VUAHZU NUAI A PANPIH TU

Gelhtu: LB Muan

18/07/14

 

Ningani July 17, 2014 nitaklam dak 2:55 in ka mobile ah message hong lut a, “Counseling dak 4:30 lak in i pan ding uh aw” chih leh amun ding khawng kigelh hi. Message hon khak tupa bel Pastor Matthew (min kikhek) ahi a, a saptuam kep a nupa khat Counseling dia hon deih ziak a kei hon sam hi ahi. Zan in phone in hon ngen khin a, tuni a message a ahun leh amun ding hon hilh thak hi ahi. Aman leng ahihtheih dandan a Counseling abawl sa bel ahi, himahleh amah bel Pastor ahi a, Counselor ahihlouh man in kei hon chial hi ahi.

Kei leng ann nekhin ka tawldam zek nung in ka kisa a, huchi’n thumna nei in kakuan kheta hi. Bus stand katun in bus ka tuanna ding ana om pah vanglak a, lamzangtak in ka paithei hi. Bus a ka kum tak in ka hohna inn ding ka zong panta hi. Amun ka hoh ngeilouhna ahihman in ka zontawm ngai a, mite kiang a ka dot leh hon hilh geihgeih thei vanglak uhi. “Building minthang deuh ahi ngei di, min athei lua ua" chi kawm in ka zuanzel a, minute tamlou ka pai nung in ka mu khongta hi. Mi hausate tenna ahi petmah a, a huangsung kalut leh dai zikzik zawzen in nuam kasa mahmah hi. A inn number te uh chiang taktak a kigelh ahihman in ka hoh nadi inn number 197G bel zon haksa hetlou hi. A inn ka tung a, huchi’n ka kimu tuah uhi.

Ka room uh adai zikzik a, AC leng om ahihman in Counseling bawl na din nuam mahmah hi. Ka lungsim ah “hichibang Counseling Room ding kinei tei leh aw” kachi ngoihngoih hi. Huchi’n ken leng ki meltheih tuahna ka bawlpah a, ka Client te nupa ka kineel sakpah a, huchi’n Counseling kapan theipah uhi…Vaipau siam hetlou khat kahi sam a, himahleh Counseling ka bawl sung awk hetlou leh naal tak in ka pauthei mawk hi, ka lungsim ah “Toupan zaw ahun hun a hon panpih eive maw” kachi hi (counseling tawh kisai leh Client te bel igen dah ding, client te thuguk ki genkhe ngeilou ahihman in).

Counseling ka zawh un hon samtupa Pastor Matthew in invelop ah sum kithun anuai a semte khat hon pesak dek a, ken “hiai la mawklou ding kahi” chi in Pastor Matthew kiang ah leng “ken counseling ka bawl chiang a sum la ngeilou kahi, a thawn ngen a counseling bawl kahi” kachi hi. Pastor Matthew in sum lam a haksatna katuah dan theilua ahihman in hon piak teitei sawm a, “nang leng sum abuai nahi, hiai la in, na bahara didan maimai ahi” chi in hon kun ngutngut a, himahleh ken “Khateng a mi tamlou ten a phal dandan ua hon panpih zel na uh ahi, counseling bawlna ah zaw sum la ngeilou kahi, hon theisiam mai un, counseling poimoh aom chiang in bel hon samzel un, ka nasep mah ahi, a thawn a kipaktak a counseling bawl zel ding kahi” chi in bangmah ka la kei hi…

Envelop sung a sum athun uh bel tawm hetlou ding ahi chih kathei hi. Sum bel ka poimoh mah, ka loi-nu leng Doctor a ki-etsak ngai a, lei di poimoh leng ka hau uh, ahihziak in counseling ka bawl chiang in bel sum lak louh ding chih ka paidan ahihman in ka la kei mai hi. Tua hunlai in khateng a sponsortu thum leh li khong lel kinei ahihman in Counseling Centre luah man leng ahun tak in ki pezou ngeilou hi. Sponsortu di zon lah thil baih ahi kei, Pathian gam nasepna dia sum neilou a khovel noptaal na dia sum hau bel mitam thepthup hi. Ahi a, Ka hih theih bang in sem zel leng tung a ka Pa’n hon ngawlsak ngal dia hia chih ka lungsim ah hong lian mahmah hi.

Vuah tam petmah hong zu phut a, paikhe theilou in ka om nilouh hi. Vuah atawm deuhtak in gari in bus stand tan hon kha ua, ken leng bus ka ngakta hi. Lampi ah vuah thuak in ka ding nilouh ta mai a, mitam petmah in bus ngak ka hihman un bus stand ah leng ka tazou kei uhi. Vuah lah hong nakzuk semsem a, singkung nuai ah kava ding zel hi. Bus hong tai chiang in kana naih sek ua lah bus khawl ut omlou uhi. Bus ten hon taipel vekzel uhi. Bus hong khawl bang hita leh leng mi dim petmah ahihman in a kongbaang a kiluai nadi natawm leng awnglou hi.

Bus kia hilou in Auto hongtai te ah leng mi dimvek uhi. Huchia sawtpitak vuah nuai a kong om tak in ka liing simta maimah hi. Ka mobile akawt khak ding lau in romol in ka tun a ka khekol sakhau a thun lut in ka sumbawm toh ka khut in ka hum hi. Kawt in ka pum kawt vekmai a, ka lu apat tui luangsuk ziahziah mai hi.

Nitak dak 8 leh chih di khong ahita ding a, khe apai batna lah hilou, bus leh auto lah ngakngak lele phatuam lou, bike a hong taite kiang a hon paw din ngen lelah hon ngaihsak omlou. A didan kathei zouta kei hi. “Gari zaw poimoh na mahmah ing e maw” ka chi ngutngut hi. Ka pai didan lampi katheih but nawnlouh tak in “Toupa hon panpih in kachi mai hi.” Ka din pihte le apai thei om tuanlou…pai nadi gari om ngeilou dia hichia zansawt tan din mai ngai ding hong bang petmahta hi. Bike a hong taite kiang ah ngenzel mah leng hon ngaisak omlou uhi…

Atawp in pasal khat in a Activa a start ka mu a, ken le hon paw din kava ngen hi. Aman le “hong pai ve” achi a kipaklaw mahmah in ken le ka kal kawm in “nang koi tan pai di e” chia ka dawt leh aman “buai ngailou, tuang in” hon chi hi…huchi in kongtai kheta uh chu hampha ka kisa mahmah mai hi. Vuahzu nuai a pei-nih nei nuai a tuang kahi na a ka lungsim anuam petmah a, kipahna in leng ka dim hi. Aleh lam ah bus stand a ka din pihte bangchik chiang in a inn uh a tung mahmah di uam maw…ka chi a, hehpih huai uh kasa hi.

Ka tuanpih pa’n ka min leh omna mun, ka kipatna state leh ka nasep khawng hon dong hi. Ken leng hoihtak in hon dotnate ka dawng a, vuahzu nuai ah ka kihou na uh a tuui mahmah mawk hi. Counselor kahih khawng hon theih tak in hon dot ut atam deuhdeuh mai a, huchi’n ka sepdan, zilna mun khawng hon dong sipsip hi. M.Th in Counseling kichi a zakkhak patna ahihdan khawng hon gen a, lamdangsa mahmah hi. ken le Christian Seminary a kizil thei ahihdan leh Christian, Hindu, Muslim hi in a kuakua hita leh counseling poimoh peuhmah counseling bawl vek kahihdan kagen hi. Ban ah buaina miteng in kinei a, miteng in counseling kipoimoh vek ahihdan khawng kagen hi. Thil tampi vuahzu nuai ah kong kikum ua, kong ki ngaina pah hial uhi.

Main road atai lai gari atam luatziak in ka khawl depdup uhi. Huai tak in kou lampi dang ah pial khia in gari tawmna lampi neulam ah katai ta uhi. Dawr neu khat kong ah hon khawlpih  a “ka mobile kawt kha leh hiai ah plastic ngen ni” hon chih leh ken le “eimah ve” chi in ka kum pah a Dawr ngakpa kiang ah plastic nih ka nget leh hon pepah vanglak hi. Ka mobile bel romol khawng a ka tuamsawn ahi a, asung a tui alut louhna dia kep chihtak a kakep ka chih hang in ana kawtkhin tham hi. Plastic in ka mobile uh ka tuun ua, huchi’n kongtai nawnta uhi. Ka houlimna uh ka sun zawmzel ua, ken leng amah sepna khawng leh omna mun khawng ka dong hi.

Ka omna uh kong kigen gen chiang un kigamla lawtel lou ding kabang uhi. Huchi’n ka kikhen nadi mun uh kongtung khong ua, ken le “nang om kei lechin tutan huai bus stand a ding lai di kahi” chi in kipahthu hoihtak in kagen hi. Ka phone number hon ngen a “counseling poimoh aom leh kon call di” achi hi. Ka phone ulah plastic a hoihtak a kituun ahihman in ala khepah thei zawsam ding ka omkei ua…vuahzu nuai a lakkhiak di leng kawt di ahihman in phone number kipiak didan ka buaisim uhi. Huaitak in ka kiang ua Dawr ngakpa kiang ah laithem neuchik ka ngen ua ka mobile number uleh ka min tuak uh gelh in a laithem in ka kipia uhi. Ken leng kipahthu genthak nawn in huchi’n kong kikhenta uhi.

Inn tun nadi mel khat phial di khawng bang in samlai ahihman in ken le tui niin teng ka pal phei nuap-nuap mai hi. Bangtan hiam nung in inn katung khong a, bathroom lam ka lutsuak ngal hi. Bathroom apat ka loi-nu ka sam a, kei bathroom sung a ding in leh amah bathroom pawlam a ding in huchin Pathian kiah kipahthu genna ka nei uhi. Huai zawh in ka mobile leh sum bawm ka pia a, kei chu ka puansilh teng tawh bathroom ah ka kisil sukpah mai hi.

Tua ni in Pathian in hon panpihtu ding hon sawl keileh buaise thei dinmun kahi. Ka buai mahmah hun a hon taisan ngeilou a, panpihtu di hon pekhial ngeilou ka Toupa tung ah kipahthu kagen ahi. Toupa’n zaw a tate mangngilh ngei mahmahlou ahihdan kei hinkhua ah gen di tamtak ka nei hi!

Niteng a Pathian panpihna, kepna, vualzawlna leh adang dang tampi i phawk batlouh tan ah ana kidong zel ana hi ahi.

 

Toupan simtute hon vualzawl hen!

____________________________________________________

#  Na phattuampih leh midangte khualna in ana SHARE sawn in. 

# Article ki post chiang a nana muhzel na ding in hiai atung a taklampang a "Follow" kichi pen CLICK in.