Gelhtu: LB Muan M.Th in Counselling,
Director, REBUILD AND RESTORE.
21/08/19
Hun na-nung ah saptuam ki ding a, bil ah thuhoih leh kipahhuai zak di om tawm mahmahta hi. Innsung hoih, khalam a hat saptuam leh khotaang chidam ki deihvek mahleh siatlam ki ma-nawh deuhdeuh hi. Piangthak kichi chiat lah khamiitna bei deuhdeuh hi. Saptuam program tam deuhdeuh in nuamthei mahmah lah agah muhding om khollou. Siatna lah uang deuhdeuh ahihman in saptuam maban ding gen haksa mahmah hi.
Hiaibang dinmun a saptuamte ding i hihtak man un khalam, salam leh lungsimlam a saptuam mipite damna ding in hiai anuai a te i poimoh ngaih hoih ding hi.
1. PULPIT SERMON BAN AH KISINSAKNA
Pulpit sermon-te khalam khanna di leh kibawl hoihna ding in poimohlua hi. Ahihziak in saptuam mipite’n pulpit a thu kigente zuih dia le ngaihtuah nawnlou in Thugentu in a mohpuakna ahih buchinna dan in kila maimahta a, sawt agen leh ki-ning zawmah hi. Bil khat ah lut in khatlam ah pawt a, a khenten ki ihmutsan lai hi. Ki khawm atam zawten Biakinn kong i kaan khit chiang un pulpit a thuhoih pipi kigente ki mangngilh manta hi.
Saptuamte Pathianthu theilou lah om nawnlou, Thugentu in agen ma a le agen di teng thei khinte ihi ua, azui peihlou i hilel uhi. Gingtute’ dinmun hichibang mai ahita a, huaiziak in pulpit sermon chouh a saptuam kikeptheih ding hi-nawnlou hi.
Huaiziak in tuhun in kisinsak nalam poimohngaih pen pil-huai kha ding hi. Eilamte’n kisinsakna i chih chiang un Jesu nungzuihna tawh kisai a kisinsaknate kia i lungsim uah hong langpahsek hi. Tuapen le a poimoh mahmah khat ahi. Ahi a, mihing ihihlai man in Khalam vai kia hilou a salam vai leng kisinsak kuul hi. Innkuan kikep didan, Nupa kituaktak a khawsak didan, Tate etkol didan, Tulai khovel a khangdawnglai leh tuailai tamtakten buaina atuahte uapan suahtak didan, Laisin didan, Sumzat didan, Zi-le-pasal zon didan, Innsung a nu-le-pate mohpuak, Tekpi-tekpute kep didan leh adangdang tampi kisinsak ding ahi.
Hiai atung ate ban ah saptuam a heutute/vaipawte’n
hiai anuai ate a sin uh hoihkha mahmah ding hi.
- Naupang Heututen Vocational or Career Counselling, Guidance Counselling, Mental Health Counselling sinle uh naupang paikhial ding lai tamtak lamdik ah pi thei ding uhi.
- Tuailai Heututen Substance Abuse and Behavioral Disorder Counselling, Mental Health Counselling sinthei le uh khamtheih sal a tang leh lungsim natna tuamtuam neite panpih thei ding uhi.
- Saptuam Upa leh Dorca heututen Marriage and Family Counselling, Crisis Counselling, Financial Counselling, Religious Counselling sin thei le saptuam mipi tamtak a buaina uapan suahtakpih thei ding uhi.
- Saptuam kemtu Pastor in bel hiaite avek pi a asin/atheih ding ahi. Hiaite i thei keileh bel Saptuam ah Pastoral Care and Counselling omlou chihna tawh kibang hi.
Saptuam in khalam thil chouh hilou a salam a i-thil
tuahte le i buaipih ding ahi. Salam a i-buaina tuamtuamte a hong veng chiang in
khalam ah le kihat theipan chouh ahi chih theih ding ahi. Tuaban ah, hiaibang
kisinsakna i sai hun in sinsaktu ding a Trained Counsellor-te zat ngeingei ding
ahi. Mi khatpeuh i zat chiang in amaute’n a sinkhaklouh uh hon sinsak ding
ahihman un ki phattuampih taktak khollou ding hi.
2. KHALAM DAMNA BAN AH LUNGSIM CHIDAMNA
Hiai khovel ah setan in ahun-le-mun zil in a nasepdan khekzel a, tuhun in sum-le-pai leh lungsim damlouhna tuamtuamte nasatak in zang lel hi. Gingtute’n Setan nasepdan ki ngainep in kisui khollou a, huaiziak in buaina tuahlouh di tamtak kituah loh hi.
Tuhun a setan vanzat hoih mahmah “Lungsim Damlouhna” apan i suahtak nadia a poimawh mahmah chu “Psychological Counselling” ahi. Counselling i chih chiang un hotdamna counselling chouh i thei un i ngaipoimoh ua, Jesu a hotdamna neih pen mihing adia a poimoh pen chu ahi, huchih kawmkawm in Psychological Counselling leng lungsim leh taksa damna ding leh khalam a khanna ding inle poimoh petmah hi.
Pathian in mihingte pen Kha, Lungsim leh Taksa a damthei mahmah ding in hon deih hi. Eite’n khalam damna neih a poimohdan i thei ua, chialpina leh hotdamna camp khawng i saizel uhi. Tuabang in taksa damlouhna neite’n le damna deih in taksa ah neuchik a nuamlou a omchiang in Doctor-te kiang kizuan pahsek hi. Himahleh lungsim adamlouh chiang in a damna ding kizong khollou hi. Lungsim damlouhna tampitak om a, tuate lak ah hiai anuai a te kithang mahmah hi.
• Post
Traumatic Stress Disorder
• Depression
• Bipolar
Disorder
• Attention
Deficit Hyperactivity Disorder
• Stress
• Anxiety
Disorder
• Obsessive
Compulsive Disorder
• Social
Phobia
• Borderline Personality Disorder leh adangdang tampitak om hi.
Eimite lak ah lungsim damlouhna a damlou tamtak ki om ding in gintak-huai hi. Gam changkangte’n bel lungsim chidamna poimoh petmah ahihdan thei in Saptuamte’n Pastor-te ban ah atuam in Counsellor khawng neilai uhi.
Tumlam gam leh India a ana changkang deuhte’n Counselling Fee tampipi seng in lungsim damna ding in Counsellor/Psychologist leh Psychiatrist-te kiang zuan uhi. Eilamte’n hichibang a poimohna kitheiban nailou deuh bang hi. Gam changkang ah bel Pastor-te nasan in buaina leh haksatna atuah chiang un Counsellor-te kiang va zuanzel uhi.
Saptuam member-te lak ah leng lungsim natna nei a lungsim chidamlou tamtak om ding in gintak-huai a, hiai lungsim damloute damna ding a panlatu ding leh a kalsuan ding saptuam ahi. Khalam damna chouh ngai poimoh i hihleh setan nasepdan theisiamlou a khanglou nailou ki hikha ding ahi.
Khalam damna zaw a poimohpen mah ahi, ahihziak in
khovel a hinglai i hihman in i taksa leh lungsim damna leng poimoh lawtel
a…Kha, Taksa leh Lungsim a chidam chiang in damna bukim nei kihipan hi ahi.
Pathian in damna bukim neidia a saptuamte hon deih ahi chih i kitheihmoh bawl
hetlouh ding ahi. Lungsim damlouhna in hon pumtuam ma a saptuam in pan alak pen
hoih mahmah ding hi.
3. MUHKHOLHSA BAN AH GINNA A KALSUAN
NGAM DING
Jesu nungzui i hihleh bel ginna a kalsuan ding ahi. Chikmah a i muh ngeilouh “Jesu” ei adia si ahi chih gingta a, Bible a kigelhte adik ahi chi a pomte i hih uleh ginna a kalsuan ngam ding ahi. Jesu Hondampa dia i saan hun chouh a ginna zatding hilou a, Amah mel i muh matan ginna a kalsuan ding hizaw ahi.
Tulai khovel ah Saptuam pen ginna a kalsuan nawnlou ahi chile kigenkhial khollou ding hi. Muhkholhsa nei a kalsuan i hihtak lehle ginna pen poimoh ngaihzawk a, ginna a kalsuan dia kisakthak ding ahi.
Ginna a kal i suanzawhlouh ziak mah uh leng ahi ding a, tuhun in saptuam sung ah Khasiangthou sang in Sum-le-pai kidaihlah zaw a, Khasiangthou in vaihawmlou in Sum-le-pai in vaihawm zawta hi. Huaiziak in i biakinn sung uah Pathian sang in mihing thunei in lal zawta a, Khasiangthou tazou nonlou le bangsimta maimah hi.
Huaiziakin ginna a kalsuan a Pathian deihdan tawh
kituak a saptuam in malam a nawt poimoh petmah hi.
THUKHITNA
Tulai khovel ah Saptuam hausa lawta a, saptuam’ building-te leh Biakinnte hoih deuhdeuh, lian deuhdeuh, thupi deuhdeuhta hi. Himahleh a ki khawm di tawm hiaihiai a, Saptuam mipite lak ah khamiitna kiam hiaihiai in a khami taktak sang in a kilembawl pung deuhdeuh mai hi. A belam taktakte sang in a belam vunsilh kitam zawta hi. Huaiziak in hun paisa a i-paidante uh khektuak omte khek a, tuhun a poimoh hihtuak omte i hih ding ahi. Khovel kikheng mahmahta ahihman in i paidan ngeingei a pai gige pen dikkhin khollou ding hi.
Ahoihlou leh dikloute taisan a, kikhek a poimohna munte a kikhek a, ziltuak omte zil a, setan nasepdan sui a, theisiam a, khalam-salam-lungsimlam a chidam saptuam hi di leh i Hondampa’n hon vaikhak semsuah a sembuching saptuam hiding in simtute Toupan hon vualzawl hen!
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi ana CLICK in.
No comments:
Post a Comment