khawsa kahih man un ka nu’n mundang a ka om khiak ding ana ngai ngam hetkei a, “inn lam ah zil mai in” hon chisek alah ken mundang sawm teitei kahih man in gen ding tuan theilou in nikhat ann ka neklai un hichi in hon gen hi “NA UTNA MUN TENG AH PAI LECHIN LENG INN A KA HUAN SANG A LIMZAW KOI MAH AH NEKHALOU DING NAHI.” Hiai ka nu kammal tuni dong in ka bil ah tham den hi!

Bible sin ding in ka theihtawm pasal thum leh numei nih tawh kong kuan kheta uhi. Bus in ka tuang suk ua, Manipur aan ki nekha mawk nawnlou ding chi in sekmai ah ann ka nesuk malam uhi. Gari kham kahih chiang in ka nekteng Kohima pelhsuk lamkawi na lak ah ka lawkhe nawn vekmai hi.

Train kong tuang nawn uh a, train a ann limlou leh tawmchik nek kon panta hi. Ka lawmte tawh sum haulou kahih chiang un gilkial law mahleh achang in train ah ann ka ngawlsuk zawmah lai uhi. Huchi in Delhi kongtun un hotel hoih deuh alah kilut zoulou ahihchiang in nek aki matna deuh di chi in mun khat ah ann kon neta uh a, plate khat in Rs.10 vel chouh man hi. Alim louh tawh, a ann tawm tawh…poikei kalsuan zawh peuh leh chi in maban kon sawn nawn leuleu uh a, huchi’n ka kai nadi mun uh Gurgaon, Haryana kongtung khong uhi.

Kholum lai ahihman in lum kasa petmah a, dang kia takden mai hi. Huchibang ahihlai in College a tui dawn al zawmah a, al lua ahihchiang in tui i dawn tam zawh khop leh i dangtak deuhdeuh maimah hi. Ann nekchiang in innlam a mehtui-mawl ka lungngulhna hong lian thei petmah hi. Vaiten lah meh sathau leh masala lou a huan didan thei mahmah lou ua, annkam tui-mawl innlam a hawp lai khawng mitkha ah kilang dundun sekmai hi. Sathau meh chouh ki meh ahih chiang in ann nek chiah nou lianpi khat in tui ka dawn kutkut sek hi.

Ka nu thugen ka mangngilh kei…ka bil ah aging den mai. Hostel buh lah atang gol phemphom, leilak ah theh le suang bang in kikhen vekthei hi. Mehte lah lim a limlou thei, kham val ahihkeileh khamlou chihte lah om theilou. Sameh bel ki nekha vetlou hi.

College dang te banglou in rule khauh mahmah in nasep leng gimhuai thei mahmah hi. Nitak chiang in gilkial thei petmah a, himahleh tandoori pek-li kia hon pezel uhi. Ka nek tuung in ann a set haksa kasalua a, nitak chiang bang in ki ihmu theilou hial sek hi. Zinglam in bel ann tak hon pia ua nitak in Tandoori hon pezel uhi. Ann mah ki lunggulh ahihman in nitak ann nek chiang in zinglam a ann val aom leh va kidoh zel a, ahihziakin achang in a niing khawng hon pia uhi. I kuang a hon thuk nung ua chu a niing hilehle nek teitei ngai a, ne kei mawk le fine piak ngai ding hi, tua kia hilou in i min record book a rong san in hon record sak zawmahlai ding uhi. Nek val chih mawngmawng omthei lou a, suang haikha in lung haikha lele valh ding himai hi. Kuangsil dia ipai chiang in heututen i kuang ah kha-teh-neen aom leh omlouh hon chek uh a, khut ale duhlouh banghiam dusbin a paih ding simguk theih himawklou hi…hon et vel khit chiang un kuang kisil thei pan hi. “Hichitel a kibawl, ann niing nasan ki neksak tel, Bible College le abang kei chi” a khasetak a mittui nul ni le tam mahmah hi.

Kumthum sung innlam meh nekhalou a ka om in zaw haksa ka sa petmah. Ka nu gen ka bil ah hong ging sek a…inn a meh te khawng mitkha ah hong kilang dundun sek hi. Ka nu’n beteh, maiteh, aankam, dolhou ahuan te achang in ana ning sek mahleng huai te sang a limzaw ding khovel ah ana om mahmahlou ahihdan ka phawk khia hi.

Kum thum zawh in innlam kapai a, inn ah ann kon ne chu, gilvah lehle kham ki sawm thei mawngmawng lou. Sungten “khamta oh” hon chih uh ki ngai zawzen sek hi. A huan peuh mah uh lim kisa vekmai. “Meh huan ding kathei kei” achih chiang bang ua en lamdang kisa. A huan peuhmah uh chu ki nawm valh phialphial mai hi.

Inn ah bangtan hiam ka om nung in mundang ah zil beh ding in kakuan khe nawn hi…tunitan in India State hoh khak louhna le kanei nawn kholkei a, zatdangte nek tuamtuam kane khata, ahihziak in inn a ka nu mehhuan sang a limzaw koi mah ah omlou ana hi petmah hi. “Ka nu koi mah a zin khalou in agen dikna maizen e” ka chi thak phiing hi.

Vaite lak ah mehpok khawng i huan leh “meh lak a anntang kha” chi in hon nuihsan di ua, i neksak lelah ei sang in duhzaw zel uhi. “Na huan dan leh na annteh zatte hon hilh in” chi in hon leh dotzel uhi. Eiten Ngari, Ngapih, Becanthu leh Sathu ichihte khawng i nek ngeilouh hileh kiduh mawklou ding hi. Ahia vaite i chep sakleh khatvei anek na uah duh ngal thei mawk uhi. Anung chiang in ei sang-sang in hai zaw maimah uhi. En bel vaite meh kum tam pipi khawng hostel ah nekha khin lele kiduh thei lawtel khollou hi…hiai apat ka lungsim a hong lang chu eilamte nek limzaw leh duhhuai zaw hi ding hi.

Vaite meh ka nin luatziak in “ka chipih mah, mehtui-mawl ka hawppih theih di mah koppih in nei zaw ning” kana chi tinten a, mun tuamtuam a Pathian adia kal kasuan khak na ah namdang Christian nungak hoih pipi tuakkha mah leng kana ngaisak vetkei hi.

Innlam a buh limtak leh annteh lou-hing damdawi tellou a ki chiing te i taksa adia ahoih bak ah alim dan leng ana tuam mahmah ahihdan ka phawk thakthak hi.

Kolgam-vaigam ka hei zong, ka nu singtangmeh huan mah lim pen e!

____________________________________________________

#  Na phattuampih leh midangte khualna in ana SHARE sawn in. 

# Article ki post chiang a nana muhzel na ding in hiai atung a taklampang a "Follow" kichi pen CLICK in.